బడ్జెట్‌లో కేంద్రం గుడ్‌న్యూస్.. పన్ను రేట్ల తగ్గింపు.. వారి కోసం కొత్త టాక్స్ శ్లాబులు

వరుసగా మూడోసారి ఎన్టీయే ప్రభుత్వమే కేంద్రంలో అధికారం చేపట్టిన సంగతి తెలిసిందే. లోక్‌సభ ఎన్నికలకు ముందు ఓటాన్ అకౌంట్ బడ్జెట్‌ పార్లమెంటులో ప్రవేశపెట్టగా ఇప్పుడు ఇక పూర్తి స్థాయి బడ్జెట్‌పై అందరి దృష్టి నెలకొంది. ఓటాన్ బడ్జెట్‌లో అసలు కేంద్రం.. ఎలాంటి ఊరించే ప్రకటన చేయలేదు. ముందుగా ఎన్నో ఆశలు పెట్టుకున్న ఆదాయ పన్ను చెల్లింపుదారులకు మాత్రం నిరాశే ఎదురైంది. పన్ను శ్లాబులకు సంబంధించి ఎలాంటి వరాలు ప్రకటించలేదు. ఇప్పుడు బడ్జెట్‌ను వచ్చే నెలలో ప్రవేశపెట్టనుండగా.. కేంద్ర ప్రభుత్వం వారికి శుభవార్తలు అందించనున్నట్లు తెలుస్తోంది. ముఖ్యంగా అల్పాదాయ వర్గాల వారికి బెనిఫిట్ కలిగించేలా కేంద్రం నిర్ణయం ఉండొచ్చని తెలుస్తోంది.

వరుసగా మూడోసారి అధికారంలోకి వచ్చిన మోదీ సర్కార్.. ముఖ్యంగా అధిక సంఖ్యాకులుగా ఉన్నటువంటి అల్పాదా వర్గాలపైన పన్ను భారం తగ్గించాలని యోచిస్తోంది దీంతో వారిలో వస్తు వినిమయ వినియోగం పెరుగుతుందని భావిస్తోంది. అంటే వినియోగాన్ని పెంచే ఉద్దేశంతోనే ఇలాంటి చర్యలు తీసుకోబోతున్నట్లు వాదన వినిపిస్తోంది. 2024 బడ్జెట్‌లో భాగంగా.. అవసరమైతే వీరి కోసం కొత్త ఆదాయ పన్ను శ్లాబ్ కూడా ప్రవేశపెట్టనుందనే చర్చ నడుస్తోంది.

ప్రస్తుతానికి ఏడాదికి రూ. 5 నుంచి రూ. 15 లక్షలు సంపాదిస్తున్న వారు కొత్త ఆదాయ పన్ను విధానం ప్రకారం కనిష్టంగా 5 శాతం నుంచి గరిష్టంగా 20 శాతం వరకు పన్ను చెల్లిస్తున్నారు. అందుకే ఇప్పుడు అల్పాదాయ వర్గాల వారికి తక్కువ పన్ను రేట్లతో కొత్త శ్లాబ్ తెచ్చే యోచనలో ఉందని తెలుస్తోంది. దీనిపై క్లారిటీ రావాల్సి ఉంది. ప్రధానమంత్రి కార్యాలయం నుంచి ఆమోదం రావాల్సి ఉందని సమాచారం.

ఎక్కువ ఖర్చు చేసే అవకాశాలు ఉన్నటువంటి వినియోగదారుల వర్గానికి టాక్స్ తగ్గించే ప్రతిపాదనలపై కూడా ఆర్థిక మంత్రిత్వ శాఖ అధికారులు కసరత్తులు చేస్తున్నారు. మరోవైపు రైతుల కోసం కేంద్రం తీసుకొచ్చిన పీఎం కిసాన్ సమ్మాన్ నిధి యోజన కింద పంట సాయం పెంచే యోచనలో ఉందని తెలుస్తోంది. ప్రస్తుతం రైతులకు ఏటా 3 విడతల కింద రూ 6 వేలు అందిస్తోంది కేంద్రం. దీనిని రూ. 8 వేలుగా చేయొచ్చని తెలుస్తోంది. మహారాష్ట్ర, జమ్ముకశ్మీర్ సహా పలు రాష్ట్రాలకు త్వరలో అసెంబ్లీ ఎన్నికలు జరగనుండగా జనాకర్షక నిర్ణయాల్ని ప్రకటించనున్నట్లు తెలుస్తోంది.