ఈవీఎంలను చెరువులో పడేసి, బాంబులు వేసి.. లోక్‌సభ ఎన్నికల వేళ అరాచకం

లోక్‌సభ ఎన్నికల ఏడో దశలో భాగంగా పశ్చిమ బెంగాల్‌లో హింసాత్మక సంఘటనలు చోటు చేసుకున్నాయి. ఈ క్రమంలోనే కొందరు ఆకతాయిల గుంపు చేసిన పని తీవ్ర దుమారానికి కారణం అయింది. ఏకంగా పోలింగ్ స్టేషన్‌లోకి ప్రవేశించిన దుండగులు.. ఈవీఎంను, వీవీప్యాట్ మెషీన్‌ను ఎత్తుకెళ్లిపోయారు. అనంతరం వాటిని తీసుకుని పరిగెత్తుకుంటూ వెళ్లి.. పక్కనే ఉన్న చెరువులో పడేశారు. వారిని అడ్డుకునేందుకు పోలింగ్ అధికారులు, పోలీసులు పరిగెత్తినా ఫలితం లేకపోయింది. ఇక మరో ప్రాంతంలో పార్టీల మధ్య గొడవలు కాస్త తీవ్రమై ఏకంగా బాంబులు విసురుకునే వరకు వెళ్లింది. ఈ సంఘటనలతో ఎన్నికల వేళ పశ్చిమ బెంగాల్‌లో తీవ్ర ఉద్రిక్త పరిస్థితులు తలెత్తాయి.

లోక్‌సభ ఎన్నికల తుది దశ పోలింగ్‌లో భాగంగా శనివారం 9 నియోజకవర్గాల్లో ఎన్నికలు జరుగుతున్నాయి. ఈ క్రమంలోనే జయనగర్ లోక్‌సభ నియోజకవర్గం పరిధిలో హింస తలెత్తింది. కుల్తాలీ గ్రామానికి చెందిన ఓ అల్లరి మూక.. స్థానికంగా ఉన్న పోలింగ్‌ బూత్‌లోకి ప్రవేశించి.. ఎలక్ట్రానిక్ ఓటింగ్ మెషీన్‌ను తీసుకెళ్లి చెరువులో విసిరేశారు. దీంతో కుల్తాలీ గ్రామంలో తీవ్ర ఘర్షణ వాతావరణం చోటు చేసుకుంది.

కుల్తాలీ గ్రామంలో తెల్లవారుజామున పోలింగ్‌కు ఎన్నికల అధికారులు ఏర్పాట్లు చేస్తున్న సమయంలో.. గ్రామస్థులకు, పోలింగ్‌ ఏజెంట్లకు మధ్య వివాదం చెలరేగింది. బేనిమాధవ్‌పూర్ ఎఫ్‌పీ పాఠశాలలో ఏర్పాటు చేసిన పోలింగ్ బూత్‌లోకి ఏజెంట్లను రానీయకుండా కొంతమంది అడ్డుకోవడం తీవ్ర ఉద్రిక్తతకు కారణం అయింది. ఈ క్రమంలోనే వారి మధ్య తీవ్ర వాగ్వాదం చోటు చేసుకుంది. దీంతో తీవ్ర ఆగ్రహానికి గురైన స్థానికులు బలవంతంగా పోలింగ్ స్టేషన్‌లోకి ప్రవేశించి.. ఓటర్ వెరిఫైడ్ పేపర్ ఆడిట్ ట్రయల్‌-వీవీప్యాట్‌తో కూడిన ఈవీఎంను అక్కడి నుంచి ఎత్తుకెళ్లారు. అనంతరం పక్కనే ఉన్న ఓ చెరువులో పడేశారు.

ఈ ఘటనపై పోలింగ్ అధికారులు స్థానిక పోలీసులకు సమాచారం అందించడంతో వారు రంగంలోకి దిగి ఎఫ్‌ఐఆర్ నమోదు చేసి దర్యాప్తు మొదలు పెట్టారు. సెక్టార్ పరిధిలోని మొత్తం 6 బూత్‌లలో ఎన్నికల ప్రక్రియకు ఎలాంటి ఇబ్బందులు లేకుండా సాగుతోందని.. పశ్చిమ బెంగాల్ చీఫ్ ఎలక్టోరల్ ఆఫీసర్ తెలిపారు. ఈవీఎంను చెరువులో పడేసిన చోట కొత్త ఈవీఎం, పేపర్లను సెక్టార్ అధికారికి అందించి పోలింగ్‌ మొదలు పెట్టినట్లు వివరించారు.

ఇక కోల్‌కతాలోని జాదవ్‌పూర్ లోక్‌సభ నియోజకవర్గంలోని భాంగర్‌లోని సతులియా ప్రాంతంలో పార్టీల మధ్య తీవ్ర ఘర్షణలు చెలరేగాయి. ఇండియన్ సెక్యులర్ ఫ్రంట్-ఐఎస్‌ఎఫ్‌, సీపీఐ(ఎం) కార్యకర్తల మధ్య చోటు చేసుకున్న ఘర్షణ కాస్తా.. బాంబు దాడులకు కారణం అయింది. ఇరువర్గాలు పరస్పరం బాంబులు విసురుకోవడంతో పలువురు ఐఎస్‌ఎఫ్‌ కార్యకర్తలు గాయపడ్డారు.

బెంగాల్‌లో లోక్‌సభ ఎన్నికల ఏడో దశ పోలింగ్ ప్రక్రియ శనివారం ఉదయం 7 గంటలకు ప్రారంభమైంది. డమ్ డమ్, బరాసత్, బసిరాత్‌, జయనగర్, మధురాపూర్, డైమండ్ హార్బర్, జాదవ్‌పూర్, కోల్‌కతా దక్షిణ్, కోల్‌కతా ఉత్తర స్థానాల్లో సాయంత్రం 6 గంటల వరకు పోలింగ్ కొనసాగనుంది.