వైసీపీకి కి ఘంటా దంపతులు గుడ్ బై

ఏలూరు జిల్లాలో వైఎస్సార్‌సీపీకి మరో గట్టి ఎదురుదెబ్బ తగిలింది. జిల్లాకు చెందిన ముఖ్య నేతలు వరుసగా పార్టీకి గుడ్ బై చెబుతున్నారు. మాజీ మంత్రి ఆళ్ల నాని, ఏలూరు కార్పొరేషన్ ఛైర్మన్, కార్పొరేటర్లు వైఎస్సార్‌సీపీకి రాజీనామా చేశారు. వీరిలో ఏలూరు కార్పొరేషన్ ఛైర్మన్, కార్పొరేటర్లు టీడీపీలో చేరిన సంగతి తెలిసిందే. తాజాగా వైఎస్సార్‌సీపీకి మరో ఎదురు దెబ్బ తగిలింది.. ఉమ్మడి పశ్చిమగోదావరి జిల్లా జడ్పీ ఛైర్‌పర్సన్‌ ఘంటా పద్మశ్రీ, ఆమె భర్త వైఎస్సార్‌సీపీ బీసీ సెల్‌ జిల్లా అధ్యక్షుడు ప్రసాదరావు పార్టీకి రాజీనామా చేశారు. దంపతులిద్దరు తమ రాజీనామా లేఖలను పార్టీ అధినేత జగన్‌ మోహన్‌రెడ్డికి పంపించారు.. తాము జనసేన పార్టీలో చేరబోతున్నట్లు ప్రకటించారు.

గత పదమూడేళ్లుగా వైఎస్సార్‌సీపీ పని చేశానని.. కొన్ని వ్యక్తిగత కారణాలతో పార్టీ సభ్యత్వానికి రాజీనామా చేశానన్నారు జెడ్పీ ఛైర్ పర్సన్ పద్మశ్రీ . డిప్యూటీ సీఎం పవన్‌ కళ్యాణ్ పంచాయతీల కోసం బాగా పని చేస్తున్నారని.. ఆయన నేతృత్వంలో జిల్లా పరిషత్తు ద్వారా ప్రజలకు సేవలందిస్తామన్నారు. జిల్లాలో గ్రామాల అభివృద్ధికి ఇదొక మంచి అవకాశమని.. అందుకే తాము త్వరలో జనసేన పార్టీలో చేరుతున్నట్లు ప్రకటించారు. వ్యక్తిగత కారణాలతోనే వైఎస్సార్‌సీపీ పదవికి, సభ్యత్వానికి రాజీనామా చేసినట్లు ఘంటా ప్రసాదరావు తెలిపారు.

ఏలూరు జిల్లాలో వైఎస్సార్‌సీపీకి వరుసగా ఎదురు దెబ్బలు తప్పడం లేదు. ఇటీవల మాజీ మంత్రి, ఏలూరు జిల్లా అధ్యక్షుడు ఆళ్ల నాని వైఎస్సార్‌సీపీకి రాజీనామా చేశారు. ఏలూరు మేయరు నూర్జహాన్, పెదబాబు దంపతులు కూడా రాజీనామా చేసి టీడీపీలో చేరారు.. ఇప్పుడు ఉమ్మడి జిల్లా జడ్పీ ఛైర్‌పర్సన్‌ దంపతులు పార్టీని వీడారు. ఇలా వరుసగా నేతలు పార్టీని వీడటం ఇబ్బందిగా మారింది. వీరితోపాటుగా ఏలూరు నియోజకవర్గ ముఖ్య నేతలు ఇడా మాజీ ఛైర్మన్‌ బొద్దాని శ్రీనివాస్, ఏలూరు మార్కెట్‌ కమిటీ మాజీ ఛైర్మన్‌ మంచెం మైబాబు కూడా పార్టీకి గుడ్ బై చెప్పారు. ఏలూరు కార్పొరేషన్‌‌లో 19మంది కార్పొరేటర్లు టీడీపీలో చేరారు. బొద్దాని మైబాబు కూడా చంద్రబాబు సమక్షంలో పసుపు కండువా కప్పుకున్నారు.

ఉమ్మడి పశ్చిమ గోదావరి జిల్లా పరిషత్తు ఛైర్‌ పర్సన్‌ పద్మశ్రీ పార్టీకి రాజీనామా చేయడంతో రాజకీయాలు ఆసక్తికరంగా మారాయి. జిల్లాలో మొత్తం 48మంది జెడ్పీటీసీ స్థానాలు ఉంటే.. వైఎస్సార్‌సీపీకి 46మంది, టీడీపీకి ఒకటి, జనసేన పార్టీకి ఒక కార్పొరేటర్ ఉన్నారు. ఇప్పుడు జెడ్పీ ఛైర్ పర్సన్ రాజీనామా చేయడంతో.. మరికొందరు జెడ్పీటీసీలు కూడా వైఎస్సార్‌సీపీని వీడతారనే చర్చ మొదలైంది. ఇప్పటికే ఏలూరు కార్పొరేషన్ టీడీపీ ఖాతాలోకి చేరింది.. జిల్లా పరిషత్‌పై కూడా కూటమి జెండా ఎగిరే అవకాశం ఉందనే ఊహాగానాలు మొదలయ్యాయి.