అడవిలో గొలుసుతో కట్టేసి.. ఎన్ని రోజులైందో?

మహారాష్ట్రలో సింధుదుర్గ్ జిల్లాలోని ఓ అడవిలో చావు బతుకుల మధ్య కొట్టుమిట్టాడుతున్న ఓ 50 ఏళ్ల మహిళ కనిపించడం తీవ్ర సంచలనంగా మారింది. చెట్టుకు గొలుసులతో కట్టేసి ఉన్న ఆ మహిళను చూసిన ఓ గొర్రెల కాపరి ఇచ్చిన సమాచారంతో అక్కడికి చేరుకున్న పోలీసులు.. వెంటనే ఆమెను ఆస్పత్రికి తరలించారు. ప్రస్తుతం డాక్టర్లు ఆమెకు చికిత్స అందిస్తుండగా.. ప్రాణాలకు ఏమీ ప్రమాదం లేదని చెప్పడంతో అంతా ఊపిరి పీల్చుకున్నారు. దీంతో ఇంతకీ ఆమె ఎవరు.. అక్కడికి ఎలా వెళ్లింది అనే కోణంలో పోలీసులు దర్యాప్తు కొనసాగిస్తున్నారు. అయితే ఆమె వద్ద లభించిన కొన్ని పత్రాల ఆధారంగా పోలీసులు విచారణ జరుపుతున్నారు.

ముంబైకి 450 కిలోమీటర్ల దూరంలో ఉన్న సింధుదుర్గ్ జిల్లాలోని సోనుర్లీ గ్రామంలో శనివారం సాయంత్రం.. అటవీ ప్రాంతంలో గొర్రెలు మేపుతున్న ఓ వ్యక్తికి.. చెట్టుకు కట్టేసి.. దీనావస్థలో ఉన్న మహిళ కనిపించింది. దీంతో అతడు పోలీసులకు సమాచారం అందించాడు. ఆ మహిళ వద్ద అమెరికా పాస్‌పోర్టుకు సంబంధించిన ఫోటో కాపీతోపాటు తమిళనాడు అడ్రస్‌తో ఉన్న ఆధార్ కార్డు.. ఇతర పత్రాలు పోలీసులు స్వాధీనం చేసుకున్నారు. వెంటనే ఆమెను మొదట మహారాష్ట్రలోని కొంకణ్ రీజియన్‌లో ఉన్న సవాంత్‌వాడీలోని ఆస్పత్రికి తరలించారు. ఆ తర్వాత సింధుదుర్గ్‌లోని ఓరోస్ ఆస్పత్రిలో చేర్పించారు. అనంతరం ఆమె మానసిక, ఆరోగ్య పరిస్థితి ఆధారంగా గోవా మెడికల్ కాలేజీకి మెరుగైన చికిత్స కోసం పంపించారు.

  ప్రస్తుతం ఆమె ప్రాణాలకు ఎలాంటి ముప్పు లేదని.. ఆమె సైకియాట్రిక్ సమస్యలతో బాధపడుతుందని గుర్తించారు. అయితే ఆమె వద్ద తమిళనాడు అడ్రస్‌తో ఉన్న ఆధార్ కార్డు, అమెరికా పాస్‌పోర్టుకు సంబంధించిన ఫోటో కాపీ ఉన్నట్లు అధికారులు తెలిపారు. వాటి ఆధారంగా ఆమె పేరు లలితా కాయి అని గుర్తించారు. ఆమె వీసా గడువు ముగిసిందని చెప్పారు. ఆమె ఏ దేశానికి చెందిన వారు అని తెలుసుకునేందుకు ఆ పత్రాలను వెరిఫై చేస్తున్నట్లు వివరించారు. విదేశీయుల రీజినల్ రిజిస్ట్రేషన్ అధికారులతో పోలీసులు సంప్రదింపులు జరుపుతున్నారు.

గత 10 ఏళ్లుగా ఆమె భారత్‌లోనే నివసిస్తోందని.. పోలీసులు ప్రాథమిక దర్యాప్తులో తేలింది. అయితే ఆమె ఎలాంటి వివరాలు అందించలేని పరిస్థితుల్లో ఇప్పుడు ఉందని పోలీసులు వెల్లడించారు. కొన్ని రోజులుగా ఆమె ఎలాంటి ఆహారం తీసుకోకపోవడం, భారీ వర్షాల నేపథ్యంలో ఆమె తీవ్ర అస్వస్థతకు గురైందని తెలిపారు. అయితే ఆమె ఎంత కాలం నుంచి ఆ చెట్టుకు కట్టేసి ఉంది అనేది గుర్తించలేకపోతున్నట్లు చెప్పారు. ఆమె భర్త తమిళనాడుకు చెందిన వాడు అయి ఉంటాడని.. అతడే ఆమెను చెట్టుకు కట్టేసి పారిపోయి ఉంటాడని పోలీసులు అనుమానం వ్యక్తం చేస్తున్నారు. ఈ క్రమంలోనే మహారాష్ట్ర పోలీసులు.. తమిళనాడు, గోవా ప్రాంతాలకు వెళ్లి.. వారి బంధువులు, తెలిసిన వాళ్లు ఎవరైనా ఉన్నారా అని ఆరా తీస్తున్నారు.