ఏపీలో వారందరికి గుడ్‌న్యూస్.. ఇకపై ఒక్కొక్కరికి రూ.15వేలు

ఏపీలో పింఛన్లు తీసుకునేవారికి శుభవార్త చెప్పింది చంద్రబాబు ప్రభుత్వం. ఎన్నికల మేనిఫెస్టోలో ఇచ్చిన హామీని నిలబెట్టుకుంటూ.. సీఎం చంద్రబాబు సామాజిక భద్రత పింఛన్ల పెంపు ఫైల్‌పై సంతకం చేశారు. గురువారం సచివాలయంలోని తన ఛాంబర్‌లో బాధ్యతల స్వీకరించిన ముఖ్యమంత్రి.. మూడో సంతకం పింఛన్ల పెంపుపై సంతకం పెట్టారు. సామాజిక పింఛన్లకు ఎన్టీఆర్ భరోసా పేరును ఖాయం చేశారు.. 2014-2019 మధ్య అప్పటి టీడీపీ ప్రభుత్వం ఇదే పేరు పెట్టారు.. ఇప్పుడు దానిని కొనసాగిస్తున్నారు.

రాష్ట్రవ్యాప్తంగా వృద్ధులు, వితంతువులు, ఒంటరి మహిళలు, చేనేత కార్మికులు, మత్స్యకారులు, కల్లుగీత కార్మికులు, డప్పుకళాకారులు, చర్మకారులు, హిజ్రాలు, హెచ్‌ఐవీ బాధితులు, కళాకారులకు సంబంధించి పింఛన్ పెరిగింది. ఇప్పటి వరకు వీరందరికి రూ.3వేల పింఛన్ వస్తుండగా.. ఇప్పుడు ఆ పింఛన్‌ను రూ.4వేలకు పెంచుతూ సంతకం చేశారుు. పెంచిన పింఛన్ ఏప్రిల్ నుంచి అమలు చేస్తున్నారు.. అంటే జులై 1న పింఛన్ వీరందరికి రూ.7వేల (జులై 1న ఇచ్చే రూ.4 వేలతో పాటుగా మూడు నెలలలకు పెంచిన రూ.వెయ్యి కలిపి) లెక్కన అందజేస్తారు

అలాగే దివ్యాంగులకు ప్రస్తుతం రూ.3 వేలు అందిస్తుండగా.. ఒకేసారి రూ.6 వేలకు పెంచారు. ఇక తీవ్ర అనారోగ్యం, అస్వస్థతతో మంచాన పడినవారికి.. వీల్‌ఛైర్‌లో ఉన్న వారికి అందే రూ.5 వేల పింఛను రూ.15 వేలకు పెంచుతూ నిర్ణయం తీసుకున్నారు. ఇటు గుండె మార్పిడి చేసుకున్న వారికి, కిడ్నీ, కాలేయం, డయాలసిస్‌ స్టేజ్‌కు ముందున్న కిడ్నీ వ్యాధిగ్రస్తులకు పింఛన్ కూడా పెంచారు. వీరికి రూ.5 వేలను రూ.10 వేలకు పెంచారు.. కుష్ఠుతో బాధపడుతున్నవారికి రూ.6 వేలు పింఛను అందజేస్తారు. వీరందరికీ పెంచిన మొత్తాన్ని జులై 1 నుంచి అందిస్తారు.

రాష్ట్రవ్యాప్తంగా మొత్తం 65.39 లక్షల మంది పింఛన్ లబ్ధిదారులు ఉన్నారు.. వీరికి పించన్లు అందజేసేందుకు ప్రస్తుతం నెలకు రూ.1,939 కోట్లు ఖర్చవుతోంది. కొత్త ప్రభుత్వం పెంచిన పింఛను అమలుకుగాను జులై నెలకు రూ.4,408 కోట్లు (ఏప్రిల్‌ నుంచి ఇచ్చే ఎరియర్స్‌ మొత్తం రూ.1,650 కోట్లు కలిపి) అవుతోంది. ఆగస్టు నుంచి మాత్రం నెలకు రూ.2,758 కోట్లు అవసరం అవుతుంది. అంటే మొత్తంగా ఏడాదికి రూ.33,099 కోట్లు వ్యయం అవుతుందని అంచనా వేశారు అధికారులు.

ఉమ్మడి రాష్ట్రంలో మొత్తం సామాజిక పింఛన్లు 69 లక్షలు ఇచ్చారు. ఆంధ్రప్రదేశ్ విభజన తర్వాత ఏపీలో 35.32 లక్షలు పంపిణీ చేశారు.. 2014 అక్టోబరులో అప్పటి చంద్రబాబు ప్రభుత్వం కొత్తగా 3.72 లక్షల పెన్షన్లను మంజూరు చేశారు. ఇక 2014 డిసెంబరు 1న మరో 3.46 లక్షల పెన్షన్లు మంజూరు చేస్తూ జీవోను ఇచ్చారు. అలాగే 2015 ఏప్రిల్‌లో ట్రాన్స్‌జెండర్లకు పింఛన్లు మంజూరు చేసింది అప్పటి ప్రభుత్వం. 2015 జూన్‌లో మరో 1.50 లక్షల పింఛన్లు ఇచ్చారు. చంద్రబాబు ఐదేళ్ల కాలంలో మొత్తం 19 లక్షలకు పైగా పెన్షన్లు మంజూరు చేశారు.