రేపే చివరి దశ లోక్‌సభ ఎన్నికల పోలింగ్.. మోదీ, కంగనా సహా బరిలో కీలక నేతలు

గత 2 నెలలుగా సాగుతున్న లోక్‌సభ ఎన్నికల ప్రక్రియలో భాగంగా శనివారం దేశవ్యాప్తంగా తుది విడత పోలింగ్ జరగనుంది. మొత్తం 7 రాష్ట్రాలు, ఒక కేంద్ర పాలిత ప్రాంతం పరిధిలో ఉన్న 57 లోక్‌సభ సీట్లకు జూన్ 1 వ తేదీన ఎన్నికలు నిర్వహించనున్నారు. దీని కోసం కేంద్ర ఎన్నికల సంఘం అధికారులు ఇప్పటికే ఏర్పాట్లు పూర్తి చేశారు. ఇప్పటికే ఆరు విడతల పోలింగ్ పూర్తి కాగా.. శనివారం జరగబోయే పోలింగ్‌తో దేశంలో సార్వత్రిక ఎన్నికల ప్రక్రియ ముగియనుంది. ఇక ఫలితాలు జూన్ 4 వ తేదీన విడుదల కానున్నాయి. ఇక చివరి విడతలో ప్రధానమంత్రి నరేంద్ర మోదీ ప్రాతినిధ్యం వహిస్తున్న ఉత్తర్‌‌ప్రదేశ్‌లోని వారణాసి నియోజక వర్గం కూడా ఉంది.

ఉత్తర్‌ప్రదేశ్‌లో వారణాసితో పాటు 13 లోక్‌సభ స్థానాలకు ఎన్నికలు జరగనున్నాయి. ఇక బీహార్‌లో 8, పశ్చిమ బెంగాల్‌ 9, జార్ఖండ్ 3, పంజాబ్‌ 13, హిమాచల్ ప్రదేశ్‌ 4, ఒడిషా 6 లోక్‌సభ నియోజకవర్గాల్లో పోలింగ్ జరగనుంది. దీంతోపాటు కేంద్ర పాలిత ప్రాంతం అయిన చంఢీగఢ్‌కు కూడా ఈ విడతతోనే ఎన్నికల ప్రక్రియ పూర్తి కానుంది. ఇక దేశవ్యాప్తంగా 42 అసెంబ్లీ సీట్లకు కూడా ఇదే విడతలో ఎన్నికలు జరగనున్నాయి. ఈ చివరి దశ పోలింగ్‌లో ప్రధాని నరేంద్ర మోదీ, బాలీవుడ్ క్వీన్ కంగనా రనౌత్, కేంద్రమంత్రి అనురాగ్ ఠాకూర్, కాంగ్రెస్ నేత మనీష్ తివారీ, కేంద్ర మాజీ మంత్రి రవిశంకర్ ప్రసాద్ సహా పలువురు కీలక నేతలు పోటీ పడుతున్నారు.

వీరిలో ప్రధానంగా ప్రధాని నరేంద్ర మోదీ పోటీ చేస్తున్న వారణాసి నియోజకవర్గంపైనే దేశవ్యాప్తంగా చర్చ జరుగుతోంది. 2014, 2019 లోక్‌సభ ఎన్నికల్లో.. వారణాసి నుంచి ఘనవిజయం సాధించిన మోదీ.. హ్యాట్రిక్ కొట్టాలని ఉవ్విళ్లూరుతున్నారు. అయితే 2014 లో కాంగ్రెస్ పార్టీ తరఫున వారణాసిలో పోటీ చేసిన అజయ్ రాయ్ మూడో స్థానంలో నిలిచారు. ఇక 2019 లో పోలైన ఓట్లలో 63 శాతానికి పైగా సాధించారు. అయితే అజయ్ రాయ్ మాత్రం 2014 లో సాధించిన ఓట్ల కంటే రెట్టింపు ఓట్లు సాధించడం గమనార్హం. ఈ నేపథ్యంలోనే మూడోసారి గెలుపు కోసం మోదీ తీవ్ర ప్రయత్నాలు చేస్తుంటే.. ఆయనను ఓడించేందుకు కాంగ్రెస్, సమాజ్ వాదీ పార్టీలు ఇండియా కూటమిలో భాగంగా కలిసి పోటీ చేస్తున్నాయి.

ఇక హిమాచల్‌ప్రదేశ్‌లోని మండి నియోజకవర్గం నుంచి బాలీవుడ్ నటి కంగనా రనౌత్ బరిలో ఉన్నారు. ఎన్నికల వేళ రాజకీయాల్లోకి వచ్చిన కంగనా రనౌత్.. బీజేపీ తరఫున టికెట్ దక్కించుకున్నారు. ఇక ఇదే హిమాచల్ ప్రదేశ్‌లోని హమీర్పూర్ నుంచి కేంద్రమంత్రి అనురాగ్ ఠాకూర్ పోటీ చేస్తున్నారు. బీహార్‌లోని పాటలీపుత్ర నియోజకవర్గం నుంచి ఆ రాష్ట్ర మాజీ సీఎం, ఆర్జేడీ అధినేత లాలూ ప్రసాద్ యాదవ్ కుమార్తె మిసా భారతీ పోటీ చేస్తున్నారు. ఇక ఉత్తర్‌ప్రదేశ్‌లోని గోరక్‌పూర్ స్థానం నుంచి నటుడు రవి కిషన్ తన అదృష్టాన్ని పరీక్షించుకోనున్నారు. కేంద్ర మాజీ మంత్రి రవిశంకర్ ప్రసాద్.. బీహార్‌లోని పాట్నా సాహిబ్ లోక్‌సభ స్థానం నుంచి పోటీ చేస్తున్నారు.

ఈసారి లోక్‌సభ ఎన్నికలు మొత్తం 7 విడతల్లో జరుగుతుండగా.. ఏప్రిల్ 19 వ తేదీన మొదటి దశ పోలింగ్ జరిగింది. తొలిదశలో 102 లోక్‌సభ స్థానాలకు.. రెండో దశలో 88 స్థానాలకు.. మూడో దశలో 92 లోక్‌సభ స్థానాలకు.. నాలుగో దశలో భాగంగా తెలంగాణ, ఆంధ్రప్రదేశ్ సహా పలు రాష్ట్రాల్లో 92 లోక్‌సభ స్థానాలకు.. ఐదో దశలో 49 లోక్‌సభ స్థానాలకు.. ఆరో దశలో 58 లోక్‌సభ సీట్లకు ఎన్నికలు జరిగాయి. ఏడో దశలో భాగంగా 57 లోక్‌సభ సీట్లకు జూన్ 1న ఎన్నికలు జరగనున్నాయి. జూన్ 4 వ తేదీన రిజల్ట్స్ వెలువడనున్నాయి.