శేషాచలంలో అరుదైన బంగారు బల్లి.. వైల్డ్ లైఫ్ ఫొటోగ్రాఫర్ల కంటపడిన బల్లి

తిరుమల శ్రీవారు కొలువై ఉన్న శేషాచలం అడవుల్లో అరుదైన జాతికి చెందిన బంగారు బల్లి (గోల్డెన్‌ గెకో) కనిపించింది. గురువారం వైల్డ్‌లైఫ్‌ ఫొటోగ్రాఫర్లకు కంటపడింది. అటవీశాఖ షెడ్యూల్‌-1 కింద పరిగణిస్తున్న బంగారు బల్లి చీకటి ప్రదేశాల్లో, రాతిబండల్లో ఎక్కువగా నివసిస్తుందని చెబుతుంటారు. ఈ బల్లి చూడటానికి పసిడి వర్ణంలో మెరిసిపోతూ ఉంటుంది.. ఇటీవల కాలంలో ఈ బల్లుల జాడ ఇటీవల లేకుండా పోయింది. తాజాగా కల్యాణి డ్యాం పరిధిలో ఈ బల్లి కనిపించింది.

తిరుమల శ్రీవారి కొలువై ఉన్న శేషాచలం అడవుల్లో ఎన్నో జీవ రాశులు ఉన్నాయి. అరుదైన జంతవులు, పక్షులు కనిపిస్తుంటాయి.. ఇప్పుడు తాజాగా ఈ బల్లి కనిపించింది. తిరుమల శ్రీవారి ఆలయానికి 6 కిలోమీటర్ల దూరంలో ఉన్న శిలా తోరణం సమీపంలో ఉన్న చక్ర తీర్థంలో ఈ బంగారు బల్లి ఉందని చెబుతున్నారు. దీనిపై తిరుపతి శ్రీ వేంకటేశ్వర విశ్వవిద్యాలయంలోని జూవాలజీ విభాగం ప్రొఫెసర్ డాక్టర్ ఎం రాజశేఖర్ కూడా పరిశోధన చేశారు. ఈ బంగారు బల్లిని గోల్డెన్ గేకోగా పిలుస్తారు. ఈ బల్లి శాస్త్రీయ నామం Colodacty Lodes 

ఈ బల్లి రాత్రి వేళల్లో ఎక్కువగా సంచరిస్తుంటాయి.. బంగారు వర్ణంలో ముదురు పసుపు, లేత పసుపు రంగులో ఈ బల్లులు ఉంటాయి. ఈ బల్లులు 150 మిల్లీమీటర్ల నుంచి 180 మిల్లీ మీటర్లకు వరకు పొడవు ఉంటాయని చెబుతున్నారు. సూర్యరశ్మి పడని, వేడి తగలని ప్రదేశంలో ఈ బంగారు బల్లులు ఎక్కువగా జీవిస్తూ ఉంటాయి. చిన్నపాటి సందులుగా ఉండే రాతి గృహాలు వీటికి నివాస స్థలాలు అని చెబుతున్నారు. రాతి సందుల్లో తేమ ప్రదేశాలు ఉంటే వాటికి బాగా ఇష్టమట.. సాధారణంగా చీకటి పడ్డాక బయటకు వస్తుంటాయంటున్నారు.

ఇటీవల శేషాచలం అడవుల్లో అరుదైన కప్ప కూడా కనిపించింది. శ్రీలంకలో కనిపించే అరుదైన జాతికి చెందిన శ్రీలంకన్‌ స్యూడో ఫిలేటస్‌ రిజియస్‌ కప్ప ప్రత్యక్షమైంది. ఈ కప్పను గోధుమ రంగు చెవి పొద కప్ప అని పిలుస్తుంటారు. ఈ కప్ప శ్రీలంక ద్వీపంలో నీటి ఆధారిత ప్రాంతాల్లో ఎక్కువగా కనిపిస్తుంది.. అయితే రెండు నెలల క్రితం శేషాచలం అడవుల్లోని తలకోన జలపాతం ప్రాంతంలో కనిపించింది. తాజాగా ఈ బంగారు బల్లి శేషాచలం అడవుల్లో కనిపించింది. శేషాచలం అటవీ ప్రాంతం ఉమ్మడి చిత్తూరు జిల్లాలోని తిరుపతి, తిరుమల, కడప జిల్లా (కొంత భాగం) పరిధిలో విస్తరించి ఉంటాయి. తిరుమల క్షేత్రం ఎత్తైన కొండ ప్రాంతంలో ఉంటుంది.. ఇది కూడా శేషాచలం అటవీ ప్రాంతం కిందకు వస్తుందని చెబుతుంటారు.