ఎస్సీ,ఎస్టీ చట్ట సవరణకు సుప్రీం మళ్లీ నో

ఎస్సీ, ఎస్టీ అట్రాసిటీ చట్టంలో తీసుకొచ్చిన సవరణలపై స్టే విధించేందుకు సుప్రీంకోర్టు మరోసారి నిరాకరించింది. కేంద్రం రివ్యూ పిటిషన్ తో పాటు సవరణలను సవాలు చేస్తూ దాఖలైన ఇతర పిటిషన్లను కలిపి ఒకేసారి  ఫిబ్రవరి 19 విచారించాలని కోర్టు నిర్ణయించింది. జస్టిస్ యూ.యూ.లతిత్ నేతృత్వంలోని బెంచ్ ఈ మేరకు నిర్ణయం తీసుకుంది. ఎస్సీ,ఎస్టీ వేధింపుల కేసులో నిందితుడికి బెయిల్‌ లభించకుండా కేంద్రం తీసుకొచ్చిన చట్ట సవరణను సవాలు చేస్తూ సీనియర్ అడ్వొకేట్ వికాస్ సింగ్ పిటిషన్‌ దాఖలు చేశారు. ఎస్సీ, ఎస్టీ అట్రాసిటీ చట్టంలో తీసుకొచ్చిన సవరణలపై స్టే విధించేందుకు సుప్రీంకోర్టు  జనవరి 25న కూడా తిరస్కరించింది. ఈ చట్టానికి సంబంధించి గత ఏడాది మార్చి 20న సుప్రీంకోర్టు ఇచ్చిన తీర్పుపై కేంద్రం దాఖలు చేసిన రివ్యూ పిటిషన్‌ను, సవరణలను సవాలు చేస్తూ దాఖలైన ఇతర పిటిషన్లను కలిపి ఒకేసారి విచారణ చేపడతామని జస్టిస్‌ ఏకే సిక్రీ నేతృత్వంలోని న్యాయస్థానం వెల్లడించింది.

ఎస్సీ, ఎస్టీ చట్టాన్ని కొందరు దుర్వినియోగం చేస్తున్నారని, ప్రభుత్వ ఉద్యోగులను వేధిస్తున్నారని..  ఈ చట్టం కింద కేసు నమోదు చేయగానే వెంటనే అరెస్టులు చేయకూడదని, పోలీసులు విచారించాలని, ముందస్తు బెయిలు కూడా ఇవ్వాలని గత ఏడాది మార్చి 20న సుప్రీంకోర్టు తీర్పు చెప్పింది. దీన్ని దళిత సంఘాలు తీవ్రంగా వ్యతిరేకించాయి. దీంతో ఎస్సీ, ఎస్టీ అట్రాసిటీ చట్టాన్ని యథావిధిగా ఉంచుతూ కేంద్రం లోక్‌సభలో బిల్లు ప్రవేశపెట్టగా ఏకగ్రీవంగా ఆమోదం పొందింది. ఎస్సీ, ఎస్టీ చట్ట సవరణ,2018 ప్రకారం నిందితుడికి ముందస్తు బెయిలు ఇవ్వరు.