ముగుస్తున్న గడువు.. అరవింద్ కేజ్రీవాల్‌కు సుప్రీంకోర్టులో ఎదురుదెబ్బ

ఢిల్లీ ముఖ్యమంత్రి అరవింద్ కేజ్రీవాల్‌కు సర్వోన్నత న్యాయస్థానం ఝలక్ ఇచ్చింది. తన మధ్యంతర బెయిల్‌ను మరో వారం రోజులు పొడిగించాలని, దీనిపై అత్యవసర విచారణ చేపట్టాలని ఆమ్ ఆద్మీ పార్టీ అధినేత చేసిన అభ్యర్థనను సుప్రీంకోర్టు నిరాకరించింది. తదుపరి ఆదేశాల కోసం ఈ అంశాన్ని ప్రధాని న్యాయమూర్తి జస్టిస్ డీవై చంద్రచూడ్‌కు పంపింది. లోక్‌సభ ఎన్నికల ప్రచారం, అరోగ్యాన్ని దృష్టిలో ఉంచుకుని ఢిల్లీ సీఎం కేజ్రీవాల్‌కు సుప్రీంకోర్టు మూడు వారాల మధ్యంతర బెయిల్‌ను మంజూరు చేసిన విషయం తెలిసిందే. ఈ బెయిల్ గడువు జూన్ 1తో ముగియనుండగా.. ఆయన జూన్ 2న తిరిగి జైలు వెళ్లాల్సి ఉంది. ఈ నేపథ్యంలో మరో ఏడు రోజుల పాటు బెయిల్‌ను పొడిగించాలని కోరుతూ సోమవారం నాడు పిటిషన్ దాఖలు చేశారు.

దీనిపై అత్యవసర విచారణకు జస్టిస్ జేకే మహేశ్వరి, జస్టిస్ కేవీ విశ్వనాథన్‌ల ధర్మాసనం నిరాకరించింది. కేజ్రీవాల్ తరఫున వాదనలు వినిపించిన సీనియర్ లాయర్ అభిషేక్ మను సింఘ్వి.. తన క్లయింట్‌‌కు ప్రస్తుతం ప్రాథమిక వైద్య పరీక్షలు పూర్తయ్యాయని తెలిపారు. మరికొన్ని పరీక్షలు చేయించకోవాల్సి ఉందని, అందుకు వారం రోజులు పడుతుందని అన్నారు. అందుకే ఈ పిటిషన్‌పై అర్జెంటుగా విచారణ చేపట్టాలని, బుధవారం నాటి లిస్టింగ్‌లో చేర్చాలని అభిషేక్ మను సింఘ్వీ కోరారు. ఇది ఢిల్లీ ముఖ్యమంత్రికి సంబంధించిన అంశమని, వారం రోజులు మాత్రమే తాము పొడిగించాలని కోరుతున్నామని అభ్యర్ధించారు.

ఈ సందర్భంగా జోక్యం చేసుకున్న ధర్మాసనం‘ఈ పిటిషన్ మేము పరిశీలించాం.. దీనిని ప్రధాన న్యాయమూర్తి ముందు ఉంచుతాం.. ఆయన ఆదేశాలను బట్టి ముందుకెళ్తాం’ అని పేర్కొంది. కేజ్రీవాల్‌కు డాక్టర్లు పరీక్షలు నిర్వహించిన తర్వాత పిటిషన్‌ను వేసినట్టు సింఘ్వీ తెలిపారు. అయితే, కేజ్రీవాల్‌కు మధ్యంతర బెయిల్‌ను సుప్రీంకోర్టు ఆమోదించినప్పుడు ఈ విషయాన్ని ఎందుకు ప్రస్తావించలేదని ధర్మాసనం ప్రశ్నించింది. దీనికి ఆయన బదులిస్తూ... ‘కొన్ని వైద్య పరీక్షలు నిర్వహించి నివేదికను అందించారు. అందుకే బెయిల్ పొడిగింపు పిటిషన్‌ను ఏడు రోజులు దాఖలు చేయడానికి కొంత సమయం పట్టింది.’ అని చెప్పారు.