ప్రభుత్వ ఆశ్రమంలో ఏం జరుగుతోంది,,,20 రోజుల్లో 14 మంది చిన్నారుల మృతి

ఢిల్లీలోని ఓ ప్రభుత్వ ఆశ్రమంలో గత 20 రోజుల్లోనే ఆ ఆశ్రమంలో ఉన్న 14 మంది చిన్నారులు ప్రాణాలు కోల్పోవడం పెను సంచలనంగా మారింది. అందులో ఎక్కువమంది మానసిక వికలాంగులే ఉండటం మరింత తీవ్రంగా బాధిస్తోంది. ఈ ఏడాది ప్రారంభం నుంచి ఇప్పటివరకు అక్కడ చనిపోయిన వారి సంఖ్య 27కు పెరగడం తీవ్ర సంచలనంగా మారింది. ఈ ఘటన వెలుగులోకి రావడంతో తీవ్ర విమర్శలు వెల్లువెత్తుతున్నాయి. దీంతో రంగంలోకి దిగిన ఢిల్లీ సర్కార్.. ఈ ఘటనపై సమగ్ర దర్యాప్తుకు ఆదేశాలు జారీ చేసింది.

దేశ రాజధాని ఢిల్లీలోని రోహిణీ ప్రాంతంలో ఆశా కిరణ్ పేరుతో మానసిక వికలాంగుల ఆశ్రమం ఉంది. ఇప్పుడు ఈ ఆశ్రమంలోనే వరుసగా చిన్న పిల్లలు చనిపోతుండటం తీవ్ర విమర్శలకు తావిస్తోంది. ప్రభుత్వ ఆధ్వర్యంలో నడిచే ఈ ఆశ్రమంలో గడిచిన 20 రోజుల్లోనే 14 మంది చిన్నారులు మృతి చెందడం తీవ్రంగా కలవరపెడుతోంది. అయితే చనిపోయినవారిలో ఎక్కువ మంది మానసిక వికలాంగులే ఉండటం తీవ్ర విమర్శలకు తావిస్తోంది. ఇక ఈ ఏడాది జనవరి నుంచి ఇప్పటివరకు మొత్తం 27 మంది చిన్నారులు చనిపోయారు. అయితే ఈ మరణాలన్నింటికీ కారణాలు ఏంటో తెలియకపోవడం మరింత సంచలనంగా మారింది.

  ఇక చిన్నారుల మరణాలపై వార్తలు రావడం, ప్రతిపక్షాలు తీవ్ర ఆందోళనలతో ఢిల్లీలో అధికారంలో ఉన్న ఆమ్ ఆద్మీ పార్టీ ఎట్టకేలకు స్పందించింది. ఈ ఘటనపై ప్రభుత్వం పూర్తి స్థాయి దర్యాప్తునకు ఆదేశించినట్లు ఢిల్లీ మంత్రి అతిషీ మార్లేనా స్పష్టం చేశారు. ఢిల్లీలో ఇలాంటి ఘటన చోటు చేసుకోవడం షాక్‌కు గురిచేసిందని మంత్రి అతిషీ పేర్కొన్నారు. ఇలాంటి నిర్లక్ష్యాలను సహించేది లేదని.. ఈ ఘటనపై పూర్తి స్థాయిలో దర్యాప్తు పూర్తయిన తర్వాత బాధ్యులపై కఠిన చర్యలు తప్పవని హెచ్చరించారు. 48 గంటల్లోగా ఆ మరణాలపై దర్యాప్తు జరిపి సమగ్ర నివేదిక ఇవ్వాలని ఉన్నతాధికారులను మంత్రి అతిషి ఆదేశించారు.

మరోవైపు.. ఈ చిన్నారుల మృతుల అంశాన్ని జాతీయ మహిళా కమిషన్‌ ఛైర్‌పర్సన్‌ రేఖా శర్మ తీవ్రంగా పరిగణించారు. ఇప్పటికే నిజనిర్ధరణ బృందాన్ని ఆ ఆశా కిరణ్ ఆశ్రమానికి పంపించినట్లు చెప్పారు. ఇక ఈ ఘటనపై ఆందోళనకు దిగిన ప్రతిపక్ష బీజేపీ నేతలు.. ఆశ్రమం ముందు ధర్నా చేపట్టారు. ఈ క్రమంలోనే ఆశ్రమంలోకి చొచ్చుకెళ్లేందుకు ప్రయత్నించగా.. పోలీసులు అడ్డుకున్నారు. ఆశ్రమంలోని పిల్లలకు మంచి నీరు కాకుండా మురికి నీరు అందుతోందని.. వారికి ఆహారం, చికిత్స కూడా సరిగా అందడం లేదని బీజేపీ నేతలు సంచలన ఆరోపణలు చేశారు. ఈ ఘటనకు బాధ్యులైన అధికారులపై కఠిన చర్యలు తీసుకోవాలని వారు డిమాండ్ చేశారు.