ఏపీలోని ఆ ఆరు జిల్లాలకు రూ.6 కోట్లు విడుదల.. చంద్రబాబు ఆదేశాలతో ఎమర్జెన్సీగా

ఆంధ్రప్రదేశ్ ప్రభుత్వం కీలక నిర్ణయం తీసుకుంది. వాతావరణశాఖ అల్పపీడనం, భారీ వర్షాల హెచ్చరికలతో ఆరు జిల్లాల్లో సహాయ, పునరావాస చర్యలపై ఫోకస్ పెట్టింది. దీని కోసం ప్రభుత్వం.. ఆరు జిల్లాలకు రూ.6 కోట్లను విడుదల చేసింది. ప్రకాశం, నెల్లూరు, తిరుపతి, చిత్తూరు, కడప‌, అన్నమయ్య జిల్లాలకు రూ.కోటి చొప్పున విడుదల చేశారు. ఈ మేరకు రెవెన్యూ (విపత్తుల నిర్వహణ) శాఖ ప్రత్యేక ప్రధాన కార్యదర్శి సిసోడియా ఉత్తర్వులు జారీ చేశారు. ఈ నిధుల్ని ఆయా జిల్లాల్లోని వరద ప్రాంతాల్లో పునరావాస శిబిరాలు, తాగునీరు, ఆహారం, పాలు, ఆరోగ్య శిబిరాలు, పారిశుద్ధ్య చర్యలతో పాటు వరద బాధితులను తరలించేందుకు ఆర్టీసీ బస్సులను అద్దె ప్రాతిపదికన తీసుకోవడానికి వినియోగించనున్నారు.

బంగాళాఖాతంలో కేంద్రీకృతమైన అల్పపీడనంగా బలపడిందని ఏపీ విపత్తుల నిర్వహణ సంస్థ తెలిపింది. ఇది వాయుగుండంగా మారే అవకాశం ఉందని.. రాగల 2 రోజులలో పశ్చిమవాయువ్య దిశగా ఉత్తర తమిళనాడు, దక్షిణ కోస్తా తీరాల వైపు కదిలేందుకు అవకాశం ఉంది అంటున్నారు. దక్షిణ కోస్తా, రాయలసీమలో భారీ నుంచి అతి భారీ వర్షాలు పడే ఛాన్స్ ఉందని.. ప్రజలు అప్రమత్తంగా ఉండాలని సూచించారు. తీరం వెంబడి గంటకు 35-55 కిమీ వేగంతో ఈదురుగాలులు వీస్తాయని.. మత్స్యకారులు వేటకు వెళ్ళరాదని హెచ్చరించారు. పశ్చిమగోదావరి, ఏలూరు, కృష్ణా, ఎన్టీఆర్, గుంటూరు, బాపట్ల, పల్నాడు, ప్రకాశం, నెల్లూరు, తిరుపతి, చిత్తూరు, కర్నూలు, నంద్యాల, అన్నమయ్య జిల్లాల్లోని కొన్ని ప్రాంతాల్లో భారీ నుంచి అతి భారీ వర్షాలు కురిసే అవకాశం ఉందని అంచనా వేస్తున్నారు.

మరోవైపు అల్పపీడనం కారణంగా రెండో రోజు నెల్లూరు జిల్లా వ్యాప్తంగా భారీ వర్షాలు కురుస్తున్నాయి. ప్రకాశం జిల్లాలో కూడా ఎడతెరిపి లేని వానలు పడుతున్నాయి. ప్రకాశం, నెల్లూరు, తిరుపతి, డాక్టర్‌ బీఆర్‌ అంబేద్కర్ కోనసీమ, అన్నమయ్య జిల్లాల్లో సోమవారం భారీ వర్షాలు పడ్డాయి. రాష్ట్రంలోనే అత్యధికంగా సోమవారం సాయంత్రం 6 వరకు నెల్లూరు జిల్లా కొడవలూరులో 11 సెం.మీ. వర్షపాతం నమోదైంది. నెల్లూరు జిల్లాలోని ఇసకపల్లిలో-10.9, కావలి-10.6, బుచ్చిరెడ్డిపాలెం-9.7 సెంటీ మీటర్ల వర్షపాతం నమోదైంది.

అల్పపీడనం, భారీ వర్షాలు కురుస్తాయనే హెచ్చరికలతో అధికార యంత్రాంగం అప్రమత్తంగా ఉండాలని ముఖ్యమంత్రి చంద్రబాబు సూచించారు. వర్షాలపై ఆయా ప్రాంతాల్లో ప్రజల ఫోన్లకు మెస్సేజ్‌లు పంపి అలెర్ట్‌ చేయాలని సూచించారు. వర్ష ప్రభావిత జిల్లాల్లో చెరువులు, కాలువలు, నీటి వనరుల దగ్గర పర్యవేక్షణ ఉండాలన్నారు.. కట్టల పరిరక్షణపై దృష్టి పెట్టాలన్నారు. నెల్లూరు, తిరుపతి జిల్లాలతో పాటూ అవసరమైన చోట ఎన్డీఆర్‌ఎఫ్‌, ఎస్డీఆర్‌ఎఫ్‌ బృందాలు సిద్ధంగా ఉండాలని సూచించారు. భారీ వర్షాలతో పోలీసు, పంచాయతీరాజ్, జలవనరులు, ఆర్‌అండ్‌బీ శాఖల సిబ్బంది అప్రమత్తం అయ్యారు.