ఆర్టీసీ బస్సులో గంజాయి స్వాధీనం
Andhra Pradesh Telugu | Suryaa Desk | Published : Tue, Jun 11, 2024, 06:36 PM
విజయనగరం జిల్లా, దత్తిరాజేరు పరిధిలోని పెదమానాపురం రైల్వే గేటు వద్ద ఆర్టీసీ బస్సులో గంజాయి స్వాధీనం చేసుకున్నట్టు పెదమానాపురం ఎస్‌ఐ శిరీష సోమవారం తెలిపారు. దీనికి సంబంధించి ఆమె తెలిపిన వివరాలు ఇలా ఉన్నాయి. సాలూరు నుంచి విశాఖపట్టణం వెళ్లే ఆల్ర్టా డీలక్స్‌ బస్సులోకి రామభద్రపురంలో కొంతమంది పాసింజర్లు ఎక్కగా డ్రైవర్ కం కండక్టర్‌ పెదమానాపురం వద్ద రైల్వేగేటు పడడంతో టిక్కెట్లు తనిఖీ చేస్తుండడంతో ఇద్దరు వ్యక్తులు హుటాహుటిన బస్సు దిగి పారిపోయారు. దీంతో అనుమానం వచ్చిన డ్రైవర్ గణపతి వారు కూర్చున్న సీటు వద్ద బ్యాగులు తనిఖీ చేయగా గంజాయి ఉండడంతో పెదమానాపురం పోలీసులకు సమాచారం అందజేశారు. నిందితులు ఇద్దరు ఒడియా భాష మాట్లాడుతున్నట్టు డ్రైవర్ తెలిపాడు. బస్సులో నుంచి 14.3 కేజీల గంజాయి స్వాధీనం చేసుకుని కేసు నమోదుచేశామని, నిందితుల కోసం గాలింపు నిర్వహిస్తున్నామని, పట్టుకున్న గంజాయిని తహసీల్దార్‌ సుదర్శనరావు సమక్షంలో అప్పగించినట్టు తెలిపారు.
|
|