సిద్ధూ దేనికీ భయపడడు.. అది నా బ్లడ్‌లోనే లేదు.. కర్ణాటక సీఎం

ముడా కుంభకోణంలో ఆరోపణలు ఎదుర్కొంటున్న కర్ణాటక ముఖ్యమంత్రి సిద్ధరామయ్యపై కేసు నమోదుచేయాలని బెంగళూరు ప్రత్యేక కోర్టు ఆదేశాలు వెలువరించింది. విచారణకు గవర్నర్‌ అనుమతించడాన్ని సవాల్ చేస్తూ సిద్ధరామయ్య వేసిన పిటిషన్‌ను కర్ణాటక హైకోర్టు మంగళవారం తిరస్కరించిన విషయం తెలిసిందే. దీంతో ట్రయల్ కోర్టు.. విచారణకు పోలీసులను ఆదేశించింది. ముడా భూముల కేటాయింపులపై కర్ణాటక లోకాయుక్త అధికారి ఆధ్వర్యంలో దర్యాప్తునకు అనుమతించింది. మూడు నెలల్లోగా విచారణ పూర్తిగా దర్యాప్తు చేసి నివేదిక సమర్పించాలని మైసూర్‌ పోలీసులకు సూచించింది. ఈ ఆదేశాలపై సీఎం సిద్ధరామయ్య తాజాగా స్పందించారు.

‘‘నేను ఈ కేసులో పోరాటం చేస్తాను... దేనికి నేను భయపడను.. విచారణను ఎదుర్కొనేందుకు సిద్ధంగా ఉన్నాను. న్యాయపరంగా ఎదుర్కొంటాను’ అని పేర్కొన్నారు. సిద్ధరామయ్యపై గవర్నర్‌కు ఫిర్యాదు చేసిన సామాజిక కార్యకర్త టీజే అబ్రహం మాత్రం.. కోర్టు ఉత్తర్వులపై పూర్తిగా సంతృప్తి చెందడం లేదని, సీబీఐతోనే విచారణ జరిపించాలని అన్నారు. ‘లోకాయుక్త ఆధ్వర్యంలోనే దర్యాప్తు జరపాలని కోర్టు చెప్పింది.. ఎఫ్ఐఆర్ నమోదయిన తర్వాత మళ్లీ కర్ణాటక హైకోర్టును ఆశ్రయిస్తాం’ అని చెప్పారు.

ముడా భూ కేటాయింపుల కుంభకోణంలో సిద్ధరామయ్యకు మంగళవారం హైకోర్టులో ఎదురు దెబ్బ తగిలిన విషయం తెలిసిందే. ఈ కేసులో తనను విచారించేందుకు గవర్నర్ అనుమతి మంజూరుచేయడాన్ని ఆయన హైకోర్టులో సవాల్ చేయగా.. ఆ పిటిషన్‌ను కోర్టు తిరస్కరించింది గవర్నర్ థావర్‌చంద్‌ గెహ్లాట్ చర్యలు చట్టప్రకారం ఉన్నాయని, ఎలాంటి లోపాలు లేవని, ఈ కేసులో పేర్కొన్న అంశాలు విచారణ చేయాల్సి ఉందని హైకోర్టు స్పష్టం చేసింది.

ఇదిలా ఉండగా.. సీఎం సిద్ధరామయ్యపై ప్రతిపక్ష బీజేపీ తీవ్రస్థాయిలో విరుచుకుపడింది. హైకోర్టు తీర్పును గౌరవించి ఆయన ముఖ్యమంత్రి పదవికి రాజీనామా చేయాలని డిమాండ్ చేస్తోంది. ముడా అక్రమాల నేపథ్యంలో సీఎంను విచారించేందుకు గవర్నర్‌ అనుమతినివ్వడం సరైందేనని కోర్టు స్పష్టం చేసిందని, కొద్ది నెలలుగా ప్రభుత్వ వైఫల్యాలు, అక్రమాలపై నిరంతరం పోరాటం చేస్తున్నామని గుర్తు చేస్తోంది.

‘ముడా’ స్థలాల కేటాయింపుల్లో సిద్ధరామయ్య అధికార దుర్వినియోగానికి పాల్పడటంలో ఆయన కుటుంబసభ్యులు లబ్ధి పొందారని ముఖ్యమంత్రిపై గవర్నర్‌కు సామాజిక కార్యకర్తలు టి.జె.అబ్రహం, స్నేహమయి కృష్ణ, ప్రదీప్‌కుమార్‌‌లు ఫిర్యాదు చేశారు. వీరి ఫిర్యాదుల అందిన కొద్ది రోజుల్లోనే ఆగస్టు 16న సీఎంను విచారించాలంటూ గవర్నర్‌ ఆదేశించారు. అయితే, నాలుగు దశాబ్దాల సుదీర్ఘ రాజకీయ తాను ఎటువంటి తప్పుచేయలేదని, న్యాయవ్యవస్థపై తనకు పూర్తి నమ్మకం ఉందని సిద్ధరామయ్య ఇటీవల వ్యాఖ్యానించారు. సీఎం సతీమణికి ఆమె సోదరుడు ఇచ్చిన మూడున్నర ఎకరాల స్థలాన్ని తీసుకుని.. దానికి పరిహారంగా విలువైన స్థలాన్ని ఇచ్చారనేది ప్రధాన ఆరోపణ.