బహిర్భూమి కోసం బయటకు వెళ్లి.. రైల్వే ట్రాక్‌పై నిర్జీవంగా యువతి.. చీరాలలో దారుణం

ఆంధ్రప్రదేశ్‌లోని బాపట్ల జిల్లాలో దారుణ ఘటన చోటుచేసుకుంది. బహిర్భూమికి అని తెల్లవారుజామునే ఇంటి నుంచి బయటకు వెళ్లిన యువతి.. అనుమానాస్పద స్థితిలో శవమై తేలింది. తెల్లారే సమయంలో రైల్వే ట్రాక్ వైపు బహిర్భూమి కోసం వెళ్లిన 21 ఏళ్ల యువతి.. ఆ తర్వాత విగత జీవిగా కనిపించింది. ఎంతకూ ఇంటికి తిరిగి రాకపోవటంతో ఆందోళనకు గురైన కుటుంబసభ్యులు.. చుట్టుపక్కల గాలించారు. ఈ సమయంలోనే రైల్వే ట్రాక్ మీద అనుమానాస్పద స్థితిలో యువతి ముృతదేహం స్థానికుల కంటబడింది. ఈ ఘటన స్థానికంగా కలకలం రేపగా.. యువతిపై అత్యాచారం జరిగి ఉండొచ్చనే అనుమానాలు వ్యక్తమవుతున్నాయి. పోలీసులు కేసు నమోదు చేసుకుని దర్యాప్తు చేపట్టారు.

అసలు వివరాల్లోకి వెళ్తే.. చీరాల మండలం ఈపురుపాలెనికి చెందిన 21 ఏళ్ల యువతి శుక్రవారం ఉదయం బహిర్భూమి కోసమని ఇంటి నుంచి బయటకు వచ్చింది. ఉదయం గం. 5:45 నిమిషాలకు స్థానికంగా ఉన్న హైస్కూలు వెనుకవైపు ఉన్న రైల్వే ట్రాక్ వద్దకు వెళ్లింది. అయితే బహిర్భూమికని వెళ్లిన అమ్మాయి ఎంతకూ తిరిగి రాకపోవటంతో కుటుంబసభ్యులు ఆందోళనకు గురయ్యారు. చుట్టుపక్కల గాలించగా.. రైల్వే ట్రాక్ మీద యువతి మృతదేహాన్ని గుర్తించిన స్థానికులు కుటుంబసభ్యులకు సమాచారం అందించారు. అక్కడకు చేరుకున్న బాధిత యువతి తల్లిదండ్రులు వెంటనే పోలీసులకు సమాచారం ఇచ్చారు. ఘటనాస్థలికి చేరుకున్న పోలీసులు.. కేసు నమోదు చేసుకుని దర్యాప్తు ప్రారంభించారు.

 అయితే ఘటనాస్థలిని పరిశీలించిన పోలీసులు అత్యాచారం చేసి హత్య చేసి ఉండొచ్చని అనుమానిస్తున్నారు. ఐదు ప్రత్యేక బృందాలను ఏర్పాటుచేసి దర్యాప్తు జరుపుతున్నారు. మరోవైపు యువతి హత్య ఘటన రాష్ట్రవ్యాప్తంగా చర్చనీయాంశం కావటంతో సీఎం చంద్రబాబు నాయుడు సీరియస్‌గా తీసుకున్నారు. వెంటనే ఘటన జరిగిన ప్రాంతానికి వెళ్లి పరిస్థితిని సమీక్షించాలని, బాధిత కుటుంబానికి అండగా నిలవాలని హోం మంత్రి వంగలపూడి అనితను ఆదేశించారు. సీఎం ఆదేశాలతో ఈపురుపాలెం చేరుకున్న హోం మంత్రి.. ఘటన జరిగిన తీరుపై వివరాలను అడిగి తెలుసుకున్నారు. కుటుంబసభ్యులను పరామర్శించి ఆదుకుంటామని ధైర్యం చెప్పారు. ఘటనకు కారణమైన వారిని వదిలిపెట్టేది లేదని హెచ్చరించారు.

సీఎం ఆదేశాల నేపథ్యంలో పోలీసులు సైతం దర్యాప్తులో వేగం పెంచారు. ఐదు బృందాల ద్వారా కేసుపై దర్యాప్తు జరుపుతున్నారు.యువతిపై అత్యాచారం చేసి అనంతరం హత్య చేసినట్లుగా కేసు నమోదుచేసిన చీరాల పోలీసులు.. క్లూస్ టీం సహాయంతో చెప్పులు, బహిర్భూమికి వెళ్ళడానికి తెచ్చుకున్న వాటర్ బాటిల్, మృతురాలి బట్టలు సీజ్ చేశారు. కేసును సవాల్‌గా తీసుకుని అన్ని కోణాల్లో దర్యాప్తు జరుపుతున్నారు.