నా కుమారుడికి టపాసులంటేనే భయం.. పోలీసుల గన్ లాక్కున్నాడా?: థానే నిందితుడి తల్లి

మహారాష్ట్రలోని థాణె జిల్లా బద్లాపుర్‌ పాఠశాలలో ఇద్దరు చిన్నారులపై లైంగిక దాడికి పాల్పడిన నిందితుడ్ని పోలీసులు సోమవారం ఎన్‌కౌంటర్ చేశారు. నిందితుడు అక్షయ్ షిండేపై (23) అతడి మొదటి భార్య పెట్టిన కేసు విచారణలో భాగంగా తలోజా జైలు నుంచి బద్లాపుర్‌కు తీసుకొస్తున్న సమయంలో అతడి తమపై తిరగబడ్డాడని, ఓ పోలీసు అధికారి తుపాకీ లాక్కుని కాల్పులు జరపడంతో ఎదురు కాల్పులు జరిపినట్టు పోలీసులు వెల్లడించారు. ఈ క్రమంలోనే తీవ్రంగా గాయపడిన నిందితుడిని ఆసుపత్రికి తరలించగా మృతి చెందినట్లు తెలిపారు. అయితే, పోలీసుల వాదనలను నిందితుడు తల్లి అల్కా షిండే తోసిపుచ్చారు. అసలు తన కుమారుడికి తుపాకి పట్టుకోవడమే రాదని, అలాంటిది పోలీసులపైనే ఎలా కాల్పలు జరుపుతాడని ఆమె ప్రశ్నించారు.

 ఓ మీడియాకు ఇచ్చిన ఇంటర్వ్యూలో అల్కా షిండే మాట్లాడుతూ.. ‘సోమవారం సాయంత్రం 4.30 గంటలకు తలోజా జైల్లో నేను అక్షయ్‌ను కలిశాను.. ఉదయం నుంచి పడిగాపులు కాసిన తర్వాత సాయంత్రం ఓ పావుగంట మాట్లాడే అవకాశం లభించింది.. కేసులో ఛార్జిషీటు దాఖలయ్యిందని, జైలు నుంచి బయటకు తీసుకొచ్చేందుకు ప్రయత్నిస్తున్నావా అమ్మ అని అడిగాడు.. గత సోమవారం కలిసినప్పుడు పోలీసులు దారుణంగా కొట్టారని చెప్పాడు.. ఇదంతా ముందస్తు ప్లాన్ ప్రకారమే జరిగింది.. కొందరు రాజకీయ నాయకుల అండదండలతోనే ఇది జరుగుతోన్నట్టు తెలుస్తోంది’ అని అన్నారు.

‘నా కుమారుడు దీపావళి పండుగక్కి టపాసులు కాల్చడానికే భయపడేవాడు.. అలాంటిది వాడు తుపాకీ లాక్కుని కాల్పులు జరిపాడా? ఓ తల్లికి అతడి భయం గురించి నాకు తెలుసు.. టపాసులంటే చాలా భయం.. దీపావళి సమయంలో శబ్దాలకు భయపడుతూ ఉంటే స్కూల్ లేదా ఆఫీసుకు నేను దగ్గరుండి తీసుకెళ్లేదాన్ని.. నాచేతితో వండిన ఆహారాన్ని తినాలని అనుకున్నాడు.. అప్పటి వరకు జైల్లో క్యాంటీన్‌లో ఆహారం కొనడానికి కొంత డబ్బు పంపాలని కోరుకున్నాడు.’ అని ఆమె కన్నీళ్లు పెట్టుకున్నారు. అంతేకాదు, తన కుమారుడిపై అత్యాచార ఆరోపణల విషయంలోనూ ఆమె అనుమానం వ్యక్తం చేశారు.

‘నేను జైలుకు వెళ్లినప్పుడల్లా ఈ నేరం నువ్వు చేశావా? అని అడిగితే లేదని చెప్పేవాడు.. ఒకవేళ నేరం చేసుంటే ప్రభుత్వం, పోలీసులు దీనిపై పారదర్శకంగా విచారణ జరిపించాల్సింది.. రుజువైతే శిక్షించాలి.. అవసరమైతే ఉరితీయాల్సిందే.. కానీ, ఈ కేసులో పోరాటానికి నా కుమారుడికి ఎలాంటి అవకాశం ఇవ్వకుండా దారుణంగా కాల్చి చంపారు’ అని అల్కా షిండే మండిపడ్డారు. అయితే, పోలీసులు మాత్రం.. నిందితుడ్ని తాము తలోజా జైలు నుంచి తీసుకెళ్తుండగా.. ముంబ్రా సమీపంలో తుపాకీ లాక్కుని కాల్పులు జరిపాడని అంటున్నారు.