‘మహా’ మార్పు.. తొలి మహిళా సీఎస్‌గా సుజాత సౌనిక్.. టాప్ బాస్‌లిద్దరూ మగువలే

మన పొరుగున ఉన్న మహారాష్ట్ర చీఫ్ సెక్రటరీగా సుజాత సౌనిక్ నియమితులయ్యారు. 1987 బ్యాచ్ ఐఏఎస్ అధికారి అయిన సుజాత.. 64 ఏళ్ల మహారాష్ట్ర చరిత్రలో తొలి మహిళా సీఎస్ కావడం విశేషం. మహారాష్ట్ర సెక్రటేరియట్ ‘మంత్రాలయ’లోని చీఫ్ సెక్రటరీ ఆఫీసులో నితీన్ కరీర్ నుంచి ఆమె బాధ్యతలు స్వీకరించారు. దీంతో సుజాత సౌనిక్ గూగుల్ ట్రెండ్స్‌లో నిలిచారు.

ఇంతకు ముందు చంద్ర అయ్యంగార్, చిత్కల జుత్షి, మేధా గాడ్గిల్ లాంటి ఐఏఎస్ అధికారిణులు చీఫ్ సెక్రటరీ అయ్యే అవకాశాన్ని కోల్పోయారు. అనేక కారణాల రీత్యా వీరి కంటే జూనియర్లయిన అధికారులను సీఎస్‌‌గా ఎంపిక చేయడంతో.. చీఫ్ సెక్రటరీగా పని చేసే అవకాశాన్ని ఈ ముగ్గురు అధికారిణులు కోల్పోయారు.

మూడుసార్లు చేజారిన ఛాన్స్..

సుజాత సౌనిక్‌ సైతం ఇంతకు ముందు మూడు పర్యాయాలు సీఎస్‌గా పని చేసే అవకాశాన్ని కొద్దిలో కోల్పోయారు. ఏప్రిల్ 2023 నాటికే మహారాష్ట్రలో సుజాత అత్యంత సీనియర్ ఐఏఎస్ ఆఫీసర్‌గా గుర్తింపు పొందారు. దీంతో ఆమెకు సీఎస్ బాధ్యతలు అప్పగించాల్సి ఉండగా.. సుజాత భర్త మనోజ్ సౌనిక్‌ వైపు సీఎం ఏక్‌నాథ్ షిండ్ మొగ్గు చూపారు. ఈ ఏడాది జనవరిలోనూ ఆమెను కాదని నితిన్ కరీర్‌ను చీఫ్ సెక్రటరీగా నియమించారు.

అయితే మార్చి చివరికి నితిన్ కరీర్ పదవీ కాలం ముగుస్తుండటంతో... అప్పుడు మిమ్మల్ని సీఎస్‌గా నియమిస్తాం అని మహారాష్ట్ర ప్రభుత్వం సుజాతకు గతంలో మాటిచ్చింది. కానీ అప్పటికే దేశంలో ఎన్నికల కోడ్ అమల్లోకి రావడంతో.. సీఎస్ నియామక వ్యవహారం ఎన్నికల సంఘం చేతుల్లోకి వెళ్లింది. దీంతో సుజాతతోపాటు మున్సిపల్ కమిషనర్‌గా పని చేసిన ఐఎస్ చాహల్, మరో అధికారి రాజేశ్ కుమార్ పేర్లను సీఎస్ పదవి కోసం ప్రభుత్వం ఎన్నికల సంఘానికి పంపించింది.

అప్పటికి సుజాత భర్త మనోజ్ సీఎం సలహాదారుగా ఉండటం, చాహల్ సీఎంవోలో పని చేస్తుండటం, రాజేశ్ కుమార్ అత్త గారు బీజేపీ ఎంపీ కావడంతో.. ఈ ముగ్గుర్నీ కాదని కరీర్ పదవీ కాలాన్ని ఈసీ మరో మూడు నెలలు పొడిగించింది. ఇలా మూడుసార్లు సీఎస్ అయ్యే అవకాశాన్ని కోల్పోయిన సుజాత సౌనిక్ ఎట్టకేలకు జూన్ 30న చీఫ్ సెక్రటరీగా బాధ్యతలు చేపట్టారు.

బాస్‌లిద్దరూ మహిళలే..

