ఏపీ ఎన్నికల్లో గెలుపెవరిదో చెప్పిన నారాయణ.. అదంతా ఉత్తుత్తిదేనంట

ఉమ్మడి ఆంధ్రప్రదేశ్ నుంచి తెలంగాణ ప్రత్యేక రాష్ట్రంగా ఏర్పాటైన తర్వాత.. ప్రతి విషయంలోనూ రెండు రాష్ట్రాల మధ్య పోలిక తేవడం సాధారణమైపోయింది. పార్టీల దగ్గర నుంచి ప్రభుత్వ పాలన వరకూ.. అభివృద్ధి దగ్గర నుంచి, సంక్షేమ పథకాల అమల వరకూ అన్ని విషయాల్లోనూ పోలిక తేవడం కామన్‌గా మారింది. ఈ క్రమంలోనే సీపీఐ జాతీయ కార్యదర్శి నారాయణ.. తెలంగాణ ముఖ్యమంత్రి రేవంత్ రెడ్డి, ఏపీ సీఎం వైఎస్ జగన్ మోహన్ రెడ్డి మధ్య పోలిక తెచ్చారు. ఆ విషయంలో ఏపీ సీఎం వైస్ జగన్‌ను.. తెలంగాణ ముఖ్యమంత్రి రేవంత్ రెడ్డి ఫాలో అవుతున్నారని నారాయణ చెప్తున్నారు.

ఏపీలో వైసీపీ గెలిచే అవకాశాలు లేవని సీపీఐ నారాయణ తేల్చేశారు. ఈ ఎన్నికల్లో వైసీపీ ఓడిపోయే పరిస్థితులో ఉందన్న నారాయణ.. అయితే అధికారులను నమ్మించేందుకు విశాఖలో ప్రమాణస్వీకారం అంటూ హడావిడి చేస్తున్నారని అన్నారు. విశాఖపట్నం హోటల్స్ గదులు ముందస్తు బుకింగ్‌తో నిండిపోయాయని వార్తలు వస్తున్నాయన్న నారాయణ.. తాను హోటల్స్‌కు ఫోన్ చేస్తే అలాంటిదేమీ లేదని తేలిందన్నారు. కౌంటింగ్ గురించి కూడా వైసీపీ నేతలు రెచ్చగొట్టే మాటలు మాట్లాడుతున్నారని.. ఇవన్నీ చూస్తే వైసీపీ ఓడిపోతోందని తెలుస్తోందన్నారు. అలాగే కేంద్రంలో మోడీ నేతృత్వంలోని బీజేపీ అధికారంలోకి రాకపోతే.. చంద్రబాబు ఇండియా కూటమిలోకి రావాలని నారాయణ సూచించారు.

మరోవైపు ఐపీఎస్ అధికారి ఏబీ వెంకటేశ్వరరావు మంచి అధికారి అని చెప్పిన నారాయణ.. వైఎస్ జగన్ ఆయనపట్ల రాజకీయ కక్ష్యతో వ్యవహరించారన్నారు. పోస్టింగ్ ఇవ్వకుండా, డ్యూటీలోకి తీసుకోకుండా వేధింపులకు గురిచేశారని విమర్శించారు. తెలంగాణ సీఎం రేవంత్ రెడ్డి కూడా ఇలాగే రాజకీయ కక్షతో వ్యవహరిస్తున్నారన్న నారాయణ.. ఈ విషయంలో జగన్‌ను రేవంత్ రెడ్డి ఫాలో అవుతున్నారని అభిప్రాయపడ్డారు. రాజకీయాల్లో విబేధాలు ఉండొచ్చు కానీ.. కక్షలు ఉండకూడదని సూచించారు. మాజీ సీఎం కేసీఆర్ చేసిన ప్రతి దాన్నీ రివర్స్ చేస్తే.. రేవంత్ రెడ్డి తన నెత్తిన తానే చెత్త వేసుకున్నట్లు అవుతుందని ఎద్దేవా చేశారు.

మరోవైపు తెలంగాణ గేయం, చిహ్నం అంశాలపైనా సీపీఐ నారాయణ స్పందించారు. తెలంగాణ గేయం విషయంలో రేవంత్ రెడ్డి ప్రభుత్వాన్ని అభినందించిన నారాయణ.. తెలంగాణ చిహ్నం జోలికి వెళ్లకపోవటం మంచిదని సూచించారు. అలాగే తెలంగాణ గేయానికి కీరవాణి స్వరకల్పన చేయడంపై ప్రాంతీయవాదం తెరపైకి తేవడాన్ని నారాయణ తప్పుబట్టారు. ఇలాంటి వైఖరి మంచిదికాదని సూచించారు.