వాటి మధ్య నలిగిపోం.. భారత్, చైనాలకు ఝలక్ ఇచ్చిన శ్రీలంక నూతన అధ్యక్షుడు

పొరుగు దేశాలు ముఖ్యంగా భారత్, చైనాలతో సంబంధాలు, విదేశాంగ విధానంపై శ్రీలంక నూతన అధ్యక్షుడు అనురా కుమార దిసానాయకే సంచలన వ్యాఖ్యలు చేశారు. ఇరు దేశాలతో శ్రీలంక సమాన దూరం పాటిస్తుందని, వాటి మధ్య నలిగిపోవాలనే ఉద్దేశం మాకు లేదని ఆయన వ్యాఖ్యానించారు. అయితే, భారత్, చైనాలను విలువైన భాగస్వాములుగానే చూస్తామని ఉద్ఘాటించారు. లంక అధ్యక్ష బాధ్యతలు చేపట్టిన అనంతరం తొలిసారి భారత్‌, చైనా విదేశాంగ విధానంపై ఆయన స్పందించారు. ప్రముఖ మ్యాగజైన్ ది మోనోక్లేకు ఇచ్చిన ఇంటర్వ్యులో పొరుగుదేశాలతో విదేశాంగ విధానంపై అనురా కుమార కీలక వ్యాఖ్యలు చేశారు.

‘‘మా నాయకత్వంలో దేశాన్ని భౌగోళిక, రాజకీయ ప్రత్యర్థుల జోలికి వెళ్లకుండా చూస్తాం.. నేషనల్ పీపుల్స్ పవర్ (ఎన్‌పీపీ) ప్రభుత్వం ఏ దేశంతోను అంటకాగదు.. పొరుగు దేశాలైన భారత్‌, చైనాలతో సమతౌల్య సంబంధాలను పెంపొందించుకోవాలని భావిస్తోంది.. భౌగోళిక, రాజకీయ పోరాటంలో మేము ఎవరితో పోటీదారులం కాదు.. ఏ దేశంతోనూ పొత్తు పెట్టుకోం.. ముఖ్యంగా భారత్‌, చైనాల మధ్య నలిగిపోవాలనే ఉద్దేశం మాకు లేదు.. కానీ, వాటిని విలువైన స్నేహితులుగా మా ప్రభుత్వ సన్నిహిత భాగస్వాములు కావాలని ఆశిస్తున్నాం.. యూరోపియన్‌ యూనియన్‌, మధ్య, పశ్చిమ ఆసియా, ఆఫ్రికాతో కూడా సంబంధాలను కొనసాగిస్తాం’ అని అన్నారు.

పొరుగు దేశాల ఆధిపత్య పోరాటంలో శ్రీలంక నలిగిపోదని, ఇరుదేశాలతో పరస్పర ప్రయోజనకరమైన దౌత్య భాగస్వామ్యం నిర్మించడంపై దృష్టి సారిస్తోందని ఆయన తెలిపారు. ప్రాంతీయ ఉద్రిక్తతలు పెరుగుతున్న నేపథ్యంలో శ్రీలంక తమ సార్వభౌమత్వాన్ని కాపాడుకోవడానికి తటస్థ విదేశాంగ విధాన విధానమే కీలకమని భావిస్తున్నట్లు సమాచారం. కమ్యూనిస్ట్ నేత అధ్యక్ష పీఠం ఎక్కడంతో చైనాతో సన్నిహిత సంబంధాలు కోసం ప్రయత్నిస్తారనే ప్రచారం జరుగుతోంది. ముఖ్యంగా భారత్ ఈ విషయంలో ఆందోళన చెందుతోంది.

శ్రీలంకలో చైనా తన ప్రాబల్యాన్ని పెంచుకుని, హిందూ మహాసముద్రంలో పాగా వేయడానికి చైనా ప్రయత్నిస్తోంది. ఈ క్రమంలో విదేశీ ప్రత్యక్ష పెట్టుబడుల ద్వారా తమ నుంచి అనురా దిసానాయకే బలమైన మద్దతును కోరుకుంటారని చైనా భావిస్తోందని హాంకాంగ్ పత్రిక ఓ కథనం ప్రచురించింది. కానీ, శ్రీలంక అధ్యక్షుడి వ్యాఖ్యలతో ఈ ప్రచారానికి తెరపడినట్టయ్యింది. భారత్ కంటే చైనాతోనే కలిసి పనిచేయడానికి నూతన అధ్యక్షుడు దిసానాయకే ఇష్టపడే అవకాశం ఎక్కువ ఉందంటూ కొలంబో యూనివర్సిటీ ఆర్ధశాస్త్రం ప్రొఫెసర్ వ్యాఖ్యలను ఉటంకించింది. కానీ, తాము రెండు దేశాలకు సమాన దూరంలో ఉంటామని లంక సారథి బహిరంగంగా కుండబద్దలకొట్టారు. ఆర్ధిక సంక్షోభంలో కూరుకుపోయిన దేశాన్ని తిరిగి గాడిలో పెట్టడమే తన తక్షణ కర్తవ్యమని అన్నారు.