పుణే టీనేజర్ కారు ప్రమాదంలో విస్తుగొలిపే వాస్తవాలు,,,,,కేసును తప్పుదారి పట్టించడానికి బడాబాబు విశ్వప్రయత్నం

పుణే పోర్షే కారు ప్రమాదం కేసులో విస్మయానికి గురిచేసే విషయాలు వెలుగు చూస్తున్నాయి. తాజాగా, టీనేజర్ బ్లడ్ శాంపిల్స్‌ను మార్చేసిన డాక్టర్లకు ఎంత డబ్బు ముట్టిందనే విషయం బయటపడింది. అతుల్ ఘట్‌కాంబ్లే అనే ప్యూన్‌ ఈ తంతగానికి మధ్యవర్తిగా వ్యవహరించినట్లు వెల్లడయ్యింది. అయితే, పోలీసులకు ముందుగానే అనుమానం రావడంతో కౌంటర్‌ ఆపరేషన్‌ నిర్వహించడంతో వైద్యులు గుట్టురట్టయ్యింది. రూ.3 లక్షలు తీసుకుని, రక్తనమూనాలను మార్చేసినట్టు తెలింది. టీనేజర్ నుంచి తీసుకున్న నమూనాలను డస్ట్ బిన్‌లో పడేయడం గమనార్హం. ఈ కేసులో ఇప్పటికే సాసూన్‌ హాస్పిటల్ డాక్టర్లు అజయ్‌ తావ్‌రే, శ్రీహరి హల్నోర్‌, ప్యూన్ అతుల్‌ను అరెస్టు చేశారు.

ప్రమాదం జరిగిన మర్నాడు డాక్టర్‌ అజయ్‌కు ఫోన్ చేసిన నిందితుడి తండ్రి.. తన కుమారుడి రక్తనమూనాలను తారుమారు చేస్తే భారీ మొత్తం ఇస్తానని ఆఫర్ చేశాడు. డీల్ కుదరడంతో తావ్‌రే తన ప్లాన్‌‌ గురించి వివరించాడు. టీనేజర్ రక్త నమూనాల స్థానంలో వేరే డాక్టర్‌ బ్లడ్ శాంపిల్స్ పెడతామని చెప్పాడు. మద్యం సేవించలేదని నిరూపించడానికే ఇలా ప్లాన్ చేశారు. విచారణ సందర్భంగా ఆవేశంతో.. ‘నన్ను ఇరికించారు కదా.. ఎవరినీ వదలను.. అందరి పేర్లు బయటపడెతా’ అంటూ డాక్టర్ ఆగ్రహం వ్యక్తం చేసినట్లు అధికారులు తెలిపారు.

పుణే పోలీస్‌ కమిషనర్‌ అమితేశ్ కుమార్ మాట్లాడుతూ.. నిందిత బాలుడి నుంచి రక్త నమూనాలను ఫోరెన్సిక్ ల్యాబ్‌కు పంపలేదని అన్నారు. ‘‘ప్రమాదం జరిగిన రోజు మే 19న ఉదయం 11 గంటలకు సాసూన్‌ ఆస్పత్రిలో బ్లడ్ శాంపిల్స్ సేకరించాం.. కానీ, వాటిని డస్ట్‌బిన్‌లో పడేసి..మరో వ్యక్తి రక్త నమూనాలను సేకరించి పరీక్షలకు పంపారు.. ఫోరెన్సిక్ విభాగం హెచ్‌ఓడీ తావ్‌రే సూచనల మేరకు సీఎం డాక్టర్ శ్రీహరి హల్నోర్‌ ఈ పనిచేసినట్లు తేలింది’ అని పేర్కొన్నారు. అందుకే ఆ పరీక్షల్లో ఆల్కహాలు ఆనవాళ్లు బయటపడలేదని తెలిపారు.

అయితే, బ్లడ్‌ శాంపిల్స్‌లను మార్చేసే అవకాశం ఉందని ముందుగానే అనుమానించిన పోలీసులు.. మరోసారి రహస్యంగా మైనర్ శాంపిల్స్‌ను సేకరించి వేరే ఆస్పత్రికి పంపారు. మే 20న రెండు శాంపిళ్లలో స్వాబ్స్‌ను డీఎన్ఏ పరీక్షల కోసం రాష్ట్ర ఫోరెన్సిక్‌ ల్యాబ్‌ పంపిన పోలీసులు.. బాలుడి తండ్రి రక్తనమూనాలను కూడా డీఎన్‌ఏ పరీక్షల కోసం సేకరించారు. చివరకు సాసూన్‌ ఆస్పత్రిలో తీసిన రక్త నమూనాలతో బాలుడి తండ్రి డీఎన్‌ఏ సరిపోలలేదు. రహస్యంగా ఆంధ్‌ ఆస్పత్రికి పంపిన రెండో రక్తనమూనా మ్యాచ్‌ అయింది. దీంతో సాసూన్‌ ఆస్పత్రి వైద్యులు అడ్డంగా దొరికిపోయారు.