వైసీపీకీ మరో బిగ్ షాక్,,,టీడీపీలో చేరిన వైసీపీ కార్పొరేటర్లు

వైఎస్సార్ కాంగ్రెస్ పార్టీకి వరుస షాకులు తగులుతున్నాయి. ఇటీవల ఇద్దరు ముగ్గురు ముఖ్యనేతలు వైసీపీకి గుడ్ బై చెప్పిన కీలక పరిణామాలు మరిచిపోకముందే.. మరో ఘటన జరిగింది. ఒంగోలు వైసీపీ నేతలు.. వైసీపీకి, అధినేత వైఎస్ జగన్‌కు బిగ్ షాక్ ఇచ్చారు. ఒంగోలు మేయర్ గంగాడ సుజాతతో పాటుగా 12 మంది కార్పొరేటర్లు వైసీపీకి గుడ్ బై చెప్పారు. వీరంతా వైసీపీని వీడి టీడీపీ కండువా కప్పుకున్నారు. నాయుడుపాలెంలో జరిగిన ఓ కార్యక్రమంలో వీరంతా ఎమ్మెల్యే దామచర్ల జనార్ధన్ సమక్షంలో వైసీపీని వీడి తెలుగుదేశం పార్టీ తీర్థం పుచ్చుకున్నారు. వీరి రాకతో ఒంగోలు మేయర్ పీఠం టీడీపీ సొంతమైంది.

అయితే 2024 ఏపీ అసెంబ్లీ ఎన్నికలకు ముందు జరిగిన మున్సిపల్ ఎన్నికల్లో ఒంగోలు మేయర్ పీఠాన్ని వైసీపీ సొంతం చేసుకుంది. అయితే సార్వత్రిక ఎన్నికల్లో టీడీపీ కూటమి తిరుగులేని మెజారిటీతో ఏపీలో అధికారంలోకి రావటంతో పాటు ఒంగోలు అసెంబ్లీ ఎన్నికల్లో బాలినేని శ్రీనివాసరెడ్డి ఓడిపోయారు. బాలినేని శ్రీనివాసరెడ్డి మీద టీడీపీ తరుఫున పోటీచేసిన దామచర్ల జనార్ధన్ విజయం సాదించారు. అనంతరం వైసీపీ నేతలను, కార్పొరేటర్లను టీడీపీవైపు ఆకర్షించిన జనార్ధన్.. బుధవారం వీరిని టీడీపీలో చేర్చుకున్నారు. దీంతో ఒంగోలు మేయర్ పీఠం టీడీపీ వశమైంది.

ఇక రాష్ట్ర రాజకీయాలను పరిశీలిస్తే ఇటీవలి కాలంలో పలువురు వైసీపీ నేతలు ఆ పార్టీని వీడారు. పిఠాపురంలో మాజీ ఎమ్మెల్యే పెండెం దొరబాబు వైసీపీకి గుడ్ బై చెప్పారు. ఈయన త్వరలోనే జనసేనలో చేరనున్నట్లు సమాచారం. అలాగే అనంతపురం జిల్లా వైసీపీ అధ్యక్షుడిగా ఉన్న పైలా నర్సింహయ్య కూడా ఆ పార్టీని వీడి బీజేపీలో చేరిపోయారు. ఇక ఏలూరు జిల్లా వైసీపీ అధ్యక్షుడిగా ఉన్న మాజీ డిప్యూటీ సీఎం ఆళ్ల నాని ప్రత్యక్ష రాజకీయాలకే గుడ్ బై చెప్పారు. వైసీపీ పదవులకు రాజీనామా చేసిన ఆయన.. వ్యక్తిగత కారణాలతో ప్రత్యక్ష రాజకీయాలకు కూడా దూరంగా ఉండనున్నట్లు ప్రకటించారు. తాజాగా ఇప్పుడు ఒంగోలులో 12 మంది కార్పొరేటర్లు్ వైసీపీని వీడి టీడీపీలో చేరిపోయారు.