మెట్రో రైలులో వర్షం నీరు లీకేజీ.. కామెంట్లతో రచ్చ లేపుతున్న నెటిజన్లు

నగర ప్రయాణికులకు సౌకర్యవంతమైన, వేగవంతమైన ప్రయాణాన్ని అందించేందుకు దేశంలోని దాదాపు చాలా నగరాల్లో మెట్రో రైలు సేవలు అందుబాటులోకి వచ్చాయి. హైదరాబాద్, ఢిల్లీ, ముంబై, పూణే, కోల్‌కతా, బెంగళూరు, కొచ్చి, చెన్నై, అహ్మదాబాద్, జైపూర్, గురుగ్రామ్, నోయిడా, లక్నో, నాగ్‌పూర్, కాన్పూర్ లాంటి నగరాల్లో ఇప్పటికే మెట్రో రైళ్లు పరుగులు తీస్తుండగా.. కొత్తగా మరికొన్ని రాష్ట్రాల్లోని కీలక నగరాల్లో ఈ మెట్రో రైలు సేవలను ప్రారంభించనున్నారు. అయితే మెట్రో రైళ్లలో ప్రయాణించేందుకు నగరవాసులు ఆసక్తి చూపుతుండటంతో నిత్యం లక్షల్లో ప్రయాణికులను మెట్రో రైళ్లు గమ్యస్థానాలకు చేర్చుతున్నాయి. ఈ క్రమంలోనే తాజాగా ఓ మెట్రో రైలులో వర్షం నీరు కారుతుండటం తీవ్ర సంచలనంగా మారింది.

గత కొన్ని రోజులుగా మహారాష్ట్రలో భారీ వర్షాలు కురుస్తున్నాయి. ఇటీవల కురిసిన వర్షాలకు ముంబై మెట్రో రైలులో వాన నీరు లీక్ కావడం తీవ్ర చర్చకు దారి తీసింది. మెట్రో రైలులో నీరు లీక్ అయిన ఘటనకు సంబంధించిన దృశ్యాలను అందులో ప్రయాణిస్తున్న ఓ వ్యక్తి వీడియో తీసి సోషల్ మీడియాలో పోస్ట్ చేయడంతో వెలుగులోకి వచ్చింది. ఇక వర్షం, ట్రాఫిక్‌ లేకుండా వేగంగా ఇంటికి వెళ్లేందుకు మెట్రో రైలు ఎక్కితే ఇలా అయ్యిందేంటి అంటూ ప్రయాణికులు వాపోతున్నారు. దీంతో వేల సంఖ్యలో నెటిజన్లు కామెంట్లు, లైక్‌లు, షేర్లతో విరుచుకుపడుతున్నారు. ఈ ఘటనపై తీవ్ర విమర్శలు గుప్పిస్తున్నారు.

ఈ వ్యవహారం తీవ్ర దుమారానికి కారణం అవుతుండటంతో ముంబై మెట్రో అధికారులు స్పందించారు. ఇలాంటి సంఘటన ఎదురైనందుకు తాము చింతిస్తున్నట్లు తెలిపారు. అంతేకాకుండా జరిగిన ఘటనపై ప్రయాణికులకు క్షమాపణలు చెప్పారు. ఇక సదరు స్టేషన్ సిబ్బంది ఆ రైలులో వర్షం నీరు లీకేజీకి సంబంధించిన సమస్యను గుర్తించి.. ఉన్నతాధికారులకు చెప్పినట్లు తెలిపారు. వెంటనే స్పందించి ఆ లీకేజీ ఉన్న మెట్రో రైలును డిపోకు పంపించి.. తనిఖీలు చేసి దాన్ని సరిచేసినట్లు ముంబై మెట్రో అధికారులు తమ అధికారిక ట్విటర్ అకౌంట్ ద్వారా వెల్లడించారు.

అయితే నెటిజన్లు మాత్రం కామెంట్లతో విరుచుకుపడుతున్నారు. ఆ మెట్రో రైలు వెర్సోవా నుంచి ప్రారంభం అయిందని.. తాను అంధేరిలో ఎక్కగా.. ఘాట్కోపార్ స్టేషన్ వచ్చేవరకు ఆ మెట్రో రైలు పైనుంచి వర్షం నీరు లీక్ అయినట్లు ఒక నెటిజన్ పేర్కొన్నాడు. ముంబై మెట్రో రైలులో మినీ జోగ్ ఫాల్స్‌ను ఎక్స్‌పీరియన్స్ చేసినట్లు మరో నెటిజన్ కామెంట్ చేశాడు. బాంబే ఈజ్ బాంబేయింగ్ అంటూ ఇంకో వ్యక్తి తెలిపాడు. గత కొన్ని రోజులుగా ముంబైలో భారీ వర్షాలు కురుస్తున్నాయి.