కంటైనర్‌ టెర్మినల్‌లో ప్రమాదం.. పక్కనే రజనీకాంత్ సినిమా షూటింగ్

విశాఖపట్నం కంటైనర్ టెర్మినల్‌లో శనివారం మధ్యాహ్న సమయంలో అగ్నిప్రమాదం జరిగింది. బీచ్ రోడ్డులో ఉన్న కంటైనర్ టెర్మినల్‌లో మంటలు చెలరేగాయి. చైనా నుంచి వచ్చిన ఓ కంటైనర్‌లో మధ్యాహ్న సమయంలో అకస్మాత్తుగా మంటలు చెలరేగాయి. దీంతో ఆ ప్రాంతంలో దట్టమైన పొగ అలుముకుంది. దీంతో అక్కడ పనిచేస్తున్న కార్మికులు, సిబ్బంది భయంతో పరుగులు తీశారు. వెంటనే ఫైర్ సిబ్బందికి సమాచారం అందించారు.సమాచారం అందుకున్న వెంటనే ఫైరింజన్‌తో అక్కడకు చేరుకున్న అగ్నిమాపక సిబ్బంది.. మంటలను నియంత్రించారు. అయితే చైనా నుంచి వచ్చిన ఈ కంటైనర్‌లో లిథియం బ్యాటరీలు ఉన్నట్లు తెలిసింది. ఈ కంటైనర్ గత నెలలో ఇక్కడకు వచ్చినట్లు సమాచారం.

ఆగస్ట్ 28వ తేదీన చైనా నుంచి ఈ కంటైనర్ లిథియం బ్యాటరీలతో కంటైనర్ టెర్మినల్‌కు వచ్చింది. ఈ కంటైనర్ కోల్‌కతాకు వెళ్లాల్సి ఉందని తెలిసింది.ఈ క్రమంలోనే ట్రాలర్‌పై లోడ్ చేస్తుండగా.. కొద్ది్సేపటికే కంటైనర్‌లో మంటలు వచ్చాయి. అయితే ఎలాంటి భారీ నష్టం జరగపోవటంతో అందరూ ఊపిరి పీల్చుకున్నారు. మరోవైపు కంటైనర్ టెర్మినల్‌లో అగ్ని ప్రమాదం గురించి అంతర్గత విచారణ జరుగుతున్నట్లు తెలిసింది. మంటలు ఎలా వచ్చాయనే దానిపై ఆరా తీస్తున్నట్లు సమాచారం. ఇక ప్రమాదం జరిగిన ప్రాంతానికి సమీపంలోనే సూపర్‌స్టార్ రజనీకాంత్ సినిమా షూటింగ్ జరుగుతున్నట్లు తెలిసింది.

సూపర్ స్టార్ రజనీకాంత్ ప్రస్తుతం కూలీ అనే సినిమాలో నటిస్తున్నారు. ఈ సినిమా షూటింగ్ గత పదిరోజులుగా ఇక్కడే జరుగుతున్నట్లు తెలిసింది. ప్రమాదం గురించి తెలిసిన వెంటనే టీమ్ మొత్తం అప్రమత్తమైనట్లు సమాచారం. దీంతో అక్కడి నుంచి మరో ప్రాంతానికి వెళ్లిపోయినట్లు తెలిసింది. లోకేష్ కనగరాజ్ డైరెక్షన్‌లో కూలీ సినిమా రూపుదిద్దుకుంటోంది. సినిమా షూటింగ్‌లో భాగంగా విశాఖపట్నం పోర్టు ఏరియాలో చిత్రీకరణ జరుపుతున్నారు. అయితే ప్రమాదం గురించి తెలిసిన వెంటనే మూవీ యూనిట్ ఆందోళన వ్యక్తం చేసినట్లు తెలిసింది. దీంతో అక్కడి నుంచి మరో చోటుకు వెళ్లిపోయినట్లు సమాచారం.