రూ.263 కోసం పోరాడితే.. ఏకంగా రూ.35 వేలు వచ్చాయి

శ్రీకాకుళంలో ఓ రైల్వే ప్రయాణికుడు 8 నెలల పోరాటం ఫలించింది.. ఆహారం అందించడంలో నిర్లక్ష్యంగా వ్యవహరించడంతో సీరియస్‌గా తీసుకున్నారు. తాను పోగొట్టుకుంది తక్కువైనా సరే న్యాయం జరిగింది.. చివరికి పోగొట్టుకున్న దానికి రెట్టింపు దక్కింది. ఈ మేరకు వినియోగాదారుల కమిషన్‌ చర్యలు తీసుకుని.. బాధితుడికి న్యాయం చేసింది.

 ఈ ఏడాది జనవరిలో శ్రీకాకుళంకు చెందిన రామ్మోహన్‌రావు విజయవాడ వెళ్లేందుకు ప్రశాంతి ఎక్స్‌ప్రెస్‌లో టికెట్ బుక్ చేసుకున్నారు. రైలు ప్రయాణంలో ఫుడ్ కోసం ఆన్‌లైన్‌లో రూ.263 చెల్లించారు. ఇండియన్‌ రైల్వే కేటరింగ్, టూరిజం కార్పొరేషన్, ఆంధ్రా స్పైసీ కిచెన్‌ ద్వారా విశాఖలో ఈ ఫుడ్ తీసుకోవాల్సి ఉంది. కానీ ఆర్డర్ చేసిన ఫుడ్‌ను నిర్వాహకులు రామ్మోహన్‌రావుకు అందించలేకపోయారు. అక్కడితో ఆగకుండా రైలు కదిలిన తర్వాత ఆ ఫుడ్ పంపిణీ చేసినట్లు తప్పుగా మెసేజ్‌ పంపించారు.

వెంటనే రామ్మోహన్‌రావు ఆధారాలతో సహా జిల్లా వినియోగదారుల కమిషన్‌ను ఆశ్రయించారు. అప్పటి నుంచి ఈ వ్యవహారంపై విచారణ జరుగుతుండగా.. బాధితుడికి ఇద్దరు ప్రతివాదులు నష్టపరిహారం చెల్లించాలని జిల్లా వినియోగదారుల కమిషన్‌ ఛైర్మన్‌ రఘుపాత్రుని చిరంజీవి, మహిళా సభ్యురాలు రాధారాణి తీర్పు ఇచ్చారు. రూ.25 వేలు, ఖర్చులకు రూ.10 వేలు 45 రోజుల్లో చెల్లించాలని.. ఒకవేళ సకాలంలో డబ్బులు చెల్లించక పోతే నష్టపరిహారానికి 12 శాతం వడ్డీ కట్టాలన్నారు.

శ్రీకాకుళం జిల్లాలో భూ ప్రకంపనలు సంభవించాయి. ఇచ్ఛాపురం పరిసర ప్రాంతాల్లో బుధవారం తెల్లవారుజామున స్వల్పంగా భూకంపం వచ్చింది. ఉదయం 3:45గంటలకు అందరూ నిద్రిస్తున్న సమయంలో భూ ప్రకంపనలు వచ్చాయి. భూమి మూడు సెకన్ల పాటూ కంపించడంతో జనాలు తీవ్ర భయాందోళనలకు గురయ్యారు.. వీరు ఒక్కసారిగా నిద్రలో నుంచి లేచి బయటకు పరుగులు తీశారు. కాసేపు ఏం జరిగిందో అర్థం కాక అయోమయానికి గురయ్యారు. రెండేళ్ల క్రితం కూడా ఇలా స్వల్పంగా భూమి కంపించినట్లు చెబుతున్నారు. భూ ప్రకంపనలపై సమాచారం అందుకున్న అధికారులు ఆరా తీస్తున్నారు. పూర్తి వివరాలు తెలియాల్సి ఉంది.