ఏపీలో ఈ నెల 25న వారందరి అకౌంట్లోకి డబ్బులు.. చంద్రబాబు ఆదేశాలు
Andhra Pradesh Telugu | Suryaa Desk | Published : Sat, Sep 21, 2024, 09:52 PM
వరద బాధితులకు పరిహారం చెల్లింపుపై సీఎం చంద్రబాబు నాయుడు కీలక నిర్ణయం తీసుకున్నారు. ఈ నెల 25 (సెప్టెంబర్ 25) పరిహారం అందించాలని సీఎం చంద్రబాబు నాయుడు నిర్ణయం తీసుకున్నారు. ఎన్యుమరేషన్ ప్రక్రియ, పరిహారం చెల్లింపుపై చంద్రబాబు ఇవాళ సమీక్ష జరిపారు. ఈ సందర్భంగా ఇప్పటికే వరద నష్టంపై అంచనా ప్రక్రియ పూర్తి అయినట్లు అధికారులు చంద్రబాబుకు తెలియజేశారు. దీంత ఈ నెల 25న బాధితుల అకౌంట్లలోకి పరిహారం డబ్బులు జమచేయాలని చంద్రబాబు అధికారులను ఆదేశించారు.
మరోవైపు వరద బాధితులకు సీఎం చంద్రబాబు నాయుడు ఇటీవలే పరిహారం ప్యాకేజీ ప్రకటించారు. ఇందులో భాగంగా విజయవాడలో వరదకు మునిగిన ఇళ్లల్లో గ్రౌండ్ ఫ్లోర్ వారికి రూ.25 వేలు, ఫస్ట్ ఫ్లోర్, ఆపై అంతస్తుల వారికి పది వేల రూపాయలు చొప్పున పరిహారం అందిస్తామని ప్రకటించారు.
భారీ వర్షాలు, వరదల కారణంగా చనిపోయిన పశువులకు, నష్టపోయిన చిరు వ్యాపారులకు, పంటలకు సైతం చంద్రబాబు పరిహారం ప్రకటించారు. ఆ నిర్ణయం ప్రకారమే అన్ని వర్గాల బాధితులకు ఈ నెల 25న పరిహారం చెల్లించాలని చంద్రబాబు అధికారులను ఆదేశించారు. పరిహారం డబ్బులను వారి బ్యాంకు ఖాతాల్లో జమచేయాలని సూచించారు. పరిహారం చెల్లింపు విషయంలో ఎలాంటి ఫిర్యాదులు వచ్చేందుకు అవకాశం ఇవ్వరాదని స్పష్టం చేశారు. వరదల్లో దెబ్బతిన్న వాహనాల ఇన్సూరెన్స్‌ కూడా త్వరితగతిన పూర్తి అయ్యేలా చూడాలని అధికారులను ఆదేశించారు.
|
|