ఏపీ అసెంబ్లీ సమావేశాలు,,,ల్యాండ్ టైటిలింగ్ యాక్ట్ రద్దు బిల్లు ఆమోదం

ఏపీ శాసనసభలో ఏపీ ప్రభుత్వం ల్యాండ్ టైటిలింగ్ యాక్ట్ రద్దు, హెల్త్ వర్సిటీ పేరు మార్పు బిల్లులను అసెంబ్లీలో ప్రవేశపెట్టింది. ఈ రెండు బిల్లులను శాసనసభ ఏకగ్రీవంగా ఆమోదించింది. అయితే ఈ సందర్భంగా ఆసక్తికర పరిణామం చోటుచేసుకుంది. ఈ రెండు బిల్లులు ఏకగ్రీవంగా ఆమోదం పొందినట్లు ఏపీ అసెంబ్లీ స్పీకర్ చింతకాయల అయ్యన్నపాత్రుడు సభలో ప్రకటించారు. ఈ సందర్భంగా ఆయన ఎలాంటి ఆంగ్లపదాన్ని ఉపయోగించకుండా తెలుగులోనే ఈ ప్రకటన చేయడం విశేషం. దీంతో సభ్యులు కూడా స్పీకర్‌ చింతకాయల అయ్యన్నపాత్రుడిని అభినందించారు.

ఇక బిల్లుల సంగతికి వస్తే.. ఏపీ ఎన్నికల సమయంలో ల్యాండ్ టైటిలింగ్ యాక్ట్ ఎంతగా చర్చనీయాంశమైందో ప్రత్యేకంగా చెప్పాల్సిన పనిలేదు. వైసీపీ ఓటమికి గల కారణాల్లో ఇది కూడా ఒకటని రాజకీయ విశ్లేషకులు చెప్తుంటారు. ల్యాండ్ టైటిలింగ్ యాక్ట్ ద్వారా పేద ప్రజల భూములపై హక్కులను తీసేసుకుంటారంటూ అప్పట్లో టీడీపీ సహా కూటమి నేతలు ఆరోపించారు. ఇది ల్యాండ్ టైటిలింగ్ యాక్ట్ కాదని.. ల్యాండ్ గ్రాబింగ్ యాక్ట్ అంటూ పెద్దఎత్తున ప్రచారం చేశారు. ఈ క్రమంలోనే తాము అధికారంలోకి వస్తే ల్యాండ్ టైటిలింగ్ యాక్ట్ రద్దు చేస్తామని చంద్రబాబు అప్పట్లో హామీ ఇచ్చారు.

ఎన్నికల ప్రచారంలో ఇచ్చిన హామీ మేరకు అధికారంలోకి రాగానే చంద్రబాబు ల్యాండ్ టైటిలింగ్ యాక్ట్ రద్దు మీద నిర్ణయం తీసుకున్నారు. సీఎంగా బాధ్యతలు స్వీకరించిన తర్వాత చేసిన ఐదు సంతకాల్లో ఇది కూడా ఒకటి. ఆ తర్వాత మంత్రివర్గ సమావేశంలో ల్యాండ్ టైటిలింగ్ యాక్ట్ రద్దుకు ఆమోదం తెలిపిన మంత్రివర్గం.. ఇవాళ సభలో ప్రవేశపెట్టింది. సభ ఏకగ్రీవంగా ఈ బిల్లుకు ఆమోదం తెలిపింది. ఇక హెల్త్ యూనివర్సిటీ పేరు మార్పు బిల్లు విషయానికి వస్తే.. ఆరోగ్య విశ్వవిద్యాలయానికి ఎన్టీఆర్ పేరు ఉండేది.

అయితే గత వైసీపీ ప్రభుత్వం హెల్త్ వర్సిటీ పేరును వైఎస్ఆర్ హెల్త్ వర్సిటీగా మార్చింది. దీనిపై అప్పట్లో పెద్దఎత్తున విమర్శలు వచ్చాయి. టీడీపీ సైతం తీవ్రంగా ఖండించింది. అయితే తిరిగి తాము అధికారంలోకి రావటంతో హెల్త్ వర్సిటీ పేరును ఎన్టీఆర్ హెల్త్ వర్సిటీగా పునరుద్ధరిస్తూ బిల్లు ప్రవేశపెట్టింది. దానికి ఏపీ అసెంబ్లీ ఏకగ్రీవంగా ఆమోదం తెలిపింది. మరోవైపు మంగళవారం నాటి సభకు వైసీపీ ఎమ్మెల్యేలు ఎవరూ హాజరు కాలేదు.