చంద్రబాబు గొప్పమనసు.. ఆరుద్ర కుమార్తెకు పింఛన్, రూ.5 లక్షలు

ఆంధ్రప్రదేశ్ ముఖ్యమంత్రి నారా చంద్రబాబు నాయుడు.. తన గొప్ప మనసు చాటుకున్నారు. కాకినాడకు చెందిన ఆరుద్ర అనే మహిళకు అండగా ఉంటానంటూ భరోసా ఇచ్చారు. వెన్ను సమస్యతో ఇబ్బంది పడుతూ కుర్చీకే పరిమితమైన ఆరుద్ర కుమార్తెకు చికిత్స కోసం రూ.5 లక్షలతో పాటుగా నెలనెలా రూ.10 వేలు పింఛన్ అందిస్తామని హామీ ఇచ్చారు. శుక్రవారం సచివాలయంలో తనను కలిసిన ఆరుద్రకు చంద్రబాబు భరోసా కల్పించారు. అంతకుముందు తన కుమార్తెను వెంటబెట్టుకుని సచివాలయానికి వచ్చిన ఆరుద్ర ముఖ్యమంత్రిని కలిసేందుకు వచ్చారు. ఈ విషయం తెలిసి వారిని లోనికి తీసుకురావాల్సిందిగా ఆదేశించిన చంద్రబాబు.. వారితో మాట్లాడి భరోసా అందించారు. ఈ సందర్భంగా గత ప్రభుత్వంలో తాను ఎదుర్కొన్న సమస్యలు, వేధింపులను ఆరుద్ర చంద్రబాబుకు వివరించారు. ఇవన్నీ ఓపికగా విన్న చంద్రబాబు ఆస్తి వివాదాలను సైతం పరిష్కరించేందుకు కృషి చేస్తామని హామీ ఇచ్చారు.

కాకినాడ జిల్లా రాయుడుపాలెనికి చెందిన ఆరుద్రకు.. సాయిలక్ష్మీ చంద్ర అనే కుమార్తె ఉంది. వెన్నులో కణితి ఏర్పడటంతో ఆమె కొంతకాలంగా కుర్చీకే పరిమితమైంది. ఇక కన్నకూతురి చికిత్స కోసం ఎంతో డబ్బు ఖర్చుచేసిన ఆరుద్ర.. చివరకు ఇంటిని అమ్మేందుకు ప్రయత్నించింది. అయితే అప్పట్లో తన ఆస్తిని అమ్ముకోనివ్వకుండా కొంతమంది అడ్డుపడుతున్నారంటూ పలుసార్లు ఆమె ఆరోపణలు చేశారు. దీనిపై కోర్టులను కూడా ఆశ్రయించారు. చంద్రబాబు సీఎంగా బాధ్యతలు స్వీకరించిన నేపథ్యంలో ఆయనను కలిసి తన గోడు వెళ్లబోసుకున్నారు. అమలాపురంలో తన స్థలం విక్రయంలో ఇప్పటికీ ఇబ్బందులకు గురిచేసి కోర్టుల చుట్టూ తిప్పుతున్నారని సీఎం ఎదుట ఆవేదన వ్యక్తం చేశారు.

 ఆరుద్ర బాధలను విన్న సీఎం చంద్రబాబు నాయుడు.. ఆదుకుంటామంటూ హామీ ఇచ్చారు. అనారోగ్యంతో బాధపడుతున్న సాయిలక్ష్మీ చంద్రకు ప్రతి నెలా రూ.10 వేల పెన్షన్ అందించనున్నట్లు తెలిపారు. కోర్టులో ఉన్న స్థల వివాదంపై ప్రభుత్వ పరంగా ఎంత వరకు సాయం చేయవచ్చు అనేది కూడా పరిశీలించి అండగా ఉంటామని హామీ ఇచ్చారు. మరోవైపు చంద్రబాబు ఇచ్చిన భరోసాతో ఆరుద్ర సంతోషం వ్యక్తం చేశారు. గతంలో తన సమస్యను అప్పటి సిఎం దృష్టికి తీసుకెళ్లేందుకు తాడేపల్లి క్యాంపు కార్యాలయం వద్ద ప్రయత్నించగా స్పందించలేదని అన్నారు. చంద్రబాబు స్పందించిన తీరుపై ఆనందం వ్యక్తం చేశారు.