పాస్పోర్ట్ సమస్యలతో ,,,వైఎస్ జగన్ లండన్ ప్రయాణం వాయిదా
Andhra Pradesh Telugu | Suryaa Desk | Published : Fri, Sep 06, 2024, 08:13 PM
ఆంధ్రప్రదేశ్ మాజీ ముఖ్యమంత్రి వైఎస్ జగన్‌మోహన్‌రెడ్డి లండన్ ప్రయాణం వాయిదా పడింది. ఆయనకు పాస్పోర్ట్ కష్టాలు ఎదురయ్యాయి.. మొన్నటి వరకు సీఎం హోదాలో ఉన్న డిప్లోమాటిక్ పాస్పోర్ట్ రద్దుయ్యింది. దీంతో ఆయన జనరల్ పాస్పోర్ట్ కోసం దరఖాస్తు చేసుకున్నారు.. అయితే పాస్‌పోర్టు కార్యాలయం కోర్టు నుంచి ఎన్‌వోసీని తేవాలని కోరింది. దీంతో జగన్ విజయవాడ ప్రజా ప్రతినిధుల కోర్టులో పిటిషన్ దాఖలు చేయగా.. కోర్టు విచారణ జరిపి ఏడాదికి పాస్పోర్ట్ ఇవ్వాలని ఆదేశాలు జారీ చేసింది.
అయితే విజయవాడ ప్రజా ప్రతినిధుల కోర్టులో కేసు పెండింగ్‌లో ఉందని పాస్ పోర్ట్ కార్యాలయం చెబుతోంది.. దీంతో ఎన్‌వోసీ తీసుకోవాలని జగన్‌కు పాస్ పోర్ట్ కార్యాలయం సూచించింది. అయితే విజయవాడ ప్రజా ప్రతినిధుల కోర్టు తీర్పుపై జగన్ మళ్లీ హైకోర్టును ఆశ్రయించారు. తనకు ఐదేళ్ల పాటూ పాస్పోర్ట్ ఇచ్చేలా చూడాలని.. సీబీఐ కోర్టు ఆదేశాల (ఐదేళ్లకు పాస్పోర్ట్ ఇవ్వాలని)ను ఏడాదికి పరిమితం చేయడం దారుణమని.. ఇవాళ ఏపీ హైకోర్టులో లంచ్ మోషన్ పిటిషన్ దాఖలు చేశారు. అయితే పాస్ పోర్ట్‌కు ఎన్‌వోసీ ఇవ్వాలని హైకోర్టును కోరారు జగన్. హైకోర్టులో వైఎస్ జగన్ పిటిషన్‌పై విచారణ జరగ్గా.. జగన్ లండన్ టూర్‌కు సీబీఐ కోర్టు అనుమతి ఇచ్చినట్టు జగన్ తరఫు లాయర్ కోర్టుకు తెలిపారు. అయితే హైకోర్టు తదుపరి విచారణ సోమవారానికి వాయిదా వేసింది.
అయితే ఈ పిటిషన్‌పై విచారణను కోర్టు సోమవారానికి వాయిదా వేసింది. దీంతో జగన్ లండన్ ప్రయాణం వాయిదా వేసింది. డిప్లోమాటిక్ పాస్‌పోర్ట్‌లు ప్రధాని నుంచి ఎంపీల వరకు.. అలాగే ముఖ్యమంత్రులకు ఉంటాయి. అంటే వీరు ఎలాంటి వీసా లేకుండానే విదేశాలకు వెళ్లే అవకాశం ఉంటుంది. అంతేకాదు కొంతమంది ప్రముఖులకు కొన్ని దేశాలు డిప్లోమాటిక్ పాస్‌పోర్టులు జారీ చేస్తుంటాయని చెబుతున్నారు.
వైఎస్ జగన్ ఆస్తుల కేసులు సీబీఐ, ఈడీ కోర్టుల్లో విచారణ జరుగుతున్న సంగతి తెలిసిందే. అయితే జగన్ విదేశాలకు వెళ్లాలంటే కోర్టుల నుంచి అనుమతి తీసుకోవాల్సి ఉంటుంది.. లండన్ పర్యటన కోసం అనుమతి కోరుతూ నాంపల్లి సీబీఐ కోర్టులో జగన్ పిటిషన్ దాఖలు చేయగా కోర్టు అనుమతించింది. వాస్తవానికి వైఎస్ జగన్ ఈ నెల మూడో తేదీన సతీసమేతంగా లండన్ వెళ్లేందుకు ఏర్పాట్లు చేసుకున్నారు. లండన్‌లో చదువుతోన్న కుమార్తె పుట్టినరోజు వేడుకల కోసం 25వ తేదీ వరకు అక్కడే ఉండాలని భావించారు.
అయితే ఇప్పుడు పాస్పోర్ట్ ఇబ్బందులతో లండన్ ప్రయాణం వాయిదా పడింది. అంతేకాదు జగన్ ఆగస్టులో విజయవాడలోని పాస్‌పోర్టు కార్యాలయానికి వెళ్లారు. వైఎస్ జగన్ మోహన్ రెడ్డి ఆయన సతీమణి భారతితో కలసి రీజినల్ పాస్ పోర్టు కార్యాలయంలో.. పాస్ పోర్టు రెన్యువల్కు సంబంధించి డాక్యుమెంట్లను, ఆధారాలను సమర్పించారు. ఇద్దరు వేలి ముద్రలు వేసి, ఐరీష్ పూర్తి చేశారు. పాస్ పోర్టు రెన్యువల్ ప్రక్రియను అధికారులు కేవలం 20 నిముషాల వ్యవధిలో పూర్తి చేశారు.
|
|