దూకుడు పెంచిన హైడ్రా.... నగరం నలుమూల అక్రమ నిర్మాణాలు కూల్చివేత

గ్రేటర్ హైదరాబాద్ పరిధిలోని పలు అక్రమ కట్టడాలపై హైడ్రా ఉక్కుపాదం మోపుతోంది. గతకొన్ని రోజులుగా వందల సంఖ్యలో అక్రమ నిర్మణాలు నేలమట్టం చేసిన హైడ్రా.. ఇవాళ ఉదయం నుంచి పలు చోట్ల కూల్చివేతలు చేపట్టింది. సంగారెడ్డి జిల్లా అమీన్‌పూర్ పెద్ద చెరువు ఎఫ్‌టీఎల్, బఫర్ జోన్లలో అక్రమ నిర్మాణాలను హైడ్రా అధికారులు కూల్చేస్తున్నారు. ఈ అక్రమ నిర్మాణాలు ఏపీకి చెందిన ఓ మాజీ ఎమ్మెల్యేవిగా తెలిసింది.

వైసీపీకి చెందిన కర్నూలు జిల్లా పాణ్యం మాజీ ఎమ్మెల్యే కాటసాని రాంభూపాల్ రెడ్డికి సంబంధించిన నిర్మాణాలను హైడ్రా అధికారులు నేలమట్టం చేస్తున్నారు. ఇక్కడ అక్రమంగా నిర్మాణాలు చేపట్టారని వారం క్రితం స్థానికులు హైడ్రాకు ఫిర్యాదు చేశారు. దీంతో హైడ్రా కమిషనర్ రంగనాథ్ క్షేత్రస్థాయిలో పర్యటించి రెవెన్యూ రికార్డులు పరిశీలించారు. అక్రమ నిర్మాణాలు అని తెలియటంతో వాటిని నేలమట్టం చేస్తున్నారు. వాణి నగర్‌లోని పలు నిర్మాణాలను కూడా హైడ్రా అధికారులు కూల్చేశారు.

ఇక మేడ్చల్ జిల్లా దుండిగల్‌లోని మల్లంపేట కత్వా చెరువు ఎఫ్‌టీఎల్‌ను ను ఆక్రమంచి నిర్మించిన 21 విల్లాలను హైడ్రా అధికారులు కూల్చేస్తున్నారు. శ్రీ లక్ష్మీ శ్రీనివాస నిర్మాణ సంస్థ ఈ నిర్మాణాలు చేపట్టగా.. వాటిని కూల్చేస్తున్నారు. కూల్చివేతలను అడ్డుకునేందుకు నిర్మాణ సంస్థకు చెందిన గుర్రం విజయలక్ష్మి ప్రయత్నించగా.. పోలీసులు ఆమెను అదుపులోకి తీసుకున్నారు. అనంతరం రూ. కోట్లు విలువచేసే విల్లాలను హైడ్రా అధికారులు నేలమట్టం చేశారు.

ఇక హైదరాబాద్ మాదాపూర్‌లో చేపట్టిన కూల్చివేతలు ఉద్రిక్తతకు దారి తీశాయి. సున్నపు చెరువు వద్ద అక్రమ నిర్మాణలను హైడ్రా అధికారులు ఉదయం నుంచి కూల్చేస్తున్నారు. దీంతో నిర్మాణాలు చేపట్టిన పలువురు అడ్డుకునే ప్రయత్నం చేశారు. హైడ్రా అధికారులు వెనక్కి తగ్గకపోవటంతో.. పలువురు ఒంటిపై పెట్రోల్ పోసుకొని ఆత్మహత్య చేసుకుంటామని బెదిరించారు. ఎలాంటి ముందస్తు నోటీసులు ఇవ్వకుండా నిర్మాణాలు ఎలా కూల్చివేస్తారని అధికారులను నిలదీస్తున్నారు. రంగంలోకి దిగిన పోలీసులు వారిని అదుపులోకి తీసుకున్నారు. సున్నం చెరువు మెుత్తం 26 ఎకరాల్లో విస్తరించి ఉండగా.. దాదాపు చెరువు మెుత్తాన్ని కబ్జా చేసినట్లు గుర్తించారు. దీంతో పక్కా ఆధారంలో రంగంలోకి దిగిన హైడ్రా కూల్చివేతలు ప్రారంభించారు.