వారానికి 4 రోజులే పని..ఆ ప్రభుత్వం కీలక నిర్ణయం

ఏ కంపెనీ అయినా ఉద్యోగుల నుంచి ఎక్కువ పనిచేయించుకోవాలని చూస్తూ ఉంటుంది. ప్రభుత్వాలు కూడా కంపెనీలు, ఉద్యోగులు ఎక్కువ పనిచేయడం వల్ల ఉత్పత్తి పెరిగి.. రాష్ట్రానికి, దేశానికి ఆదాయం పెరుగుతుందని.. అభివృద్ధి జరుగుతుందని చూస్తాయి. ఇక చైనా, జపాన్ లాంటి దేశాల్లో అయితే ఉద్యోగులు అవిశ్రాంతంగా పనిచేస్తూ ఉంటారు. రెండో ప్రపంచ యుద్ధంలో జపాన్‌లోని హిరోషిమా, నాగసాకిలపై అణుబాంబులు వేయడంతో ఆ రెండు నగరాలు పూర్తిగా నేలమట్టం అయ్యాయి. దాదాపు 80 పూర్తయినా ఇప్పటికీ అక్కడ అణు బాంబులు పడిన గాయాలు తగ్గలేదు. అయినా జపాన్ వాటి నుంచి పుంజుకుని.. ప్రపంచ దేశాలకు ఎన్నో వస్తువులను ఎగుమతి చేస్తోంది. దీనికి కారణం అక్కడి యువత, ఉద్యోగులు.. విపరీతంగా పనిచేయడమే. అలాంటి జపాన్ తాజాగా సంచలన నిర్ణయం తీసుకుంది.

వారానికి నాలుగు రోజులు మాత్రమే ఉద్యోగులతో పనిచేయించాలని జపాన్ ప్రభుత్వం సంచలన నిర్ణయం తీసుకుంది. ఈ వారానికి 4 రోజుల పని విధానం దేశంలోని అన్ని కంపెనీలు, సంస్థల్లో అమలు చేయాలని ఆదేశాలు జారీ చేసింది. ఇది కచ్చితంగా అమలయ్యేలా చూడాలని అధికారులను ఆదేశించింది. అయితే ఈ వారానికి నాలుగు రోజులు మాత్రమే ఉద్యోగులతో పనిచేయించాలనే విధానాన్ని 2021లోనే ప్రవేశపెట్టేందుకు జపాన్‌ ప్రభుత్వం అన్ని చర్యలు చేపట్టింది. అంతేకాకుండా అప్పట్లో దీనిపై ఆదేశాలు కూడా జారీ చేసింది. అయితే చాలా కంపెనీలు ఈ విధానాన్ని వ్యతిరేకించడంతో వెనక్కి తగ్గాయి. జపాన్‌లోని కేవలం 8 శాతం సంస్థలు మాత్రమే ఇలా 4 రోజుల పనివిధానాన్ని పాటించాయి. ఇలా వారానికి ఉద్యోగులతో 4 రోజులు మాత్రమే పనిచేయించడం వల్ల దేశ అభివృద్ధిలో జపాన్‌ వెనుకపడే ప్రమాదం ఉంటుందని నిపుణులు, సంస్థలు తీవ్ర ఆందోళన వ్యక్తం చేశాయి.

అయినా అక్కడి ప్రభుత్వం వెనక్కి తగ్గలేదు. అయితే ప్రస్తుతం.. దేశంలోని అన్ని సంస్థలు కూడా ఇదే విధానాన్ని అమలు చేయాలని ప్రభుత్వం ఉత్తర్వులు జారీ చేసింది. ఈ విధానం వల్ల ఎక్కువ మందికి ఉద్యోగ అవకాశాలు కల్పించేందుకు అవకాశం కలుగుతుందని ప్రభుత్వం వెల్లడించింది. సూక్ష్మ, మధ్య తరహా పరిశ్రమల్లో నిరుద్యోగులకు ఎక్కువ ఉద్యోగాలు వస్తాయని తెలిపింది. ఈ విధానంతో దేశంలో నిరుద్యోగం కొంతైనా తగ్గే అవకాశాలు ఉంటాయని అభిప్రాయం వ్యక్తం చేసింది. అంతే కాకుండా వారానికి 4 రోజులే పనిచేసి.. 3 రోజులు ఇంట్లో ఉండడం వల్ల.. కుటుంబ సభ్యులతో ఎక్కువ సమయం గడిపే అవకాశం ఉంటుందని తెలిపింది. జపాన్‌లో యువ జనాభా తగ్గిపోతుందనే ఆందోళనలు వ్యక్తం అవుతున్న వేళ.. పిల్లల పెంపకంపైనా తల్లిదండ్రులు దృష్టి పెడుతారని ప్రభుత్వం భావిస్తోంది.

జపాన్‌లో ఎక్కువశాతం ఉద్యోగస్తులు ఓవర్‌ టైం డ్యూటీలు చేయడం వల్ల గుండె సంబంధిత వ్యాధులు ఎదుర్కొంటున్నారని ఓ నివేదిక వెల్లడించింది. ప్రతీ ఏడాది 50 మంది అధిక పని ఒత్తిడి కారణంగా చనిపోతున్నారని ఒక అధ్యయనం వెల్లడించింది. ఈ నేపథ్యంలోనే అక్కడి ప్రభుత్వం ఈ నిర్ణయం తీసుకుంది. ఇక జపాన్ రాజధాని టోక్యోలోని అకికో యోకోహామా అనే సంస్థ వారానికి నాలుగు పని దినాల విధానాన్ని ప్రస్తుతం పాటిస్తోంది. ఈ విధానం వల్ల తమ ఉద్యోగులకు శని, ఆదివారాలతో పాటు బుధవారం కూడా సెలవు ఇస్తున్నట్లు తెలిపింది. దీని వల్ల ఉద్యోగులు పని ఒత్తిడికి గురి కాకుండా.. యాక్టివ్‌గా పని చేస్తున్నట్లు ఆ సంస్థ తెలిపింది. అంతే కాకుండా తక్కువ పని దినాలు ఉండటంతో ఉద్యోగులు మరింత వేగంగా పనులను పూర్తి చేస్తున్నారని వెల్లడించింది.