ఇంటికెళ్లి తిరిగిరాని సచివాలయ మహిళా ఉద్యోగి.. మొబైల్ సిగ్నల్స్ ట్రేస్ చేస్తే, మిస్టరీగా

నంద్యాలలో వార్డు సచివాలయ మహిళా ఉద్యోగి మృతి మిస్టరీగా మారింది. పట్టణంలోని నూనెపల్లెలో ఉన్న నివాసంలో అనుమానాస్పద స్థితిలో ప్రాణాలు కోల్పోయారు. ఉదయం పింఛన్లు పంపిణీ చేస్తూ మధ్యలో ఇంటికి వచ్చిన ఆమె బాత్‌రూమ్‌లో శవమై కనిపించడం అనుమానాలు కలుగుతున్నాయి. నంద్యాల 29వ వార్డు సచివాలయంలో సుధారాణి ప్లానింగ్ సెక్రటరీగా విధులు నిర్వహిస్తున్నారు. సోమవారం తెల్లవారుజామున సుధారాణి ప్రభుత్వం అందిస్తున్న ఎన్టీఆర్ భరోసా పింఛన్ డబ్బులు లబ్ధిదారులకు పంపిణీ చేసినందుకు ఇంటి నుంచి వెళ్లారు.

సుధారాణి లబ్ధిదారులకు పింఛన్‌లు పంపిణీ చేస్తూ.. ఏమైందో ఏమో మధ్యలోనే వెళ్లిపోయారు. అలా వెళ్లిపోయి.. ఎంతసేపటికి తిరిగి రాకపోవడంతో తోటి ఉద్యోగులు ఫోన్ ద్వారా సంప్రదించే ప్రయత్నం చేసినా స్పందించలేదు. ఆమె కోసం గాలించినా ఆచూకీ దొరకలేదు.. వెంటనే కుటుంబ సభ్యులకు సమాచారం ఇచ్చారు. వారు ఆమె భర్తకు చెప్పడంతో పోలీసులకు ఫిర్యాదు చేశారు. మొబైల్ సిగ్నల్స్ ఆధారంగా ఆమె పుట్టింట్లో ఉన్నట్లు గుర్తించారు. వెంటనే అక్కడికి చేరుకుని చూడగా సుధారాణి బాత్‌రూమ్‌లో ప్రాణాలు కోల్పోయి ఉన్నారు.

సుధారాణి గుండె పోటుతో మరణించారా.. కాలు జారి పడిపోయి ప్రాణాలు కోల్పోయారా అనే అనుమానాలు వ్యక్తం అవుతున్నాయి. సుధారాణి తల్లిదండ్రులు, భర్త ఇచ్చిన ఫిర్యాదుతో కేసు నమోదు చేసుకొని దర్యాప్తు చేస్తున్నారు. ఆమె మరణంపై కుటుంబ సభ్యులు అనుమానాలు వ్యక్తం చేస్తున్నారు. సుధారాణికి ఏడాది క్రితమే వివాహమైనట్లు తెలుస్తోంది. ఈ ఘటనకు సంబంధించి పూర్తి వివరాలు తెలియాల్సి ఉంది.

నకిలీ నోటీసులతో బెదరిస్తున్నారని ఫిర్యాదు

కర్నూలు జిల్లా ఎస్పీ కార్యాలయంలో సోమవారం ప్రజా ఫిర్యాదుల పరిష్కార వేదిక కార్యక్రమం నిర్వహించారు. జిల్లాలోని వివిధ ప్రాంతాల నుంచి వచ్చి ప్రజలు వారి సమస్యల్ని ఎస్పీకి విన్నవించారు. సోమవారం మొత్తం 76 వినతులు రాగా.. స్థానిక పోలీసు అధికారులకు స్టేషన్‌ల వారీగా అప్పగించారు. వీటిలో ఎక్కువశాతం మోసాలు చేసిన కేసులే ఉన్నాయి. ఉద్యోగాలు, ఇళ్లు ఇప్పిస్తామని చెప్పి మోసం చేసినట్లు పోలీసులకు ఫిర్యాదు చేయడం విశేషం. మరో వ్యక్తి దొంగ నోటీసులతో తనకు బెదిరింపులు వస్తున్నాయని ఫిర్యాదు చేశారు.