పురిట్లోనే బిడ్డ చనిపోయిందని తెలిసి ఆగిన తల్లి గుండె.. హృదయాలను కదిలించే ఘటన

అమ్మతనం.. పెళ్లి తర్వాత ప్రతి స్త్రీ కనే కల. మాతృత్వం అందించే అనుభూతి ఆమెకు.. కాబోయే అమ్మకు మరపురానిది. అందుకే అమ్మను కాబోతున్నాననే విషయం తెలిసిన మరునిమిషం నుంచి ఓ గొప్ప అనిర్వచనీయమైన ఆనందాన్ని పొందుతూ ఉంటారు. పుట్టబోయేది పాపా.. బాబా.. పాప పుడితే ఏ పేరు పెట్టాలి.. బాబు పుడితే ఏ పేరుపెట్టాలి అనే విషయం దగ్గర నుంచి వారిని ఎలా పెంచాలనే వరకూ ఎన్నో కలలు కంటారు. కడుపులోని పిండం కదులుతూ తన్నుతున్నప్పుడల్లా అలౌకిక ఆనందాన్ని అనుభవిస్తూ ఉంటారు. ఆ అమ్మ కూడా అలాగే పరితపించింది. పుట్టబోయే బిడ్డ గురించి.. ఎన్నో కలలు కనింది. కానీ విధి చిన్నచూపు చూసింది.

నవమోసాలు మోసి జన్మనిచ్చిన పేగుబంధం.. కళ్లముందే కన్నుమూసింది. తన పేగు తెంచుకుని పుట్టిన పసిపాప ప్రపంచాన్ని చూడకముందే కనుమూసింది. దీంతో ఆ అమ్మ గుండె పగిలింది. తనకు పుట్టిన బిడ్డ పురిటిలోనే ప్రాణం వదిలేసిందని తెలిసుకున్న ఆ తల్లి గుండె బద్ధలైంది. తన బిడ్డతో పాటే తాను కూడా తనువు చాలించింది. ఈ విషాదకర ఘటన అల్లూరి సీతారామరాజు జిల్లాలో జరిగింది. వివరాల్లోకి వెళ్తే.. అల్లూరి సీతారామరాజు జిల్లా హుకుంపేట మండలం అడ్డుమండ గ్రామానికి చెందిన రమ్యప్రియ సచివాలయ పరిధిలో మహిళా పోలీసుగా చేస్తోంది.

రమ్యప్రియకు నెలలు నిండి పురిటినొప్పులు రావటంతో కుటుంబసభ్యులు పాడేరు జిల్లా ఆస్పత్రిలో చేర్పించారు. నొప్పులు ఎక్కువ కావటం, సాధారణ కాన్పు కష్టం కావటంతో వైద్యులు సిజేరియన్ చేసి బిడ్డను బయటకు తీశారు. కానీ కడుపులోనే శిశువు చనిపోయినట్లు వైద్యులు గుర్తించారు. ఇదే విషయాన్ని రమ్య కుటుంబసభ్యులకు తెలిపారు. సిజేరియన్ తర్వాత వేరొక గదిలో ఉన్న రమ్యప్రియ.. కాసేపటికి మెలుకువలోకి వచ్చింది. అయితే బిడ్డ చనిపోయిన విషయం కుటుంబసభ్యుల ద్నారా తెలుసుకున్న రమ్యప్రియ.. ఆ చేదు నిజాన్ని తట్టుకోలేకపోయింది. గట్టిగా కేకలువేస్తూ అపస్మారక స్థితిలోకి వెళ్లిపోయింది. కాసేపటికే తాను కూడా తనువు చాలించింది. రమ్యప్రియ మరణవార్త ఆ కుటుంబంలోనూ, ఆ గ్రామంలోనూ తీవ్ర విషాదాన్ని నింపింది. తల్లీబిడ్డను కోల్పోయిన రమ్యప్రియ కుటుంబ సభ్యులు కన్నీరు మున్నీరవుతున్నారు.