వినేష్ ఫొగాట్‌పై హేమ మాలిని వివాదాస్పద వ్యాఖ్యలు.. మండిపడుతున్న నెటిజన్లు

వినేష్ ఫొగాట్‌. ఇప్పుడు దేశం మొత్తం మారుమోగిపోతున్న పేరు. ఒలింపిక్స్‌లో రెజ్లింగ్ విభాగంలో ఫైనల్ చేరి.. దేశానికి పతకం ఖాయం చేసిన వినేష్ ఫొగాట్‌.. బరువు అధికంగా ఉందన్న కారణంతో అనూహ్యంగా వేటు పడటం.. దేశానికి పతకాన్ని దూరం చేయడమే కాకుండా, కోట్లాది మంది భారతీయులకు తీవ్ర మనోవేదనను మిగిల్చింది. ఈ సమయంలో ప్రతీ ఒక్కరు ఆమెకు మద్దతుగా నిలుస్తున్నారు. ప్రధానమంత్రి నరేంద్ర మోదీ నుంచి మొదలుకుని.. నెటిజన్ల వరకు వినేష్ ఫొగాట్‌ సాధించిన విజయాన్ని, పడిన కష్టాన్ని కొనియాడుతున్నారు. ఈ క్రమంలోనే బీజేపీ ఎంపీ, బాలీవుడ్ నటి హేమ మాలిని తాజాగా చేసిన వ్యాఖ్యలు తీవ్ర దుమారానికి కారణం అవుతున్నాయి.

పారిస్‌ ఒలింపిక్స్‌లో భారత్‌ రెజ్లర్‌ వినేశ్‌ ఫోగాట్‌పై అనర్హత వేటు పడిన విషయం తెలిసిందే. ఫోగాట్‌ 50 కిలోల ప్రీ స్టైల్ విభాగంలో పోటీ పడగా.. ఆమె అంతకంటే 100 గ్రాముల అధిక బరువు ఉందన్న కారణంగా అనర్హత వేటు వేశారు. ఈ వార్త యావత్‌ భారత అభిమానులను దిగ్భ్రాంతికి గురిచేసింది. ఫైనల్లో రాణించి దేశానికి గోల్డ్ మెడల్ తెస్తారనుకుంటే, ఇలా జరిగిందేంటని ప్రతి ఒక్కరూ బాధపడుతున్నారు.

బీజేపీ ఎంపీ, ప్రముఖ నటి హేమ మాలిని.. వినేష్ ఫొగాట్‌కు మద్దతుగా నిలవడం మాని.. అందరికంటే భిన్నంగా స్పందించారు. వినేష్ ఫొగాట్‌పై హేమ మాలిన వేసిన సెటైర్లు.. నెటిజన్లు, ఒలింపిక్ అభిమానులకు తీవ్ర ఆగ్రహావేశాలను తెప్పించాయి. తాజాగా పార్లమెంటు ఆవరణలో మీడియాతో మాట్లాడిన హేమ మాలిని.. వినేష్ ఫొగాట్‌ అనర్హత అంశంపై స్పందించారు. బరువును అదుపులో ఉంచుకోవడం ఎంత ముఖ్యమో ఇప్పుడు మాకు తెలుసు అంటూ హేమ మాలిని పేర్కొన్నారు. వినేష్ ఫోగాట్‌ త్వరగా ఆ 100 గ్రాముల బరువు తగ్గుతుందని తాను ఆశిస్తున్నట్లు వ్యాఖ్యానించారు.

 100 గ్రాముల బరువు కారణంగా వినేష్ ఫొగాట్ అనర్హతకు గురి కావడం తీవ్ర ఆశ్చర్యంగా ఉందని హేమ మాలిని తెలిపారు. ఈ ఘటన మన బరువును అదుపులో ఉంచుకోవడం ఎంత ముఖ్యమో చూపుతోందని అన్నారు. అంతటితే ఆగకుండా కళాకారులు, మహిళలు, అందరికీ 100 గ్రాముల బరువు కూడా చాలా ముఖ్యమైంది అని హేమ మాలిని పేర్కొన్నారు. వినేష్ ఫొగాట్ ఆ 100 గ్రాములు త్వరగా కోల్పోతుందని తాను భావిస్తున్నట్లు తెలిపారు. అయితే ఒలింపిక్ పతకాన్ని మాత్రం మనం పొందలేం అని హేమ మాలిని అన్నారు.

దీంతో వినేష్ ఫొగాట్‌పై హేమ మాలిని స్పందించిన వీడియో సోషల్ మీడియాలో వైరల్ కావడంతో ఆమె తీరుపై నెటిజన్లు తీవ్ర ఆగ్రహం వ్యక్తం చేస్తున్నారు. ఒక ఎంపీ, సాటి మహిళ అయి ఉండి.. ఇలాంటి కష్టకాలంలో భారత క్రీడాకారిణి అయిన వినేష్ ఫొగాట్‌కు మద్దతు నిలిచి.. ధైర్యాన్ని ఇవ్వాల్సింది మానేసి ఇలా మాట్లాడటం సిగ్గుచేటని నెటిజన్లు హేమ మాలినిపై తీవ్రంగా విరుచుకుపడుతున్నారు. ఇక వినేష్ ఫొగాట్‌ అనర్హతకు గురి అయి దేశం మొత్తం తీవ్రంగా బాధపడుతుంటే హేమ మాలిని నవ్వుతూ మాట్లాడటం చూడండి. ఈ రాబందులను అధికారం నుంచి తరిమికొట్టాలి అంటూ మరొక నెటిజెన్ కామెంట్ చేశారు.