రెండేళ్ల తర్వాత అద్భుత దృశ్యం,,శ్రీశైలం ప్రాజెక్టు గేట్లు ఎత్తిన అధికారులు

ఎగువ నుంచి భారీగా వరద ప్రవాహం వస్తూ ఉండటంతో అధికారులు శ్రీశైలం ప్రాజెక్టు గేట్లు ఓపెన్ చేశారు. శ్రీశైలం ప్రాజెక్టు మూడు గేట్లను 10 అడుగుల మేరకు ఎత్తి నీటిని దిగువకు విడుదల చేశారు. కర్నూలు చీఫ్ ఇంజినీర్ కబీర్ భాషా మూడు గేట్లను ఎత్తి నీటిని దిగువకు విడుదల చేశారు. ప్రాజెక్టులోని ఆరు. ఏడు, ఎనిమిదో నంబర్ గేట్లను ఎత్తిన నీటిపారుదల శాఖ అధికారులు.. 81 వేల క్యూసెక్కుల నీటిని నాగార్జున సాగర్‌కు విడుదల చేశారు. ఒక్కో గేటు నుంచి 27 క్యూసెక్కుల చొప్పున.. మొత్తం 81 క్యూసెక్కుల నీరు పరవళ్లు తొక్కుతూ ప్రవహిస్తోంది. మరోవైపు ఈ సుందర దృశ్యాన్ని వీక్షించడానికి పర్యాటకులు పెద్ద ఎత్తున అక్కడకు చేరుకున్నారు.

పర్యాటకులు, శ్రీశైలం మల్లన్నను చూడటానికి వచ్చిన భక్తులతో ఘాట్ రోడ్డు నిండిపోయింది. పరవళ్లు తొక్కుతూ కృష్ణమ్మ ప్రవహిస్తుంటే సందర్శకులు కెమెరాల్లో బంధిస్తూ ఉండిపోయారు. మరోవైపు గతంలో 2022లో శ్రీశైలం ప్రాజెక్టు గేట్లు ఎత్తి నీటిని విడుదల చేశారు. అప్పటి ఏపీ జలవనరుల శాఖ మంత్రి అంబటి రాంబాబు మూడు గేట్లను ఎత్తి నల్గొండ జిల్లాలోని నాగార్జునసాగర్ ప్రాజెక్టుకు నీటిని విడుదల చేశారు. తాజాగా రెండేళ్ల తర్వాత శ్రీశైలం ప్రాజెక్టు నిండుకుండలా మారడంతో నీటిని విడుదల చేశారు.

శ్రీశైలం ప్రాజెక్టు పూర్తిస్థాయి నీటిమట్టం 885 అడుగులు కాగా.. ఎగువన కురుస్తున్న వర్షాల కారణంగా ప్రాజెక్టులో నీటిమట్టం 878.40 అడుగులకు చేరింది. జూరాల, సుంకేసుల నుంచి శ్రీశైలానికి భారీగా వరద నీరు వచ్చి చేరుతోంది. ఇక శ్రీశైలం ప్రాజెక్టు పూర్తిస్థాయి నీటి నిల్వ సామర్థ్యం 215.80 టీఎంసీలు. అయితే నీటి నిల్వ సామర్థ్యం కూడా జులై 29వ తేదీ నాటికి 179.89 టీఎంసీలకు చేరింది. దీనికి తోడు ఎగువ నుంచి భారీగా వరద ప్రవాహం వస్తూ ఉండటంతో కర్నూలు చీఫ్ ఇంజినీర్ కబీర్ బాషా మూడు గేట్లను ఎత్తి నీటిని విడుదల చేశారు.