ఇదేరా ప్రేమంటే... భార్యపై ప్రేమతో రోజూ 320 కి.మీ.లు ప్రయాణిస్తున్న భర్త

ప్రేమంటే ఇదేరా అని నిరూపిస్తున్నాడు ఓ చైనా యువకుడు. భార్య కోసం ఓ వ్యక్తి ప్రతిరోజూ 320 కిలోమీటర్ల ప్రయాణం చేస్తున్నాడు. ఈ విషయాన్ని స్వయంగా ఆయనే సోషల్ మీడియా వేదికగా వెల్లడించడంతో.. ఈ విషయం కాస్తా తెగ వైరల్ అవుతోంది. నిత్యం ఆఫీస్‌కు వెళ్లి.. తిరిగి ఇంటికి రావడానికి 320 కిలోమీటర్లు ప్రయాణిస్తున్నట్లు తెలిపాడు. అయితే వీరికి ఇటీవలె పెళ్లి కావడం గమనార్హం. వారు ఉండే ఇంటి నుంచి ఆఫీస్ చాలా దూరం కాగా.. ఎన్నో వ్యయ ప్రయాసలకు ఓర్చి.. నిత్యం వందల కిలోమీటర్లు ప్రయాణం చేస్తున్నాడు. 7 ఏళ్లుగా ప్రేమించిన భార్యను ఇటీవలె పెళ్లి చేసుకున్న ఆ వ్యక్తి.. తన భార్య కోసం రోజూ అంత దూరం ప్రయాణిస్తున్నాడు. ఈ సంఘటన చైనాలో జరిగింది.

చైనాలోని వైఫాంగ్‌లో ఉండే లిన్ షు అనే వ్యక్తి.. తాజాగా సోషల్ మీడియాలో పెట్టిన పోస్ట్‌కు నెటిజన్ల నుంచి ప్రశంసల వర్షం కురుస్తోంది. తనకు కొన్ని రోజుల క్రితమే పెళ్లి అయిందని.. అయితే పెళ్లి తర్వాత ఆఫీస్‌కు వెళ్లి తిరిగి ఇంటికి వెళ్లేందుకు నిత్యం వందల కిలోమీటర్లు ప్రయాణం చేస్తున్నట్లు అతడు వెల్లడించాడు. 7 ఏళ్ల క్రితం తన భార్యను మొదటిసారిగా కలిశానని.. అప్పటి నుంచి ఇద్దరం ప్రేమించుకున్నట్లు తెలిపాడు. చివరికి ఇన్నేళ్లకు పెళ్లి చేసుకున్నట్లు వివరించాడు. అయితే పెళ్లి తర్వాత తన ఉద్యోగం కోసం రోజూ 320 కిలోమీటర్లు వెళ్లి వస్తున్నట్లు చెప్పాడు. ప్రేమించి తన భార్యను పెళ్లి చేసుకున్నందుకు.. ఆమెను కంటికి రెప్పలా చూసుకునేందుకు ఇదంతా చేస్తున్నట్లు తెలిపాడు. ఇదంతా ప్రేమేనంటూ లిన్ షు చేసిన వీడియో ఇప్పుడు నెట్టింట తెగ వైరల్‌గా మారింది.

తాను రోజూ ఉదయం 5 గంటలకు నిద్ర లేస్తానని లిన్ షు వెల్లడించాడు. చకచకా రెడీ అయి.. 5.20 గంటలకు ఇంటి నుంచి బయల్దేరతానని చెప్పాడు. 6.15 గంటలకు రైల్వేస్టేషన్‌కు చేరుకుంటానని.. వైఫాంగ్‌ నుంచి బయల్దేరి 7:46 గంటలకు కింగ్‌డావోకు చేరుకుంటానని తెలిపాడు. అక్కడినుంచి 15 నిమిషాల పాటు భూగర్భ సబ్‌వేలో ప్రయాణించి ఆఫీస్‌కు చేరుకుంటానని లింగ్ షు పేర్కొన్నాడు. తన ఫ్లాట్ వైఫాంగ్‌లో ఉందని.. ఇక తన భార్య స్వస్థలం కూడా అదేనని వెల్లడించాడు. దీంతో ఆమె అక్కడే సురక్షితంగా ఉంటుందనే ఆలోచనతోనే తాను ఇన్ని వందల కిలోమీటర్లు ప్రయాణిస్తున్నట్లు చెప్పాడు.

ఇక తన భార్య కూడా కింగ్‌డావోలో ఉద్యోగం చేసేందుకు.. జాబ్ కోసం ప్రయత్నాలు చేస్తోందని వివరించాడు. దీంతో ఆమెకు కింగ్‌డావోలో ఉద్యోగం వచ్చేవరకు మాత్రమే ఈ కష్టాలు, సుదీర్ఘ ప్రయాణం ఉంటుందని.. ఇది తాత్కాలికమేనని తెలిపాడు. ఇద్దరికీ కింగ్‌డావోలో ఉద్యోగం వచ్చిన తర్వాత కొంత డబ్బును సంపాదించిన.. అప్పుడు ఆఫీస్‌కు దగ్గరలో ఇల్లు కొనుగోలు చేయాలని నిర్ణయించుకున్నట్లు లిన్ షు పేర్కొన్నాడు.

ఇక లిన్‌ షు చేసిన పోస్ట్‌ వైరల్‌ కావడంతో నెటిజన్లు మొదట ఆశ్చర్యం వ్యక్తం చేశారు. తర్వాత భార్య కోసం లిన్ షు చేస్తున్న ప్రయత్నాన్ని కొనియాడుతూ పోస్ట్‌లు పెడుతున్నారు. ప్రేమ ఏమైనా చేయిస్తుంది.. ఎంత దూరమైనా తీసుకువెళ్తుంది అనడానికి ఇదే నిదర్శనం అని నెటిజన్లు పేర్కొంటున్నారు. ఇలాంటివారు చాలామంది ప్రతి రోజూ ఆఫీస్ నుంచి రెండు, మూడు గంటలు ప్రయాణించి ఇంటికి చేరుకుంటారని.. ఇతడు మాత్రం ఇన్ని వందల కిలోమీటర్లు ప్రయాణించడం గ్రేట్ అంటూ ప్రశంసలు గుప్పిస్తున్నారు.