కోల్‌కతా హత్యాచార కేసులో నిందితుడి తరఫు లాయర్ కవితా సర్కార్

దాదాపు నెల రోజులుగా.. దేశం మొత్తాన్ని పశ్చిమ బెంగాల్ రాజధాని కోల్‌కతాలోని ఆర్‌జీ కర్ మెడికల్ కాలేజీ ఆస్పత్రిలో ట్రైనీ డాక్టర్‌పై జరిగిన హత్యాచార ఘటన తీవ్రంగా కుదిపేస్తోంది. అర్ధరాత్రి ఆస్పత్రిలోనే మహిళ డాక్టర్‌పై జరిగిన ఈ అఘాయిత్యంలో సంచలన విషయాలు వెలుగులోకి వస్తున్నాయి. మరోవైపు.. ఈ కేసులో ప్రధాన నిందితుడిగా సంజయ్ రాయ్ అనే వ్యక్తిని అరెస్ట్ చేయగా.. అతడ్ని ఉరితీయాలంటూ తీవ్ర స్థాయిలో డిమాండ్లు వెల్లువెత్తుతున్నాయి. ఇక ఓ మహిళపై అత్యంత దారుణంగా, మృగంలాగా విరుచుకుపడిన సంజయ్ రాయ్ తరఫున వాదించేందుకు ఒక్క లాయర్ కూడా ఆసక్తి చూపలేదు. కానీ చివరికి ఓ మహిళా లాయర్ ముందుకు వచ్చి.. తాను సంజయ్ రాయ్ కేసు వాదిస్తానంటూ వార్తల్లోకి ఎక్కారు. ఆమెనే కవితా సర్కార్.

అయితే ఎలాంటి తీవ్రమైన కేసు అయినా.. నిందితుడి తరఫున వాదనలు వినిపించేందుకు ఒక లాయర్ తప్పనిసరిగా ఉండాలి. ముంబైలో పేలుళ్లు, కాల్పులకు తెగబడి మన దేశంలో మారణ హోమం సృష్టించిన పాక్ ఉగ్రవాది కసబ్‌కు సైతం కోర్టు లాయర్‌ను నియమించింది. ఇది న్యాయవ్యవస్థ నిబంధనల్లో ఒకటి. కేసు ఎంత తీవ్రమైంది అయినా.. విచారణలో పారదర్శకత కోసం నిందితుడి తరఫున కూడా వాదనలు వినడం ముఖ్యమే. దీన్ని పరిగణనలోకి తీసుకున్న కోర్టు.. నిందితుడికి లీగల్‌ ఎయిడ్‌కు ఇటీవల సిఫార్సులు చేసింది. దీంతో సంజయ్‌ రాయ్‌ కోసం వాదించే బాధ్యతలను కోల్‌కతాకు చెందిన మహిళా లాయర్ కవితా సర్కార్‌కు అప్పగించారు. దీంతో ఆమె పేరు దేశవ్యాప్తంగా మారుమోగిపోతోంది.

దీంతో ఆమె ఎవరు అనేది తీవ్ర ఆసక్తికరంగా మారింది. 52 ఏళ్ల కవితా సర్కార్.. లీగల్‌ ఎయిడ్‌ డిఫెన్స్‌ కౌన్సిల్‌లో సభ్యురాలిగా ఉన్నారు. కేసు విచారణ కోసం లాయర్ ఫీజులు చెల్లించలేని స్థితిలో ఉన్నవారి కోసం.. లేదా వాదించేందుకు ఏ లాయర్‌ ముందుకు రాని కేసుల్లో నిందితులు, బాధితులకు ఈ లీగల ఎయిడ్ డిఫెన్స్ కౌన్సిల్‌ న్యాయపరంగా సహాయం అందిస్తుంది. అలా ఈ కోల్‌కతా డాక్టర్ హత్యాచార కేసు నిందితుడు అయిన సంజయ్‌ రాయ్‌ కేసు కవితా సర్కార్ చేతికి వచ్చింది. హూగ్లీ మోహ్‌సిన్‌ కాలేజీ నుంచి లా డిగ్రీ పూర్తి చేసిన కవితా సర్కార్.. అలిపోర్‌ కోర్టులో తన కెరీర్‌ను మొదలు పెట్టారు. గతేడాది జూన్‌లోనే ఆమె సెల్దా కోర్టుకు ట్రాన్స్‌ఫర్ అయ్యారు. లాయర్ వృత్తిలో 25 ఏళ్ల సుదీర్ఘ అనుభవం ఉన్న కవితా సర్కార్.. మొదట్లో ఎక్కువగా సివిల్‌ కేసులు వాదించేవారు. గతేడాది ఫిబ్రవరిలో క్రిమినల్‌ లాయర్‌గా స్టేట్‌ లీగల్‌ సర్వీసెస్‌ అథారిటీలో ఆమె చేరారు.

ఈ సందర్భంగానే మీడియాతో మాట్లాడిన కవితా సర్కార్.. దేశం మొత్తం కోరుకుంటున్నట్లుగానే ఈ కేసులో బాధితురాలికి న్యాయం జరగాలని తానూ కోరుకుంటున్నట్లు చెప్పారు. కానీ నిందితులతో సహా ప్రతి ఒక్కరికీ పారదర్శక విచారణ పొందే హక్కు ఉందని.. క్రిమినల్‌ కేసుల్లో లాయర్‌ దొరకని వారి కోసం కోర్టులో వాదించడమే తన పని అని కవితా సర్కార్ తెలిపారు. ఈ కేసులో నిందితుడి తరఫున వాదించమని కోర్టు తనను అడిగిందని.. అందుకే తాను అంగీకరించినట్లు చెప్పారు. గతంలోనూ చాలా మందికి తన జీతం నుంచే బెయిల్‌ బాండ్లను సమర్పించినట్లు కవితా సర్కార్ వెల్లడించారు. ఈ కేసులో నిందితుడి తరఫున ఇటీవల ఆమె సెల్దా కోర్టులో వాదనలు వినిపించి.. సంజయ్‌ రాయ్‌కి పాలీగ్రాఫ్‌ టెస్ట్ గురించి వివరించారు.