ఒకే నెలలో రెండుసార్లు గరుడ వాహనంపై శ్రీవారు,,,షెడ్యూల్ విడుదల
Andhra Pradesh Telugu | Suryaa Desk | Published : Sun, Jul 28, 2024, 08:01 PM
ఆగస్టు నెలలో తిరుమలలో జరిగే విశేష ఉత్సవాలకు సంబంధించిన షెడ్యూలును టీటీడీ విడుదల చేసింది. ఈ షెడ్యూల్ ప్రకారం ఆగస్టు 4న శ్రీ చక్రత్తాళ్వార్ వర్ష తిరునక్షత్రం, శ్రీ ప్రతివాది భయంకర అణ్ణంగరాచార్య వర్ష తిరునక్షత్రం కార్యక్రమాలు నిర్వహిస్తారు. ఆగస్టు 7న ఆండాళ్ తిరువాడిపురం శాత్తుమొర, శ్రీవారు పురిశైవారి తోటకు వేంచేసే కార్యక్రమం ఉంటుంది. ఆగస్టు 9న గరుడ పంచమిని పురస్కరించుకుని తిరుమలలో శ్రీవారి గరుడ సేవను నిర్వహిస్తారు.ఆగస్టు 10న కల్కి జయంతి, 13న తరిగొండ వెంగమాంబ వర్ధంతి కార్యక్రమాలు ఉంటాయి.
మరోవైపు ఆగస్టు 14న తిరుమలలో శ్రీవారి పవిత్రోత్సవాలకు అంకురార్పణ కార్యక్రమం ఉంటుందని టీటీడీ తెలిపింది. ఆగస్ట్ 15వ తేదీన భారత స్వాతంత్ర్య దినోత్సవంతోపాటుగా స్మార్త ఏకాదశిని నిర్వహిస్తారు. ఇక అదే రోజు నుంచి తిరుమల శ్రీవారి ఆలయంలో పవిత్రోత్సవాలు ఆరంభమవుతాయి.ఆగస్టు 16న వరలక్ష్మీ వ్రతం. నారాయణగిరిలో ఛత్రస్థాపనోత్సవం కార్యక్రమాలు నిర్వహిస్తారు. ఆగస్టు 19న శ్రావణ పౌర్ణమి సందర్భంగా తిరుమలలో పౌర్ణమి గరుడ సేవ నిర్వహిస్తారు. అలాగే రాఖీ పండుగ, హయగ్రీవ జయంతి, విఖ‌న‌స మ‌హాముని జయంతి కార్యక్రమాలు ఉంటాయి. ఆగస్టు 20వ తేదీన శ్రీవారు విఖనసాచార్య స్వామి సన్నిధికి వేంచేస్తారు. 27న శ్రీ‌కృష్ణాష్టమి పర్వదినంతో పాటుగా, శ్రీవారి ఆలయంలో ఆస్థానం కార్యక్రమం ఉంటుంది. ఆగస్టు 28న శ్రీవారి శిక్యోత్సవం నిర్వహించినున్నట్లు టీటీడీ ఓ ప్రకటనలో తెలిపింది. తిరుమలకు వచ్చే శ్రీవారి భక్తులు ఈ కార్యక్రమాలను కూడా పరిగణనలోకి తీసుకోవాలని సూచించింది.
|
|