తిరుపతి జూలో మూడు పులి పిల్లలు పెద్దవయ్యాయ్‌.. ఒక్కో పులికి ఏడాదికి అంత ఖర్చా

కర్నూలు జిల్లా ఆత్మకూరు సమీపంలో గతేడాది మార్చి నెలలో నాలుగు పులి పిల్లలు ప్రత్యక్షమైన సంగతి తెలిసిందే. కొత్తపల్లి మండలం పెద్ద గుమ్మడాపురం సమీపంలో నల్లమల అటవీ ప్రాంతం నుంచి నాలుగు పిల్లలు తప్పించుకుని గ్రామంలోని పొలాల్లోకి వచ్చాయి. ఆ పిల్లల్ని తల్లి చెంతకు చేర్చేందుకు ప్రయత్నాలు చేసినా ఫలించలేదు. దీంతో వాటిని తిరుపతిలోని జూకు తరలించి.. అక్కడే సంరక్షించారు. అయితే వాటిలో ఒక పులి పిల్ల చనిపోగా.. మరో మూడు అక్కడే పెరిగి పెద్దయ్యాయి.. ఇప్పుడు తిరుపతి జూలో సందర్శకుల్ని ఆకట్టుకుంటున్నాయి.

ఈ మూడు ఆడ పులి పిల్లలకు ప్రస్తుతం 15 నెలల వయసుకాగా.. వాటికి రుద్రమ్మ, అనంత, హరిణి అని పేర్లు కూడా పెట్టారు జూ అధికారులు. ఒక్కో పులి 70 కిలోలకుపైగా బరువు పెరిగాయని చెబుతున్నారు తిరుపతి జూ అధికారులు. ఈ మూడు పులి పిల్లలను హైదరాబాద్‌కు చెందిన ఓ ప్రైవేటు సంస్థ ఏడాది పాటూ దత్తత తీసుకుంది. ఈ పిల్లల ఆహారం, ఆరోగ్య పర్యవేక్షణ, వైద్య ఖర్చుల కోసం రూ.12 లక్షలు చెల్లించింది సదరు సంస్థ. ఈ మూడు పులుల్ని రెండేళ్ల వయసు వచ్చే వరకు తిరుపతి జూలోనే సంరక్షించనున్నారు. ఈ మూడు పులి పిల్లల్ని రెండేళ్ల వయసు దాటాక.. ఇవి కర్నూలు జిల్లాలో ఎక్కడ దొరికాయో.. అక్కడి అటవీ ప్రాంతంలోనే వదిలి వేయనున్నట్లు అధికారులు అంటున్నారు.

గతేడాది మార్చి నెలలో ఈ పులి పిల్లలు దొరికాయి.. వీటిని గ్రామానికి తీసుకొచ్చిన స్థానికులు అటవీశాఖ అధికారులకు సమాచారం ఇచ్చారు. ఆ పులి పిల్లల్ని తల్లి చెంతకు చేర్చేందుకు కొద్దిరోజులు ప్రయత్నించినా ఫలితం దక్కలేదు. ఆ తర్వాత తల్లి పులి పిల్లల్ని దగ్గరకు తీసుకోదని తేల్చిన అధికారులు వెంటనే తిరుపతి జూకు తరలించారు. అక్కడే వాటిని జాగ్రత్తగా సంరక్షించారు.. అయితే ఈ నాలుగు పిల్లల్లో ఒకటి చనిపోయింది.. మిగిలిన మూడు పిల్లల విషయంలో జాగ్రత్తలు తీసుకొన్నారు. ఇప్పుడు ఆ పిల్లలు పెద్దయ్యాయి.