కేటీఆర్‌కు షాకిచ్చిన వైసీపీ ఎమ్మెల్యే ఓటమి

మాజీ మంత్రి, బీఆర్ఎస్ పార్టీ కార్యనిర్వాహక అధ్యక్షుడు కల్వకుంట్ల తారక రామారావు(కేటీఆర్).. ఏపీ రాజకీయాలపై స్పందించారు. అయితే కేటీఆర్ ఏపీ పాలిటిక్స్ మీద స్పందించడం కొత్తేమీ కాదు. మాజీ సీఎం కేసీఆర్ కూడా 2024 ఏపీ అసెంబ్లీ ఎన్నికలకు ముందు ఏపీ రాజకీయాలపై మాట్లాడారు. ఇంటర్వ్యూలలో ఏపీ ఎన్నికలలో వైసీపీకే ఎడ్జ్ ఉందని.. ఆ మేరకు తమకు సమాచారం వస్తోందంటూ కూడా కేసీఆర్, కేటీఆర్ ఇద్దరూ చెప్పుకొచ్చారు. ఇక ఏపీలో ఎన్నికలు ముగిశాయి. టీడీపీ కూటమి గ్రాండ్ విక్టరీ కొట్టి ప్రభుత్వా్న్ని ఏర్పాటు చేసింది. కేసీఆర్, కేటీఆర్ అంచనాలను, జోస్యాలను తలకిందులు చేస్తూ టీడీపీ కూటమికి 164 ఎమ్మెల్యే సీట్లు, 21 ఎంపీ సీట్లు వచ్చాయి. వైఎస్ జగన్ నేతృత్వంలోని వైసీపీకి కేవలం 11 ఎమ్మెల్యే, 4 ఎంపీ సీట్లకు పరిమితమైంది. 2019 ఎన్నికల్లో 151 చోట్ల గెలిచిన వైసీపీ, 11 సీట్లకు పరిమితం కావటం రాజకీయ వర్గాలను సైతం విస్మయపరిచింది.

ఇప్పుడీ విషయం ఎందుకంటే మాజీ మంత్రి కేటీఆర్.. ఏపీ రాజకీయాలపై మళ్లీ మాట్లాడారు. ఓ వైసీపీ ఎమ్మెల్యే ఓటమి తనను ఆశ్చర్యపరిచిందని కేటీఆర్ చెప్పుకొచ్చారు. ఢిల్లీలో మీడియాతో చిట్ చాట్ నిర్వహించిన కేటీఆర్.. ఏపీ ఎన్నికల ఫలితాలపై స్పందించారు. ఏపీలో వైసీపీ ఓటమి ఆశ్చర్యం కలిగించిందన్న కేటీఆర్.. వైసీపీ ఓడిపోయినా కూడా 40 శాతం ఓట్లు రావడం సాధారణ విషయం కాదన్నారు. ఈ సందర్భంగానే ధర్మవరం మాజీ ఎమ్మెల్యే, వైసీపీ నేత కేతిరెడ్డి వెంకటరామిరెడ్డి ఓటమిపైనా కేటీఆర్ స్పందించారు. ఎప్పుడూ ప్రజల్లో ఉండే కేతిరెడ్డి ధర్మవరంలో ఓడిపోవటం తనకు అర్థం కావడం లేదని.. ఈ ఫలితాలు తనకు షాక్ గురిచేశాయని చెప్పారు.

ఒక్క కేటీఆర్‌కే కాదు.. చాలా మంది రాజకీయ విశ్లేషకులకు సైతం ధర్మవరం ఓటర్లు తీర్పు అంతుబట్టలేదు. ఎందుకంటే గుడ్ మార్నింగ్ ధర్మవరం అంటూ కేతిరెడ్డి వెంకటరామిరెడ్డి చేపట్టిన కార్యక్రమం ఎంతలా ఫేమస్ అంటే ప్రత్యేకంగా చెప్పాల్సిన పనిలేదు. గుడ్ మార్నింగ్ ధర్మవరం కార్యక్రమంతో ఆయన రెండు తెలుగు రాష్ట్రాల్లో ఫేమస్ అయ్యారు. ప్రజల సమస్యలకు స్పాట్ లోనే పరిష్కారం చూపేందుకు ఆయన చేపట్టిన ఈ గుడ్ మార్నింగ్ ధర్మవరం కేతిరెడ్డికి సోషల్ మీడియాలో ఎక్కడలేని ఫాలోయింగ్ తెచ్చిపెట్టింది. దీంతో మూడోసారి ఎమ్మెల్యే కావటం పక్కా అనే ధీమాతో కేతిరెడ్డి ఉండేవారు.

అయితే ఏపీ అసెంబ్లీ ఎన్నికల్లో కేతిరెడ్డికి షాక్ తగిలింది. ఎన్నికలకు కేవలం 40 రోజుల ముందు ధర్మవరం నియోజకవర్గానికి వచ్చిన బీజేపీ అభ్యర్థి సత్యకుమార్ యాదవ్.. కేతిరెడ్డిపై విజయం సాధించారు. హోరాహోరీ పోరులో కేతిరెడ్డి వెంకటరామిరెడ్డిపై 3,734 ఓట్ల మెజారిటీతో సత్యకుమార్ యాదవ్ గెలుపొందారు. అనంతరం చంద్రబాబు మంత్రివర్గంలోనూ చోటు సంపాదించారు. అయితే కేతిరెడ్డి ఓటమికి అవినీతి ఆరోపణలతో పాటు సామాజిక సమీకరణాలు కూడా కారణమయ్యాయని చెప్పొచ్చు. సత్యకుమార్ యాదవ్ బీసీ అభ్యర్థి కావటం.. ధర్మవరం పట్టణంలో బీసీల ఓట్లు అధికంగా ఉండటం కూడా ఆయనకు కలిసి వచ్చింది. ఇవన్నీ పక్కనబెడితే కేతిరెడ్డి ఓటమికి కేటీఆర్ కూడా షాక్ తిన్నానని చెప్పడం ఇప్పుడు హాట్ టాపిక్‌గా మారింది.