అందుకే రేప్‌లు .. దీదీ పాత వివాదాస్పద వ్యాఖ్యలు వైరల్

ప్రస్తుతం దేశవ్యాప్తంగా కోల్‌కతా ట్రైనీ డాక్టర్ హత్యాచారం ఘటన తీవ్ర దుమారం రేపుతోంది. మెడికల్ కాలేజీ ఆస్పత్రిలోనే ఆ జూనియర్ డాక్టర్‌పై అత్యాచారం చేసి.. దారుణంగా హత్య చేయడం దేశం మొత్తాన్ని తీవ్ర దిగ్భ్రాంతికి, ఆగ్రహావేశాలకు గురి చేస్తోంది. ఈ క్రమంలోనే గతంలో పశ్చిమ బెంగాల్ ముఖ్యమంత్రి మమతా బెనర్జీ చేసిన వ్యాఖ్యలు ప్రస్తుతం వైరల్ అవుతున్నాయి. అత్యాచారాలు జరగడానికి గల కారణాలపై దీదీ చేసిన వివాదాస్పద వ్యాఖ్యలు ఇప్పుడు సోషల్ మీడియాలో తెగ చక్కర్లు కొడుతున్నాయి.

అమ్మాయిలు అబ్బాయిలు ఇష్టం వచ్చినట్లు మాట్లాడుకోవడం వల్లే అత్యాచారాలు పెరిగిపోతున్నాయని పశ్చిమ బెంగాల్‌ ముఖ్యమంత్రి మమతా బెనర్జీ గతంలో చేసిన వ్యాఖ్యలు తాజాగా వైరల్‌ అవుతున్నాయి. ప్రస్తుతం ట్రైనీ డాక్టర్‌పై కోల్‌కతాలోని ఆర్‌జీ కర్ మెడికల్ ఆస్పత్రిలో జరిగిన అత్యాచారం, హత్య.. దేశవ్యాప్తంగా తీవ్ర దుమారం రేపుతున్న వేళ.. గతంలో దీదీ చేసిన వ్యాఖ్యలు మళ్లీ తెరపైకి వచ్చాయి. ఇప్పుడే ఈ ఘటన దేశవ్యాప్తంగా తీవ్ర విమర్శలు వెల్లువెత్తిన నేపథ్యంలో.. బెంగాల్ రాష్ట్ర ప్రభుత్వంపై తీవ్ర ఆందోళనలు జరుగుతున్న వేళ.. గతంలో మమతా బెనర్జీ చేసిన వ్యాఖ్యలు తీవ్ర వైరల్ అవుతున్నాయి. అమ్మాయిలు, అబ్బాయిలు యథేచ్ఛగా మాట్లాడుకోవడం వల్లే రేప్‌ కేసులు పెరుగుతున్నాయంటూ గతంలో దీదీ వ్యాఖ్యలు చేయడం గమనార్హం.

  కోల్‌కతాలోని పార్క్‌ స్ట్రీట్‌ ప్రాంతంలో 2012 లో కదులుతున్న కారులో ఓ యువతిపై గ్యాంగ్ రేప్ చోటు చేసుకుంది. ఈ ఘటన అప్పట్లో బెంగాల్ వ్యాప్తంగా సంచలనం రేపిన నేపథ్యంలో అప్పుడు స్పందించిన మమతా బెనర్జీ.. వివాదాస్పద వ్యాఖ్యలు చేశారు. ప్రస్తుత కాలంలో అమ్మాయిలు, అబ్బాయిలు స్వేచ్ఛగా మాట్లాడుకోవడం పెరుగుతోందని.. గతంలో అమ్మాయి, అబ్బాయి ఒకరినొకరు చేయి పట్టుకుని కనిపిస్తే వారిని తల్లిదండ్రులకు అప్పగించేవారని పేర్కొన్నారు. తల్లిదండ్రులు వారిని మందలించి సరిదిద్దేవారని.. కానీ ఇప్పుడు అంతా ఓపెన్‌ అయిపోయిందని.. ఓపెన్‌ మార్కెట్‌ మాదిరిగా యువతకు అవకాశాలు ఉంటున్నాయని మమతా బెనర్జీ వ్యాఖ్యానించారు.

ఇక ఈ వ్యాఖ్యలు అప్పట్లో తీవ్ర దుమారం రేపడంతో తర్వాత దీదీ వివరణ ఇచ్చారు. తన వ్యాఖ్యలను వక్రీకరించారని మమతా బెనర్జీ మండిపడ్డారు. తాజాగా కోల్‌కతా ట్రైనీ డాక్టర్‌పై హత్యాచారం జరిగిన ఘటన దుమారం రేపుతున్న వేళ నాటి మమతా బెనర్జీ వ్యాఖ్యలు సోషల్ మీడియాలో చక్కర్లు కొడుతున్నాయి. ఇలాంటి ముఖ్యమంత్రి అధికారంలో ఉన్న సమయంలో బాధితురాలికి న్యాయం దక్కుతుందని ఆశిస్తున్నారా అంటూ కొందరు నెటిజన్లు కామెంట్లు చేస్తున్నారు.

మరోవైపు.. కోల్‌కతా హత్యచార ఘటన తీవ్ర దుమారం రేపుతున్న వేళ ఆ రాష్ట్రంలో 42 మంది డాక్టర్లను దీదీ ప్రభుత్వం ట్రాన్స్‌ఫర్ చేయడం చర్చనీయాంశంగా మారింది. ఇక ఈ దారుణ ఘటనపై సీబీఐ దర్యాప్తు కొనసాగుతోంది. హత్యాచారం చోటుచేసుకున్న ఆర్‌జీ కార్‌ ఆసుపత్రి మాజీ ప్రిన్సిపల్‌ సందీప్‌ ఘోష్‌ను సీబీఐ వరుసగా రెండో రోజు విచారించింది.