గర్ల్‌ఫ్రెండ్‌తో సినిమాకెళ్లిన యువకుడికి కత్తిపోటు.. దాడి చేసిన వ్యక్తితో అమ్మాయి పరార్

ఆధ్యాత్మిక నగరం తిరుపతిలో శనివారం కత్తిపోట్లు కలకలం రేపాయి. ఓ విద్యార్థిపై మరో విద్యార్థి సినిమా థియేటర్‌లోనే కత్తితో దాడి చేయడం సంచలనం రేపింది. అయితే ఈ ఘటనలో అనేక ఆసక్తికర విషయాలు వెలుగులోకి వస్తున్నాయి. ముందుగా వివరాల్లోకి వెళ్తే.. తిరుపతిలోని పీజీఆర్ థియేటర్.. స్క్రీన్ మీద బొమ్మ పడుతోంది. ప్రేక్షకులు అందరూ సినిమాలో లీనమై ఉన్నారు. కాలేజీలో తనతోపాటుగా చదివే అమ్మాయితో కలిసి సినిమా చూడ్డానిక వచ్చాడో యువకుడు. ఇద్దరూ కలిసి సినిమా చూస్తున్నారు. వీరితో పాటుగా ప్రేక్షకులు కూడా మూవీలో లీనమైపోయారు. అప్పుడే అకస్మా్త్తుగా ఎవరూ ఊహించని ఘటన జరిగింది. వెనుక నుంచి దూసుకొచ్చిన ఓ కత్తి.. ఆ యువకుడి పొట్టలో దిగింది. దీంతో యువకుడి ఆర్తనాదాలు, ప్రేక్షకుల హాహాకారాలతో థియేటర్ దద్దరిల్లిపోయింది. అయితే ఘటన తర్వాత ఆ యువకుడితో కలిసి సినిమా చూడ్డానికి వచ్చిన అమ్మాయి.. కత్తితో దాడి చేసిన యువకుడితో కలిసి అక్కడి నుంచి వెళ్లిపోవటం గమనార్హం.

తిరుపతిలోని పీజీఆర్ థియేటర్‌లో ఈ ఘటన జరిగింది. పోలీసులు తెలిపిన వివరాల ప్రకారం ప్రకాశం జిల్లా గిద్దలూరుకు చెందిన లోకేష్ అనే యువకుడు రంగంపేటలోని ఓ కాలేజీలో చదువుతున్నాడు. ఇక అదే కాలేజీలో చదువుతున్న మరో యువతితో కలిసి లోకేష్ సినిమా చూడ్డానికి వచ్చాడు. అయితే సినిమా చూస్తున్న సమయంలో కార్తీక్ అనే యువకుడు లోకేష్ మీద కత్తితో దాడి చేశాడు. అనంతరం యువతి, కార్తీక్ అక్కడి నుంచి వెళ్లిపోయారు. ఊహించని విధంగా జరిగిన ఈ ఘటనతో సినిమా చూడ్డానికి వచ్చిన ప్రేక్షకులు భయపడిపోయారు. స్థానికులు ఇచ్చిన సమాచారంతో అక్కడికి చేరుకున్న పోలీసులు.. గాయపడిన లోకేష్‌ను ఆస్పత్రికి తరలించారు.

అయితే ఘటన తర్వాత దాడి చేసిన కార్తీక్‌తో కలిసి యువతి పారిపోవటంపై అనుమానాలు వ్యక్తమవుతున్నాయి. ఇదే సమయంలో లోకేష్‌కు సినిమా టికెట్లను కూడా ఆ యువతి బుక్ చేసినట్లు తెలుస్తోంది. ఈ నేపథ్యంలో పక్కా ప్లాన్ ప్రకారమే దాడి జరిగిందని పోలీసులు అనుమానపడుతున్నారు. లోకేష్ మీద దాడి చేసిన యువకుడు కార్తీక్‌తో పాటుగా ఆ యువతి కూడా సూళ్లూరుపేటకు చెందినవారిగా పోలీసులు గుర్తించారు. ప్రేమ వ్యవహారమే ఈ దాడికి కారణమా అనే కోణంలో దర్యాప్తు జరుపుతున్నారు. గాయపడిన లోకేష్‌ను రుయా ఆస్పత్రికి తరలించి చికిత్స అందిస్తున్నారు. అయితే సినిమా థియేటర్‌లో ఏర్పాటు చేసిన సీసీ కెమెరాల్లో కార్తీక్, యువతి కలిసి పారిపోవటం, ఆ వెనుక లోకేష్ కత్తిగాట్లతో నడుస్తూ వెళ్లడం రికార్డైంది. ఈ ఘటనపై పోలీసులు దర్యాప్తు కొనసాగిస్తున్నారు.