లైంగిక దాడి నిందితుడు ఎన్‌కౌంటర్‌లో హతం.. మహారాష్ట్రలో సంచలనం

మహారాష్ట్రలోని థానేలో స్కూలు పిల్లలపై లైంగిక దాడికి పాల్పడిన నిందితుడు ఎన్‌కౌంటర్‌లో హతమయ్యాడు. థానే జిల్లా బద్లాపూర్‌లో ఓ ప్రైవేట్ పాఠశాలలో స్వీపర్‌గా పనిచేసే అక్షయ్ షిండే (23) అదే పాఠశాలలో ఇద్దరు చిన్నారులపై లైంగిక దాడికి పాల్పడిన ఘటన సంచలనం సృష్టించింది. పాఠశాల టాయిలెట్‌లో చిన్నారులపై నిందితుడు లైంగిక దాడికి పాల్పడ్డాడు. ఆగస్టు 12, 13 తేదీల్లో ఈ ఘటన జరిగింది. ప్రైవేట్ పార్ట్స్ వద్ద నొప్పిగా ఉందని చిన్నారులు చెప్పడంతో ఆరా తీసిన తల్లిదండ్రులకు షాకింగ్ విషయం తెలిసింది. ఈ విషయం బయటికి రావడంతో ఆగ్రహజ్వాలలు పెల్లుబికాయి. తల్లిదండ్రుల ఆందోళనలతో బద్లాపూర్ అట్టుడుకుంది. నిందితుడిని తమకు అప్పగించాలని, అందరూ చూస్తుండగా ఉరి తీయాలని డిమాండ్ చేశారు.

ఈ ఘటనపై కేసు నమోదు చేసిన పోలీసులు అక్షయ్ షిండేను అరెస్టు చేసి జైలుకు పంపారు. తలోజా జైలులో ఉన్న నిందితుడిని కేసు విచారణలో భాగంగా సోమవారం (సెప్టెంబర్ 23) మధ్యాహ్నం బద్లాపూర్‌కు తీసుకొస్తున్న సమయంలో అతడు పోలీసులపై తిరగబడ్డాడు. ఓ పోలీసు అధికారి తుపాకీ లాక్కొని కాల్పులు జరుపుతూ పారిపోయేందుకు ప్రయత్నించాడని, పోలీసులు జరిపిన ఎదురు కాల్పుల్లో అతడు మరణించాడని అధికారులు తెలిపారు.

ఘటనలో తీవ్రంగా గాయపడిన నిందితుడిని చికిత్స నిమిత్తం ఆసుపత్రికి తీసుకెళ్లగా మృతి చెందినట్లు వైద్యులు నిర్ధారించారని పోలీసులు తెలిపారు. నిందితుడు జరిపిన కాల్పుల్లో ఇద్దరు పోలీసులు గాయపడ్డారని, వారు చికిత్స పొందుతున్నారని వెల్లడించారు. పోలీసుల ఎదురు కాల్పుల్లో నిందితుడు మరణించాడని మహారాష్ట్ర డిప్యూటీ సీఎం దేవేంద్ర ఫడ్నవీస్ ధ్రువీకరించారు.

మొదటి భార్య పెట్టిన కేసులో..

బద్లాపూర్‌ పాఠశాల అత్యాచార ఘటనకు సంబంధించి విచారణ కొనసాగుతుండగానే.. నిందితుడు అక్షయ్‌ షిండేపై అతడి మొదటి భార్య కేసు పెట్టింది. ఈ కేసులో ప్రశ్నించేందుకు పోలీసులు నిందితుడిని తలోజా జైలు నుంచి వాహనంలో తీసుకొని బద్లాపూర్‌కు బయల్దేరారు. మార్గమధ్యంలో ముంబ్రా బైపాస్‌ వద్ద వాహనంలో ఉన్న ఓ పోలీసు అధికారి తుపాకీని లాక్కొని కాల్పులకు పాల్పడ్డాడని పోలీసులు తెలిపారు. అప్రమత్తమైన మరో పోలీస్‌ అధికారి నిందితుడిపై కాల్పులు జరిపాడని, తీవ్రంగా గాయపడిన నిందితుడిని ఆసుపత్రికి తరలించగా.. అక్కడ ప్రాణాలు కోల్పోయాడని వెల్లడించారు.

మరోవైపు.. పోలీసులు ప్రణాళిక ప్రకారమే తన కుమారుడిని చంపేశారని నిందితుడు అక్షయ్ షిండే తల్లి ఆరోపించారు. తన కుమారుడిని జైలు నుంచి తీసుకొచ్చి చంపేసి, ఎన్‌కౌంటర్ అంటూ కట్టుకథ అల్లారని ఆమె ఆరోపిస్తున్నారు. కిందటి వారమే తన కుమారుడిని ములాఖత్‌ ద్వారా కలిశానని.. పోలీసులు తనను తీవ్రంగా కొట్టారని చెప్పి బాధపడ్డాడని ఆమె చెప్పారు.