ఏపీలో జోరుగా మద్యం అమ్మకాలు.. భారీగా ఆదాయం

ఏపీలో నూతన మద్యం విధానం అమల్లోకి వచ్చింది. రాష్ట్రవ్యాప్తంగా ప్రైవేట్ వ్యక్తుల ఆధ్వర్యంలో మద్యం షాపులు తెరుచుకున్నాయి. అక్టోబర్ 16వ తేదీ నుంచి కొత్త మద్యం పాలసీ ప్రకారం లిక్కర్ షాపులు పనిచేస్తున్నాయి. అయితే ఇంకా పూర్తిస్థాయిలో వందశాతం మద్యం షాపులు తెరుచుకోలేదు. శనివారం (అక్టోబర్ 19) నాటికి రాష్ట్రవ్యాప్తంగా 100 శాతం మద్యం షాపులు అందుబాటులోకి వస్తాయని ఏపీ ఎక్సైజ్ శాఖ అధికారులు చెప్తున్నారు. శుక్రవారం నాటికి రాష్ట్రంలోని 90 శాతం లిక్కర్ షాపులు తెరుచుకున్నట్లు వెల్లడించారు. ఇక శుక్రవారం మధ్యాహ్నం వరకూ 7 లక్షల లిక్కర్, బీరు కేసులు డిపోల నుంచి వైన్స్ షాపు‌లకు సరఫరా అయ్యిందని ఎక్సైజ్ శాఖ అధికారులు తెలిపారు. మద్యం అమ్మకాల ద్వారారూ. 530 కోట్ల ఆదాయం వచ్చినట్లు సమాచారం.

మరోవైపు మద్యం ప్రియులు ఎంతగానో ఎదురు చూస్తున్న 99 రూపాయల క్వార్టర్ బాటిల్ ఈ నెలాఖరు నాటికి రాష్ట్రవ్యాప్తంగా పూర్తిస్థాయిలో అందుబాటులోకి వస్తుందని ఏపీ ఎక్సైజ్ కమిషనర్ నిషాంత్ కుమార్ వెల్లడించారు. ప్రస్తుతం మద్యం షాపులకు రోజుకు 10 వేల కేసుల దాకా సరఫరా చేస్తున్నామని.. డిమాండ్‌ను అనుసరించి సరఫరా పెంచుతామని చెప్పారు. మద్యం దుకాణదారులు ఎమ్మార్పీ ప్రకారం మాత్రమే అమ్మకాలు చేయాలన్న ఏపీ ఎక్సైజ్ శాఖ కమిషనర్..ధరలపై కమిటీ ఇచ్చే నివేదిక ఆధారంగా మళ్లీ మార్పులు చేస్తామన్నారు. ఇక సిండికేట్ల వల్ల ఇబ్బందులు ఉంటే ఫిర్యాదు చేయవచ్చన్న కమిషనర్.. ఇప్పటి వరకూ ఈ విషయంలో తమకు ఎలాంటి ఫిర్యాదులు రాలేదన్నారు. మద్యం దుకాణాదారులు ఎమ్మార్పీ ధరల కంటే ఎక్కువ వసూలు చేస్తే కఠిన చర్యలు తీసుకుంటామని హెచ్చరించారు.

మరోవైపు అక్టోబర్ 16 నుంచి రాష్ట్రవ్యాప్తంగా కొత్త మద్యం పాలసీ అమల్లోకి వచ్చింది. ప్రభుత్వం నిర్వహించిన లాటరీలో షాపులు దక్కించుకున్న వ్యాపారులు.. కొత్త షాపులు తెరిచారు. 3396 షాపులలో 90 శాతం మద్యం దుకాణాలు ఇప్పటికే అందుబాటులోకి వచ్చాయి. ఈ దుకాణాల్లో 2019కి ముందున్న లిక్కర్ బ్రాండ్లు మళ్లీ అందుబాటులోకి వచ్చాయి. దీంతో మందుబాబులు ఫుల్ ఖుషీగా ఉన్నారు. అయితే ఫేమస్ బ్రాండ్లు అన్నీ అందుబాటులోకి వచ్చినప్పటికీ.. 99 రూపాయల క్వార్టర్ మాత్రం ఇంకా దొరకడం లేదు. అయితే త్వరలోనే రూ.99లకే క్వార్టర్ బాటిల్ అందుబాటులోకి తెస్తామని ఏపీ ఎక్సైజ్ శాఖ చెప్తోంది.