ఈ ఏడాది ఆరంభంలో మహారాష్ట్ర డీజీపీగా రష్మి శుక్లా నియమితులయ్యారు. ప్రస్తుతం సీఎస్‌గా సుజాత సౌనిక్ బాధ్యతలు చేపట్టడంతో అసెంబ్లీ ఎన్నికల ముంగిట మహారాష్ట్రలో టాప్-2 ప్రభుత్వ పదవుల్లో మహిళలే ఉన్నట్లయ్యింది. సీఎస్, డీజీపీ పదవుల్లో మహిళలను నియమించడం ద్వారా త్వరలోనే జరిగే అసెంబ్లీ ఎన్నికల్లో మహిళా శక్తి తమవైపు మొగ్గు చూపుతుందని షిండే సర్కారు ఆశిస్తోంది.

సుజాత కుటుంబమంతా బ్యూరోక్రాట్లే..

సుజాత సౌనిక్ బ్యూరోక్రాట్ల కుటుంబం నుంచి వచ్చారు. ఆమె భర్త బిహార్‌కు చెందిన ఐఏఎస్ అధికారి కాగా.. ఆమె తండ్రి సీడీ చీమా సైతం ఐఏఎస్ అధికారే. రిటైరైన తర్వాత ఆయన పంజాబ్ ఎలక్షన్ కమిషనర్‌గా పని చేశారు. ఆమె సోదరుడు గౌతమ్ చీమా పంజాబ్‌ పోలీసు విభాగంలో అడిషనల్ డీజీగా పని చేశారు. ఆమె ఇద్దరు ఆంటీలు ఐఏఎస్‌లుగా పని చేశారు. అంకుల్ ఏకేడీ జాదవ్ మహారాష్ట్ర అడిషనల్ చీఫ్ సెక్రటరీ (హోం)గా పని చేశారు. ఆమె తాతయ్య (అమ్మ తండ్రి) కర్తార్ సింగ్ కేంద్ర ప్రభుత్వ కార్యదర్శిగా పని చేయగా.. మరో అంకుల్ ప్రదీప్ సింగ్ ఇండియన్ ఫారిన్ సర్వీస్‌లో విధులు నిర్వర్తించారు.

ఔరంగాబాద్ జిల్లా అసిస్టెంట్ కలెక్టర్‌గా కెరీర్‌ను ప్రారంభించిన సుజాత.. జల్‌గావ్ కలెక్టర్‌గా, నాసిక్ మున్సిపల్ కమిషనర్‌గా బాధ్యతలు నిర్వర్తించారు. కొద్ది కాలం ఆమె కేంద్రంలో, విదేశాల్లోనూ పని చేశారు. మహారాష్ట్ర సెక్రటేరియల్‌లో హెల్త్ డిపార్ట్‌మెంట్, అడ్మినిస్ట్రేటివ్ రిఫార్మ్స్, స్కిల్ డెవలప్‌మెంట్, జనరల్ అడ్మినిస్ట్రేషన్ డిపార్ట్‌మెంట్ హెడ్‌గా ఆమె పని చేశారు.

ఐఏఎస్ అధికారిణిగా దాదాపు 40 ఏళ్ల అనుభవం ఉన్న సుజాతకు హెల్త్ కేర్, ఫైనాన్స్, ఎడ్యుకేషన్, విపత్తుల నిర్వహణ, ఐక్యరాజ్య సమితిలో వివిధ స్థాయిల్లో శాంతి నిర్వహణ తదితర విభాగాల్లో పని చేసిన అనుభవం ఉంది. వచ్చే ఏడాది జూన్‌లో రిటైర్ కానున్న సుజాత.. ఏడాదిపాటు మహారాష్ట్ర చీఫ్ సెక్రటరీగా వ్యవహరించనున్నారు.

గూగుల్ ట్రెండ్స్‌లో సుజాత సౌనిక్..

మహారాష్ట్ర తొలి మహిళా చీఫ్ సెక్రటరీగా బాధ్యతలు చేపట్టిన సుజాత సౌనిక్ గూగుల్ ట్రెండ్స్‌లో టాప్-5లో నిలిచారు. మహారాష్ట్రలో ఎక్కువ మంది ఆమె గురించి తెలుసుకోవడానికి ఆసక్తి చూపగా.. ఛండీగఢ్, రాజస్థాన్, గుజరాత్, బిహార్ రాష్ట్రాల ప్రజలు సైతం ఆమె గురించి తెలుసుకునేందుకు ఆసక్తి చూపారని గూగుల్ ట్రెండ్స్‌ను బట్టి అర్థమవుతోంది.