మోదీ 3.0: క్యాబినెట్‌లో 30 మందికి చోటు.. ఆ శాఖలు బీజేపీ వద్దే

ప్రధాన మంత్రిగా మూడోసారి నరేంద్ర మోదీ నేడు (జూన్ 9న) ప్రమాణస్వీకారం చేయనున్నారు. ఆయనతో పాటు క్యాబినెట్‌ కూడా కొలువుదీరనుంది. తొలి విడతలో దాదాపు 30 మందిని క్యాబినెట్‌లోకి తీసుకున్నట్టు విశ్వసనీయ వర్గాలు పేర్కొన్నాయి. నిబంధనల ప్రకారం కేంద్ర క్యాబినెట్‌లో 78 నుంచి 81 మంది అవకాశం ఉంటుంది. మొత్తం 543 మంది లోక్‌సభ సభ్యుల్లో మంత్రివర్గంలో సభ్యుల సంఖ్య 15 శాతానికి మించకూడదు. రాష్ట్రపతి భవన్‌లో ప్రధానితో పాటు హోం, ఆర్ధిక, రక్షణ, విదేశీ వ్వవహారాల శాఖలను బీజేపీ అట్టిపెట్టుకుంటుందని తెలుస్తోంది. ప్రమాణ స్వీకారం చేసే అవకాశం ఉన్న వారిలో ఉక్కు, పౌర విమానయానం, బొగ్గు వంటి కీలకమైన మౌలిక సదుపాయాల మంత్రిత్వ శాఖల మంత్రులు ఉంటారని సమాచారం.

ప్రమాణస్వీకార కార్యక్రమం రాత్రి 7.15 గంటల నుంచి 8 గంటల వరకూ 45 నిమిషాల పాటు కొనసాగుతుంది. మంత్రి పదవులు దక్కినవారికి ఆదివారం ఉదయం ఫోన్లు చేసి సమాచారం ఇవ్వనున్నారు. గత పదేళ్లూ పూర్తి మెజార్టీతో అధికారంలో కొనసాగిన బీజేపీకి.. ఈసారి ఆ పరిస్థితి లేదు. దీంతో మిత్రపక్షాలకు సముచిత స్థానం ఇవ్వాల్సిన పరిస్తితి నెలకుంది. ముఖ్యంగా టీడీపీ, జేడీ(యూ)లు కీలక శాఖల కోసం పట్టుబడుతున్నాయి. టీడీపీ అధినేత చంద్రబాబు నాయుడు, బిహార్ సీఎం నితీశ్ కుమార్‌లు రెండు నుంచి నాలుగు వరకూ మంత్రి పదవులు, స్పీకర్ పోస్ట్‌ను డిమాండ్ చేస్తున్నాయి. ఎన్డీయేలోని ఇతర పార్టీలు సైతం తమకు క్యాబినెట్‌లో చోటు ఇవ్వాలని కోరుతున్నాయి.

బీజేపీ, ప్రధాని మాత్రం మంత్రుల సంఖ్యను తగ్గించాలని యోచిస్తున్నారు, అయితే, మోదీ నేతృత్వంలోని క్యాబినెట్‌లో చాలా తక్కువ మందికి ఒకటి కంటే ఎక్కువ పోర్ట్‌ఫోలియోలు ఉంటాయని రాజకీయ వర్గాలు తెలిపాయి. ఇక, టీడీపీకి నాలుగు, జేడీయూకి రెండు మంత్రి పదవులు ఇవ్వనున్నారనే సమాచారం ఉంది. అయితే, దీనిపై ఇంకా స్పష్టత రాలేదు. ఇక, జవహర్‌లాల్ నెహ్రూ తర్వాత వరుసగా మూడు ఎన్నికల్లో గెలిచి ప్రధాని పదవి చేపడుతోన్న మొదటి వ్యక్తి నరేంద్ర మోదీ. నెహ్రూ 1952,1957,1962 ఎన్నికల్లో గెలిచి ప్రధాని పదవిని అలంకరించారు. మోదీ ప్రమాణస్వీకారోత్సవానికి శ్రీలంక అధ్యక్షుడు రణిల్ విక్రమసింఘే, మాల్దీవుల అధ్యక్షుడు మహ్మద్ మొయిజ్జు, బంగ్లాదేశ్ ప్రదాని షేక్ హసీనా, మారిషస్ ప్రధాని ప్రవింద్ కుమార్ జుగన్నాథ్, నేపాల్ ప్రదాని పుష్పకమల్ దహల్ అలియాస్ ప్రచండ, భూటా ప్రధాని షెరింగ్ డోబ్గే సహా పలువురు విదేశీ నేతలు హాజరవుతున్నారు. ప్రమాణస్వీకారం వేళ ఢిల్లీలో గతేడాది జీ 20 సందర్భంగా అమలు చేసిన కట్టుదిట్టమైన భద్రతను ఏర్పాటుచేశారు.