భారీ ఎన్‌కౌంటర్‌.. 36 మంది మావోయిస్టులు మృతి, అగ్రనేతలు కూడా

మావోయిస్టులను లేకుండా చేస్తామని కేంద్ర ప్రభుత్వం గట్టి హెచ్చరికలు చేసిన నేపథ్యంలో.. దండకారణ్యం నిత్యం కాల్పుల మోతతో దద్దరిల్లిపోతోంది. పోలీసులు, నక్సల్స్ మధ్య తరచూ భీకరంగా కాల్పులు జరుగుతూనే ఉన్నాయి. అయితే గత కొంత కాలంగా జరుగుతున్న ఆపరేషన్లలో భారీగా మావోయిస్టులు నేలకొరుగుతుండటంతో వారికి గట్టి ఎదురుదెబ్బలు తగులుతున్నాయి. మరీ ముఖ్యంగా ఛత్తీస్‌గఢ్‌లో జరుగుతున్న నక్సల్స్ ఏరివేత ఆపరేషన్లలో మావోయిస్ట్ అగ్రనేతలను పోలీసులు, భద్రతా సిబ్బంది మట్టుబెడుతున్నారు. ఈ క్రమంలోనే తాజాగా మరోసారి ఛత్తీస్‌గఢ్‌లో జరిగిన కాల్పుల్లో ఏకంగా 36 మంది మావోయిస్ట్‌లు హతం అయ్యారు. ఇక ఆ ప్రాంతంలో మావోయిస్ట్ అగ్రనేతలు ఉన్నారనే పక్కా సమాచారం భద్రతా బలగాలకు అందింది. దీంతో వారు కాల్పులను మరింత ముమ్మరం చేశారు.

ఛత్తీస్‌గఢ్‌లోని బస్తర్‌ రేంజ్‌లో ఉన్న నారాయణ్‌పూర్‌- దంతెవాడ జిల్లాల సరిహద్దుల్లో శుక్రవారం మధ్యాహ్నం ఎన్‌కౌంటర్‌ ప్రారంభం అయింది. అబూజ్‌మడ్‌ దండకారణ్యంలో మావోయిస్టులు ఉన్నారని.. వారిలో కొందరు అగ్రనేతలు కూడా ఉన్నారనే సమాచారం భద్రతా బలగాలకు అందడంతో ఆ ప్రాంతంలో స్పెషల్ ఆపరేషన్‌ చేపట్టారు. ఈ క్రమంలోనే మావోయిస్టులు ఎదురుపడి కాల్పులకు దిగారు. దీంతో ఎదురు కాల్పులు ప్రారంభించిన భద్రతా బలగాలు ఇప్పటివరకు 36 మందిని మట్టుబెట్టాయి. ఇప్పటివరకు సంఘటనా స్థలంలో 36 మంది మావోయిస్టుల మృతదేహాలను గుర్తించామని.. పోలీసులు వెల్లడించారు.

ఇక ఎన్‌కౌంటర్ జరిగిన ప్రాంతంలో భారీ ఎత్తున పేలుడు పదార్థాలను స్వాధీనం చేసుకున్నట్లు పోలీసులు పేర్కొన్నారు. అందులో ఏకే-47 లాంటి అత్యాధునిక ఆయుధాలు లభించడంతో మావోయిస్టు అగ్రనేతలు సమావేశం ఏర్పాటు చేశారని.. వారు అక్కడే ఉన్నారని అనుమానిస్తున్న పోలీసులు ఆపరేషన్‌ను మరింత ముమ్మరం చేశారు. ప్రస్తుతం ఎన్‌కౌంటర్‌ కొనసాగుతుండగా.. మృతుల సంఖ్య మరింత పెరిగే అవకాశాలు ఉన్నట్లు తెలుస్తోంది.