కోల్‌కతా హత్యాచార ఘటనపై స్పందించిన నిర్భయ తల్లి.. దీదీపై సంచలన వ్యాఖ్యలు

పశ్చిమ బెంగాల్ ముఖ్యమంత్రి, తృణముల్ కాంగ్రెస్ పార్టీ అధినేత్రి మమతా బెనర్జీపై.. 2012 ఢిల్లీ గ్యాంగ్ రేప్ కేసు బాధితురాలు నిర్భయ తల్లి ఆశా దేవి తీవ్ర విమర్శలు గుప్పించారు. ఆర్‌జీ కర్ ఆస్పత్రి ట్రైనీ డాక్టర్‌పై జరిగిన అత్యంత పాశవికమైన అత్యాచారం, హత్య కేసును సమర్ధవంతంగా పరిష్కరించడం.. ఆ కేసులో అవసరమైన చర్యలు తీసుకోవడంలో మమతా బెనర్జీ పూర్తిగా విఫలం అయ్యారని మండిపడ్డారు. ఇలాంటి వ్యక్తి ముఖ్యమంత్రి పదవిలో ఉండడానికి వీలు లేదని.. ఆమె తక్షణం సీఎం పదవికి రాజీనామా చేయాలని ఆశా దేవి డిమాండ్ చేశారు. కోల్‌కతా ట్రైనీ డాక్టర్ ఘటన దేశం మొత్తం తీవ్రంగా కుదిపేస్తున్న వేళ.. నిర్భయ తల్లి ఆశాదేవి స్పందించడం ఆసక్తికరంగా మారింది.

కోల్‌కతా ట్రైనీ డాక్టర్ హత్యాచారం ఘటనలో మమతా బెనర్జీ తీసుకున్న చర్యలేమీ లేవని ఆశా దేవి మండిపడ్డారు. సీఎంకు ఉన్న అధికారాలతో ఈ ఘటనపై తక్షణ చర్యలు తీసుకోవడానికి బదులుగా.. మమతా బెనర్జీ నిరసనలు, ఆందోళనల పేరుతో ప్రజల దృష్టి మరలిచేందుకు ప్రయత్నిస్తున్నారని తీవ్రంగా తప్పుపట్టారు.

 పశ్చిమ బెంగాల్ ముఖ్యమంత్రి మమతా బెనర్జీ స్వయంగా మహిళ అయి ఉండి.. ఈ ఘటనపై తక్షణం కఠిన చర్యలు తీసుకుని ఉండాల్సిందని ఆశాదేవి అన్నారు. వాటికి బదులు నిరసనలు చేయడం.. కేసు నుంచి ప్రజల దృష్టిని మళ్లిస్తున్నారని నిర్భయ తల్లి విమర్శించారు. ఇలాంటి పరిస్థితిని హ్యాండిల్ చేయడంలో విఫలమైన మమతా బెనర్జీ.. సీఎం పదవికి రాజీనామా చేయాలని డిమాండ్ చేశారు. రేపిస్టులపై కోర్టులు తక్షణ చర్యలు తీసుకునేలా కేంద్ర, రాష్ట్ర ప్రభుత్వాలు వేగంగా చర్యలు తీసుకోకుంటే దేశంలో నిత్యం ఏదో ఒక ప్రాంతంలో ఇలాంటి ఘటనలే జరుగుతాయని పేర్కొన్నారు.

కోల్‌కతా మెడికల్ కాలేజీలో మహిళకు రక్షణ లేకపోవడం, వారిపై అత్యంత అమానుషంగా దాడులు జరుగుతుండటం చూస్తే దేశంలోని మహిళలకు ఎలాంటి భద్రత ఉందో అర్థం చేసుకోవచ్చని ఆశాదేవి తీవ్ర ఆవేదన వ్యక్తం చేశారు. ట్రైనీ డాక్టర్‌పై హత్యాచార ఘటన జరిగిన మరుసటి రోజే ఈ నేరంతో సంబంధం ఉన్న ఒక వ్యక్తిని బెంగాల్ పోలీసులు అదుపులోకి తీసుకున్నారు. ఆ తర్వాత బెంగాల్ పోలీసుల విచారణలో లోపాలని గుర్తించి వాటిని తీవ్రంగా తప్పుపట్టిన కలకత్తా హైకోర్టు.. ఈ కేసును సీబీఐకి అప్పగించింది.