కొత్త ఇంటి బాత్రూం నుంచి బయటికి వస్తున్న పాములు.. ఏకంగా 35 పట్టుకున్న స్థానికులు

పామును చూడగానే మనలో ఎక్కడి లేని భయం వస్తుంది. ఇక ఆ పాము మన ఇంట్లోనే కనిపించిందంటే చాలు.. ఆ సంఘటన మర్చిపోయేవరకు అది మన కళ్లముందే కదలాడుతూ ఉంటుంది. అయితే ఒక్క పామును చూస్తేనే ఇలా అనిపిస్తే.. ఆ ఇంట్లో మాత్రం ఏకంగా పదుల సంఖ్యలో పాములు బయటికి వస్తున్నాయి. వాటిని చూసి ఆ ఇంటి యజమానితోపాటు అతని కుటుంబ సభ్యులు భయంతో బిక్కుబిక్కుమంటూ బతుకుతున్నారు. ఈ సంఘటన అస్సాం రాష్ట్రంలో చోటు చేసుకుంది. కొత్తగా కట్టిన ఇంట్లోని బాత్రూం నుంచి ఆ పాములు బయటికి రావడం.. వారిని తీవ్రంగా వణికిస్తోంది.

అస్సాంలోని నాగోన్ జిల్లాలోని కాలైబోర్ ప్రాంతానికి సమీపంలో ఉన్న కువారిటల్ చారియలిలో ఈ భయంకరమైన సంఘటన చోటు చేసుకుంది. ఓ వ్యక్తి ఇటీవలె ఇంటిని నిర్మించగా.. కొత్త ఇంట్లోని బాత్రూం నుంచి పాములు బయటికి రావడం ప్రస్తుతం సంచలనంగా మారింది. దీంతో పాములు పట్టే సంజిబ్ దేకాను రంగంలోకి దింపారు. ఆ కొత్త ఇంట్లోని బాత్రూంలోకి వెళ్లిన సంజిబ్ దేకా.. 35 కు పైగా పాములను విజయవంతంగా పట్టుకున్నాడు. అనంతరం వాటిని ఓ బకెట్లో వేసి అక్కడి నుంచి దూరంగా వదిలిపెట్టడంతో ఆ ఇంట్లోని వారే కాకుండా చుట్టుపక్కల ఉన్న వారు కూడా ఊపిరి పీల్చుకున్నారు.

ఇక ఒకే ఇంట్లోని బాత్రూంలో 35 కి పైగా పాములు బయటికి రావడంతో ఈ విషయం తెలిసి స్థానికులు అక్కడ భారీగా గుమిగూడారు. ఆ పాములను చూసేందుకు ఒక్కసారిగా ఎగబడ్డారు. అయితే స్థానికంగా సంజీబ్ దేకా పాములు పట్టడంలో ఎంతో అనుభవం ఉందని స్థానికులు వెల్లడించారు. ఇటీవలె సంజీబ్ దేకా ఓ భారీ కొండ చిలువను రక్షించినట్లు తెలిపారు. కలియాబోలోని టీ ఎస్టేట్ నుంచి 55 కిలోల కంటే ఎక్కువ బరువు.. 14 అడుగుల పొడవు ఉన బర్మీస్ కొండచిలువను రక్షించి తన వెంట తీసుకువెళ్లినట్లు చెప్పారు. దీంతో స్థానికంగా సంజీబ్ దేకాను సర్పమ్ మ్యాన్ అని పిలుస్తుంటారు.