ఢిల్లీ సీఎం పదవికి రాజీనామా చేసిన కేజ్రీవాల్.. అతిషీ ప్రమాణ స్వీకారం అప్పుడే

ఢిల్లీలో అసెంబ్లీ ఎన్నికలకు ముందు అధికార ఆమ్ ఆద్మీ పార్టీలో కీలక మార్పులు చోటు చేసుకుంటున్నాయి. ఢిల్లీ లిక్కర్ పాలసీ కేసులో మార్చి 21వ తేదీన అరెస్ట్ అయి జైలుకు వెళ్లిన ఆమ్ ఆద్మీ పార్టీ నేషనల్ కన్వీనర్ అరవింద్ కేజ్రీవాల్.. రాజీనామా చేయకుండానే జైలు నుంచే పాలన కొనసాగించారు. అయితే ఇటీవల బెయిల్‌ మంజూరు కావడంతో తీహార్ జైలు నుంచి బయటికి వచ్చిన కేజ్రీవాల్ సంచలన ప్రకటన చేశారు. 2 రోజుల్లో తాను రాజీనామా చేయనున్నట్లు ప్రకటించిన కేజ్రీవాల్.. ఇవాళ సాయంత్రం ఢిల్లీ లెఫ్టినెంట్ గవర్నర్ వీకే సక్సేనాను కలిసి తన రాజీనామాను అందించారు. ఈ క్రమంలోనే ఇవాళ ఉదయమే ఆప్ శాసనసభాపక్ష నేతగా అతిషీ మార్లేనాను ఎమ్మెల్యేలు ఎన్నుకున్నారు. కేజ్రీవాల్ రాజీనామా ఎల్జీ ఆమోదం పొందిన తర్వాత ఢిల్లీ సీఎంగా అతిషీ మార్లేనా ప్రమాణం చేయనున్నారు.

ముందు చెప్పిన విధంగానే మంగళవారం సాయంత్రం ఢిల్లీ లెఫ్టినెంట్‌ గవర్నర్‌ వీకే సక్సేనాకు కేజ్రీవాల్ తన రాజీనామాను సమర్పించారు. ఎల్జీకి కేజ్రీవాల్ రాజీనామా లేఖ అందించే సమయంలో ఆయనతోపాటు ఢిల్లీ తదుపరి ముఖ్యమంత్రిగా ఎన్నికైన అతిషీ.. ఇతర మంత్రులు కూడా ఉన్నారు.

అయితే అతిషీ మంత్రివర్గంలో డిప్యూటీ సీఎం పదవి ఉండదని ఆప్ వర్గాల ద్వారా తెలుస్తోంది. మరోవైపు.. సెప్టెంబర్ 26, 27 తేదీల్లో ఢిల్లీ అసెంబ్లీ ప్రత్యేక సమావేశాలు జరగనున్నట్లు సమాచారం. ఆ ప్రత్యేక సమావేశాల్లోనే ఢిల్లీ ముఖ్యమంత్రిగా అతిషీ ప్రమాణ స్వీకారం చేసే అవకాశాలు కనిపిస్తున్నాయి. అప్పటివరకు ఢిల్లీకి ఆపద్ధర్మ ముఖ్యమంత్రిగా కేజ్రీవాల్ వ్యవహరించనున్నారు.

 ఇక అతిషీని ఢిల్లీ కొత్త ముఖ్యమంత్రిగా ఎంపిక చేయడంపై మంత్రి గోపాల్‌ రాయ్‌ స్పందించారు. ఆమ్ ఆద్మీ పార్టీకి ఏర్పడిన ప్రస్తుత పరీక్ష కాలంలో అతిషీకి ముఖ్యమంత్రి బాధ్యతలు అప్పగించామని పేర్కొన్నారు. ఢిల్లీ ప్రభుత్వాన్ని అస్థిరపరిచేందుకు ఏజెన్సీలను దుర్వినియోగం చేస్తున్నారని గోపాల్ రాయ్ ఆరోపించారు. అలాంటి ప్రయత్నాలను ఆప్‌ భగ్నం చేసిందని తేల్చి చెప్పారు.