93 ఏళ్ల వయసులో మీడియా మొఘల్ ఐదో పెళ్లి.. తన కంటే 25 ఏళ్ల చిన్నదైన మహిళతో

అంతర్జాతీయ మీడియా మొఘల్ రూపర్ట్‌ మర్దోక్‌ మరోసారి వైవాహిక బంధంలోకి అడుగుపెట్టారు. 93 ఏళ్ల వయస్సులో ఆయన ఐదో వివాహం చేసుకోవడం విశేషం. తన కంటే వయసులో 25 ఏళ్లు చిన్నదైన శాస్త్రవేత్త ఎలీనా జుకోవా(67)తో పెళ్లిపీటలు ఎక్కారు. కాలిఫోర్నియాలోని తన సొంత ఎస్టేట్‌లో శనివారం సంప్రదాయబద్ధంగా జరిగిన ఈ వివాహానికి అతికొద్ది మంది సన్నిహితులు హాజరయ్యారు. వీరిలో న్యూ ఇంగ్లాండ్‌ పాట్రియోట్స్‌ యూఎస్‌ ఫుట్‌బాల్‌ టీమ్‌ యజమాని రోబెర్ట్‌ క్రాఫ్ట్‌ (82), ఆయన భార్య డానా బ్లూమ్‌బెర్గ్‌ (50) ఉన్నారు. ఈ పెళ్లికి సంబంధించిన ఫొటోలను మర్డోక్‌కు చెందిన యూకే పత్రిక ‘ది సన్‌’లో ప్రచురించారు.

మీడియా దిగ్గజం రూపక్ మర్దోక్‌‌.. ఆస్ట్రేలియాకు చెందిన పాట్రిషియా బుకర్‌ను మొదట వివాహం చేసుకున్నారు. అయితే, 1960లో ఆమెతో వైవాహిక బంధానికి ముగింపు పలికారు. ఆ తర్వాత జర్నలిస్ట్‌ అన్నా మరియా మన్‌, చైనా వ్యాపారవేత్త విన్‌డీ డెంగ్‌, అమెరికా మోడల్‌ జెర్రీ హాల్‌తో ఆయన పెళ్లిళ్లు పెటాకులయ్యాయి. తన మాజీ భార్యల్లో ఒకరైన విన్‌డీ డెంగ్‌ ఇచ్చిన పార్టీలో రష్యాకు చెందిన మాలిక్యులర్ సైంటిస్ట్ జుకోవాతో మర్డోక్‌కు పరిచయం ఏర్పడింది. ఆ పరిచయం స్నేహంగా మారడం డేటింగ్‌లో ఉన్నారు. అమెరికాకు వలస వచ్చిన జుకోవాకు మాస్కో ఆయిల్‌ కంపెనీ దిగ్గజం అలెగ్జాండర్‌తో వివాహమైంది.

గతేడాది డెంటల్ హైజీనిస్ట్‌ కన్జర్వేటివ్ రేడియో హోస్ట్ ఆన్ లెస్లీ స్మిత్‌తో ముర్దోక్‌కు ఎంగేజ్‌మెంట్‌ జరిగింది. కానీ, కొద్ది రోజులకే దీనిని రద్దుచేసుకున్నట్టు ప్రకటించారు. ఇక, 1950 దశకంలో మీడియా కెరీర్‌లో అడుగుపెట్టిన మర్దోక్‌.. న్యూస్‌ ఆఫ్‌ ది వరల్డ్‌, ది సన్‌ పత్రికలను ప్రారంభించారు. ఆ తర్వాత అమెరికాకు మకాం మార్చి న్యూయార్క్‌ పోస్ట్‌, వాల్‌ స్ట్రీట్‌ జర్నల్‌ వంటి పబ్లికేషన్స్‌ను సొంతం చేసుకున్నారు. 1996లో ఫాక్స్‌ న్యూస్‌ను, 2013లో న్యూస్‌కార్ప్‌ను స్థాపించారు. మీడియా మొఘల్‌గా గుర్తింపు పొందిన మర్దోక్‌ తన కెరీర్‌లో అనేక వివాదాలను ఎదుర్కొన్నారు.

2011లో ఫోన్‌ హ్యాకింగ్‌ కుంభకోణంతో న్యూస్‌ ఆఫ్‌ ది వరల్డ్‌ పత్రికను మూసివేయాల్సి వచ్చింది. గతేడాది సెప్టెంబరులో తన వ్యాపార బాధ్యతలను తన కుమారులకు అప్పగించిన ఆయన... ప్రస్తుతం తన సంస్థలకు గౌరవ ఛైర్మన్‌గా వ్యవహరిస్తున్నారు. ముర్డోక్‌కు మొత్తం ఆరు సంతానం కాగా.. మొదటి భార్యకు 1960లో విడాకులు ఇచ్చిన తర్వాత జర్నలిస్ట్ అన్నా టోర్వ్‌ను పెళ్లాడారు. ఆమెతో మూడు దశాబ్దాలు పాటు కాపురం చేసి 1999లో విడిపోయారు. అనంతరం మూడో పెళ్లి చేసుకుని 2013లో ఆమెకు విడాకులిచ్చి.. మోడల్‌ను పెళ్లాడారు.