బంగారుపాళ్యంలో డయాలసిస్ సెంటర్ ఏర్పాటు,,,,ఇచ్చిన మాట నిలబెట్టుకున్న నారా లోకేష్

ఆంధ్రప్రదేశ్ మంత్రి నారా లోకేష్ ఇచ్చిన మాటను నిలబెట్టుకున్నారు. యువగళం పాదయాత్ర సందర్భంగా ఇచ్చిన హామీని నెరవేర్చారు. లోకేష్ చిత్తూరు జిల్లా కుప్పం నుంచి యువగళం.. మనగళం నినాదంతో పాదయాత్ర ప్రారంభించారు. ఇలా పాదయాత్ర పూర్తయిన ప్రతి వంద కిలో మీటర్ల దగ్గర ఒక శిలాఫలకాన్ని ఆవిష్కరించిన సంగతి తెలిసిందే. మొదటి వంద కిలోమీటర్లు మైలురాయిని చిత్తూరు జిల్లా బంగారుపాళ్యంలో పూర్తి చేసుకుంది. ఈ సందర్భంగా రాష్ట్రంలో తమ ప్రభుత్వం వచ్చిన 100 రోజుల్లో గ్రామంలో డయాలసిస్‌ కేంద్రాన్ని ఏర్పాటుచేస్తామని లోకేష్ శిలాఫలకంలో పొందుపరిచి ఆవిష్కరించారు.

మంత్రి హోదాలో ఇచ్చిన మాట ప్రకారం వంద రోజుల్లో ఇక్కడి ప్రభుత్వ ఆస్పపత్రిలో డయాలసిస్‌ కేంద్రాన్ని ఏర్పాటు చేస్తున్నారు. దీనికి సంబంధించి కావాల్సిన యంత్రాలు, పడకలు, ప్రత్యేకమైన నీటి శుద్ధి పరికరాలను కేంద్రంలో ఏర్పాటు చేశారు అధికారులు. గతంలో బంగారుపాళ్యంతో పాటు అరగొండ, ఐరాల తదితర ప్రాంతాలకు చెందిన 72 మంది డయాలసిస్‌ రోగులు ప్రస్తుతం చిత్తూరుకు వెళ్లి డయాలసిస్‌ చేయించుకుంటున్నారు. ఈ కేంద్రం పూర్తిస్థాయిలో ఏర్పాటైతే వారందరికీ ఉపయోగకరమని ఆసుపత్రి సిబ్బంది తెలిపారు.

ఏపీలో వరద బాధితుల సహాయార్థం మోల్డ్‌ టెక్‌ ప్యాకేజింగ్‌ లిమిటెడ్‌ విరాళం అందజేసింది. మంత్రి నారా లోకేష్‌కు హైదరాబాద్‌లోని నివాసంలో ఆ సంస్థలో ఉపాధ్యక్షుడు ఆదివిష్ణు సందీప్‌ రూ.25 లక్షల విరాళం అందించారు. అలాగే ప్రీయూనిక్‌ సంస్థ డైరెక్టర్‌ అనిల్‌కుమార్‌ చిగురుపాటి రూ.15 లక్షల విరాళం చెక్కును, ప్రముఖ గుండె వైద్య నిపుణుడు గోపాలకృష్ణ గోఖలే రూ.10 లక్షల చెక్కును మంత్రికి అందించారు. అంతేకాదు వరద బాధితులను ఆదుకునేందుకు దివీస్ సంస్థ రూ.5 కోట్ల భారీ విరాళం ప్రకటించింది. ఆ సంస్థ సీఈవో దివి కిరణ్ హైదరాబాద్‌లో మంత్రి నారా లోకేష్‌ను కలిసి చెక్కును అందజేశారు. వీటితో పాటుగా దివీస్‌ సంస్థ ఈ నెల 1 నుంచి 8వ తేదీ వరకు వరద బాధితులకు ఆహారాన్ని అందజేసేందుకు అక్షయపాత్ర ఫౌండేషన్‌కు మరో రూ.4.8 కోట్లను అందజేసింది.