షేక్ హసీనా అప్పగించండి, లేకపోతే.. భారత్‌కు బంగ్లాదేశ్‌కు స్వీట్ వార్నింగ్

గత కొన్ని రోజులుగా బంగ్లాదేశ్‌లో రేగిన అంతర్యుద్ధం.. ఆ దేశంలో అప్రతిహతంగా కొనసాగుతున్న అవామీ లీగ్ పార్టీ ప్రభుత్వాన్ని పడగొట్టింది. ఇక దశాబ్దాల పాటు బంగ్లాదేశ్‌ను పాలించిన షేక్ హసీనాను గద్దె దింపి, దేశం విడిచిపారిపోయేలా చేసింది. ఈ నేపథ్యంలోనే ఢాకాను వదిలేసి షేక్ హసీనా పారిపోయి వచ్చి భారత్‌లో తలదాచుకుంటున్నారు. అయితే లండన్ వెళ్లి అక్కడే ఆశ్రయం పొందాలని భావించిన షేక్ హసీనాకు.. అక్కడి నుంచి అనుమతి రాకపోవడంతో.. ఆమె ఇక్కడే చిక్కుకుపోయారు. ఈ క్రమంలోనే ఇప్పటికే పలుమార్లు షేక్ హసీనాను అప్పగించాలని బంగ్లాదేశ్‌లో ముహమ్మద్ యూనస్ నేతృత్వంలో ఏర్పడిన తాత్కాలిక ప్రభుత్వం.. భారత ప్రభుత్వాన్ని కోరింది.

తాజాగా బంగ్లాదేశ్‌లో కీలక పార్టీగా ఉన్న బంగ్లాదేశ్ నేషనలిస్ట్ పార్టీ.. భారత సర్కార్‌కు స్వీట్ వార్నింగ్ ఇచ్చింది. షేక్‌ హసీనా అప్పగింత అనేది భారత్‌-బంగ్లాదేశ్‌ సంబంధాలను ప్రభావితం చేస్తుందని ఆ పార్టీ ప్రధాన కార్యదర్శి మిర్జా ఫఖ్రూల్ ఇస్లాం అలంగీర్ పేర్కొన్నారు. బంగ్లాదేశ్‌లో కొత్త ప్రభుత్వం ఏర్పడిన నేపథ్యంలో భారత్‌తో ద్వైపాక్షిక సంబంధాల్లో సరికొత్త అధ్యాయం ప్రారంభించేందుకు షేక్ హసీనా అప్పగింత అంశం కీలక పాత్ర పోషిస్తుందని తెలిపారు. అలా కాదని.. షేర్ హసీనాకు భారత్‌లోనే ఆశ్రయం కొనసాగిస్తే.. భవిష్యత్తులో రెండు దేశాల మధ్య సంబంధాలు దెబ్బతింటాయని హెచ్చరించారు. అదే సమయంలో భారత్‌తో బలమైన సంబంధాలను తమ పార్టీ కోరుకుంటోందని పేర్కొన్నారు. గతంలో తమకు ఉన్న విభేదాలను మరిచిపోయి.. కొత్త బంధాన్ని ఏర్పాటు చేసుకోవాలని అనుకుంటున్నట్లు అలంగీర్ చెప్పారు. భారత భద్రతకు ముప్పు కలిగించే ఎలాంటి చర్యలనైనా తమ దేశంలో అనుమతించబోమని స్పష్టం చేశారు.

అదే సమయంలో ఎన్నికలు జరిగి తమ దేశంలో బీఎన్‌పీ ప్రభుత్వం ఏర్పడితే అదానీ గ్రూప్‌తో గతంలో హసీనా సర్కార్ కుదుర్చుకున్న ఒప్పందాన్ని పునఃసమీక్షిస్తామని ఈ సందర్భంగా అలంగిర్‌ స్పష్టం చేశారు. అదానీతో చేసుకున్న ఒప్పందం కారణంగా బంగ్లాదేశ్‌ ప్రజలపై తీవ్ర ఒత్తిడి పడుతోందని చెప్పారు. ఇక బంగ్లాదేశ్‌ ప్రజలను అర్థం చేసుకోవడంలో భారత్‌ దౌత్యం విఫలమైందని ఆయన అభిప్రాయం వ్యక్తం చేశారు. మరోవైపు.. షేక్ హసీనా ప్రభుత్వం కూలిపోయిన తర్వాత ఇప్పటివరకు భారత్.. తమ తాత్కాలిక ప్రభుత్వంతో ఎలాంటి సంప్రదింపులు జరపడంలేదని అలంగీర్ తెలిపారు. ఇప్పటికే అమెరికా, చైనా, బ్రిటన్, పాకిస్తాన్‌ దేశాలు తమను సంప్రదించాయని ఆయన గుర్తు చేశారు.

ఇదే సమయంలో తమ దేశంలో మైనార్టీలను రక్షించడం బంగ్లాదేశ్‌ అంతర్గత విషయమని అలంగీర్ వెల్లడించారు. బంగ్లాదేశ్‌లో హిందువులపై దాడులు జరుగుతున్నట్లు వస్తున్న వార్తల్లో ఎలాంటి నిజం లేదని చెప్పారు. ఆ ఆరోపణల్లో చాలా వరకు రాజకీయ ప్రేరితమైనవని స్పష్టం చేశారు. బంగ్లాదేశ్‌లో ఏడాదిలోగా ఎన్నికలు జరిగి.. బీఎన్‌పీ నేతృత్వంలో కొత్త ప్రభుత్వం ఏర్పడుతుందని ధీమా వ్యక్తం చేశారు. అదే సమయంలో బంగ్లాదేశ్‌లో చేసిన నేరాలు, అవినీతికి షేక్‌ హసీనా కచ్చితంగా విచారణను ఎదుర్కొని, శిక్ష అనుభవించి తీరాల్సిందేని ఆయన పేర్కొన్నారు. షేక్ హసీనాకు, ఆమె పార్టీ అవామీ లీగ్‌కు భారత్‌ అండగా నిలిస్తే.. తమ దేశంలో భారత్‌పై ఉన్న అభిప్రాయం దెబ్బతింటుందని చెప్పారు.

ఇప్పటికే షేక్ హసీనాను అప్పగించాలనే డిమాండ్‌ను బీఎన్‌పీ పలుమార్లు తెరపైకి తీసుకొచ్చింది. భారత్‌ నుంచి ఆమె బంగ్లాదేశ్‌లో తమ పార్టీ విజయాన్ని అడ్డుకునేందుకు కుట్రలు పన్నుతున్నారని అలంగీర్ గత కొన్నిరోజుల క్రితం ఆరోపించారు. హసీనా హయాంలో రిజర్వేషన్లపై విద్యార్థులు చేపట్టిన ఆందోళనలు హింసాత్మకంగా మారడంతో దాదాపు వెయ్యి మంది దుర్మరణం పాలయ్యారు. ఈ క్రమంలోనే ఆ మృతుల కారణం షేక్ హసీనానే అని.. వారి కుటుంబ సభ్యులు పోలీసులకు ఫిర్యాదులు చేశాయి. దీంతో షేక్ హసీనా, ఆమె పార్టీ అవామీ లీగ్ పార్టీ నేతలపై పదుల సంఖ్యలో కేసులు నమోదు చేశారు.